جاتتىعۋ جاساۋ قارتايۋدى قالاي باياۋلاتادى؟ - قىتاي عالىمدارى ناقتى جاۋابىن تاپتى

جاتتىعۋ جاساۋ - دەنساۋلىقتىڭ كىلتى ەكەنى بۇرىننان بەلگىلى. ءبىراق ونىڭ ناقتى قالاي قارتايۋدى باياۋلاتاتىنى عىلىم ءۇشىن ءالى تولىق اشىلماعان قۇبىلىس بولاتىن. قىتاي عالىمدارى وسى سۇراققا ناقتى جاۋاپ تاپتى: ۇزاق مەرزىمدى فيزيكالىق بەلسەندىلىك كەزىندە اعزادا بولىنەتىن بەتاين اتتى تابيعي قوسىلىس قارتايۋ پروتسەسىن باياۋلاتادى ەكەن، دەپ حابارلايدى scmp.

زەرتتەۋشىلەردىڭ ايتۋىنشا، بەتاين جاتتىعۋ كەزىندە بۇيرەك ۇلپالارىندا پايدا بولادى جانە ول قارتايۋعا قارسى كۇرەستە ماڭىزدى ءرول اتقارادى. اتاپ ايتقاندا، ول اعزاداعى قابىنۋدى ازايتىپ، TBK1 دەپ اتالاتىن فەرمەنتتىڭ جۇمىسىن تەجەيدى. بۇل فەرمەنت - دەنەنى قارتايتاتىن نەگىزگى بيولوگيالىق جولداردىڭ ءبىرى. وسىلايشا، بەتاين ءبىر ۋاقىتتا بىرنەشە مۇشەنى قارتايۋدان قورعاۋعا قابىلەتتى.

بۇل جاڭالىقتى قىتاي عىلىم اكادەمياسىنىڭ زوولوگيا ينستيتۋتى مەن بەيجىڭ گەنوميكا ينستيتۋتىنىڭ زەرتتەۋشىلەرى بىرلەسىپ اشقان. عىلىمي جۇمىستى پروفەسسورلار ليۋ گۋانحۋەي، چيۋي جين جانە جاڭ ۆەيچي باسقارعان. زەرتتەۋ ناتيجەلەرى الەمدىك بەدەلگە يە Cell جۋرنالىنا 25-ماۋسىمدا جاريالاندى.

عالىمدار بەتايندى سىرتتان قابىلداۋ ۇزاق مەرزىمدى جاتتىعۋدىڭ پايداسىن دالمە-ءدال قايتالاي الاتىنىن دالەلدەگەن. ياعني، ەگەر ادام ۇنەمى سپورتپەن شۇعىلدانا الماسا، بولاشاقتا بەتاين قوسپالارى سول اسەردى بەرەتىن تاسىلگە اينالۋى مۇمكىن.

دۇنيەجۇزىلىك دەنساۋلىق ساقتاۋ ۇيىمى (د د ۇ) دا دەنساۋلىقتى ساقتاۋدىڭ ءتورت نەگىزگى تىرەگى رەتىندە تاماقتانۋ، جاتتىعۋ، ۇيقى جانە كۇيزەلىستى باسقارۋ قاجەت ەكەنىن اتاپ وتەدى. ءبىراق سونىڭ ىشىندە جاتتىعۋ - قارتايۋعا قارسى ەڭ ءتيىمدى تابيعي قۇرالدىڭ ءبىرى. ال بۇل جاڭالىق سول مەحانيزمدى تەرەڭىرەك تۇسىنۋگە جول اشىپ وتىر.

جاتتىعۋ تەك بۇلشىق ەت ەمەس، اعزانىڭ ىشكى مولەكۋلالىق جۇيەلەرىنە دە اسەر ەتەدى. قىتايلىق عالىمدار اشقان بەتاين مولەكۋلاسى بولاشاقتا قارتايۋمەن كۇرەستەگى نەگىزگى «قۇرالداردىڭ» بىرىنە اينالۋى مۇمكىن.