پرەزيدەنتتىڭ پىكىرىنشە، جاساندى ينتەللەكتىنىڭ تىڭ مۇمكىندىكتەرى جاستاردىڭ الەۋەتىن ارتتىرۋعا جول اشادى
- قازىرگى تاڭدا شاعىن شىعارماشىلىق ۇجىمدار ۇلكەن ستۋديالارمەن باسەكەلەسە الادى. شىعارماشىلىق ادامدارى مەن ءتۇسىرىلىم توپتارى ءۇشىن فيلم تۇسىرۋدە پروديۋسەرلىك كومپانيالاردىڭ تابالدىرىعىن توزدىرىپ، دەمەۋشى ىزدەۋدىڭ قاجەتى جوق. نارىققا شىعۋدىڭ جولى الدەقايدا جەڭىلدەدى. بۇل ءبىر جاعىنان باسەكەلەستىكتى ارتتىرىپ، ەكىنشى جاعىنان تالانتتى ادامداردىڭ ءوزىن تانىتۋىنا مۇمكىندىك بەرەدى. وسى وڭ وزگەرىستەردى كرەاتيۆتى قاۋىمداستىقتى بىرىكتىرۋ جولىندا ءتيىمدى پايدالانۋىمىز كەرەك. ارينە، جاساندى ينتەللەكت اسقان دارىن يەسىمەن شەندەسە المايدى، دەگەنمەن عۇمىرىن شىعارماشىلىققا ارناعان ادامدار ءۇشىن تاپتىرمايتىن كومەكشى، - دەدى پرەزيدەنت.
مەملەكەت باسشىسى Astana AI Film Festival حالىقارالىق بايقاۋىنىڭ تالانتتى ءارى ماقساتشىل جاندارعا تىڭ مۇمكىندىك سىيلاپ، الەمدىك كرەاتيۆتى يندۋستريانى ىلگەرىلەتۋگە سەپتىگىن تيگىزەتىنىنە سەنىم ءبىلدىردى.
- استانا تورىندە وسىنداي جاھاندىق اۋقىمداعى ءىس-شارانىڭ ءوتۋى كەزدەيسوق ەمەس. قازاقستان - جاستاردىڭ ەلى، حالقىمىزدىڭ ورتاشا جاسى - 33 جاس. مەن قازاقستان جاستارىن بىلىمگە ۇمتىلاتىن، جاڭالىققا قۇشتار، وزىق ويلى ازاماتتار دەپ سانايمىن. جاقىنعا دا، الىسقا دا مەيىرىممەن قاراۋ، ەشكىمدى ءبولىپ-جارماۋ - حالقىمىزدىڭ بويىندا بار اسىل قاسيەت. مۇنى الەم جۇرتشىلىعى دا جاقسى بىلەدى جانە مويىندايدى دەپ ويلايمىن. ماسەلەن، بۇگىنگى فەستيۆالگە الەمنىڭ 125 ەلىنەن 8 مىڭنان استام ءوتىنىم كەلىپ ءتۇستى. ا ق ش، ءۇندىستان، قىتاي، وڭتۇستىك كورەيا، ۇلىبريتانيا، يندونەزيا، جاپونيا، برازيليا، فرانسيا جانە وزگە دە ەل ازاماتتارى ءوز جۇمىسىن جولدادى. وسى تۇستا قازىلار القاسىنىڭ قۇرامىندا الەمگە ايگىلى ونەر جانە تەحنولوگيا سالاسىنىڭ ماماندارى بار ەكەنىن ايرىقشا اتاپ وتكىم كەلەدى. مەن بۇگىن بارشاڭىزعا ەرەكشە العىس ايتامىن. وسى بايقاۋدىڭ ارقاسىندا قاتىسۋشىلار ءوزارا تاجىريبە الماسىپ، بولاشاقتا بىرلەسكەن جوبالاردى جۇزەگە اسىرادى دەپ سەنەمىن، - دەدى قاسىم-جومارت توقايەۆ.
ءىس-شارانىڭ اشىلۋ سالتاناتىندا Astana AI Film Festival حالىقارالىق فەستيۆالىنىڭ نەگىزىن قالاۋشى الماس جالي، Freedom Holding Corp باس ديرەكتورى تيمۋر تۋرلوۆ، Network School نەگىزىن قالاۋشى بالادجي شرينيۆاسان، فەستيۆال قاتىسۋشىسى دجامين تاسكەر جانە Astana AI Film Festival حالىقارالىق فەستيۆالى قازىلار القاسىنىڭ ءتوراعاسى ودري ازۋلە ءسوز سويلەدى.