سودان كەيىن پرەزيدەنت ءبىرقاتار باستى مىندەتتەردى اتادى.
- بىزگە جاساندى ينتەللەكتىنى پايدالانا وتىرىپ، وندىرىستىك ۇدەرىستەردى كەشەندى تۇردە ترانسفورماتسيالاۋ قاجەت. قازىرگى كەزدە كوپتەگەن كاسىپورىندا سيفرلاندىرۋ جۇمىستارى شاشىراڭقى جۇرگىزىلىپ جاتىر. جەكەلەگەن وپەراتسيالاردى اۆتوماتتاندىرىپ، جاڭا قىزمەتتەردى ەنگىزگەنىمىزگە قاراماستان، ءوندىرىس مودەلى كوپ جاعدايدا وزگەرىسسىز قالادى. مۇنداي ءتاسىل ءوزىن ءوزى اقتامايدى. كاسىپورىندار بۇكىل ءوندىرىس تىزبەگىن قايتا قاراپ، قاي تۇستا ج ي كومەگىمەن تيىمدىلىكتى بارىنشا ارتتىرۋعا بولاتىنىن ايقىنداۋى كەرەك. ۇكىمەت «سامۇرىق-قازىنا» قورىمەن بىرلەسىپ، نەگىزگى بيزنەس-ۇدەرىستەرى جاساندى ينتەللەكت ارقىلى جان-جاقتى ترانسفورماتسياعا ۇشىرايتىن كاسىپورىنداردى انىقتاعانى ءجون. جاڭا تەحنولوگيالار ءوندىرىستى باسقارۋ جۇيەسىنە تىكەلەي كىرىگۋگە ءتيىس. اناعۇرلىم ءساتتى مودەلدەردى بۇكىل ەل اۋماعىندا تاراتۋعا بولادى، - دەدى قاسىم-جومارت توقايەۆ.
مەملەكەت باسشىسى قولدانبالى عىلىمدى كۇشەيتۋگە ۇندەدى. ول كەڭەستىڭ وسىعان دەيىنگى وتىرىسىندا ج ي سالاسىنا ماماندانعان زەرتتەۋ ۋنيۆەرسيتەتىن قۇرۋ تۋرالى شەشىم قابىلدانعانىن ەسكە سالدى.
- Qazaq AI Research University جوعارى ساناتتى ماماندار دايارلايتىن ورتالىق قانا ەمەس، قولدانبالى زەرتتەۋلەر جۇرگىزىلەتىن جەتەكشى الاڭداردىڭ ءبىرى بولۋعا ءتيىس. ونىڭ بۇكىل عىلىمي- زەرتتەۋ باعدارلاماسى ەكونوميكالىق دامۋدىڭ ناقتى قاجەتتىلىكتەرىنە بەيىمدەلۋى كەرەك. بۇل ءۇشىن ونەركاسىپ سالاسىنداعى جاساندى ينتەللەكتىگە قاتىستى وزەكتى مىندەتتەر ءتىزىمىن جاڭارتىپ وتىرامىز. اتالعان ىستە بيۋروكراتياعا جول بەرۋگە بولمايدى. مۇنداي مىندەتتەردى ءوندىرىستىڭ الدىڭعى شەبىندە جۇرگەن ينجەنەرلەر، تەحنولوگتار، شەبەرلەر مەن وپەراتورلار انىقتاۋى قاجەت. قاي جەردە شىعىن بارىن، قانداي قۇرىلعى توقتاپ تۇرعانىن، قاي تۇستا ولقىلىقتار ورىن الىپ، قاتەرلەر پايدا بولعانىن وسى ماماندار بىلەدى. وسىلايشا، باسشىلىق وندىرىستەگى پروبلەمادان جان-جاقتى حاباردار بولادى. ال بۇل، ءوز كەزەگىندە، جاساندى ينتەللەكتىنى قاي جەردە، قالاي پايدالانۋ جولىن بەلگىلەۋگە كومەكتەسەدى. Qazaq AI Research University، سونداي-اق باسقا دا ۋنيۆەرسيتەتتەر مەن عىلىمي-زەرتتەۋ ينستيتۋتتارى وسى ءتىزىمدى باسشىلىققا الۋعا ءتيىس. سوندا عانا عىلىم مەن ءوندىرىس اراسىندا تىكەلەي بايلانىس ورنايدى. ۇكىمەتكە ۇلتتىق كومپانيالارمەن جانە جەكە بيزنەسپەن بىرگە يندۋسترياداعى وزەكتى ج ي-مىندەتتەردى ايقىنداۋ جانە ۇدايى جاڭارتۋ ءتارتىبىن ازىرلەۋدى تاپسىرامىن، - دەدى پرەزيدەنت.