پرەزيدەنت جاساندى ينتەللەكت مۇمكىندىكتەرىن، اسىرەسە بيۋدجەتتى قالىپتاستىرۋ ىسىندە جان-جاقتى پىسىقتاۋدى جۇكتەدى.
وسىعان وراي قارجى مينيسترلىگىنىڭ وكىلدەرى بۇل باعىتتا اتقارىلىپ جاتقان جۇمىستار تۋرالى مالىمەت بەردى.
- مەملەكەتتىك قارجىنىڭ سيفرلىق كارتاسى مەن بيزنەستىڭ سيفرلىق كارتاسىن پايدالانۋ بيۋدجەت كىرىستەرى مەن شىعىستارىن بولجاۋدى جەتىلدىرۋگە مۇمكىندىك بەرەدى. قارجى مينيسترلىگىنە قاراستى ەلەكتروندىق قارجى ورتالىعىنىڭ ماماندارىنىڭ ايتۋىنشا، زاماناۋي اناليتيكالىق مودەلدەر ءارتۇرلى كوزدەردەن الىنعان دەرەكتەردى بىرىكتىرىپ، وڭىرلەردىڭ قارجىلىق جاعدايىن تەرەڭىرەك باعالاۋعا، بيۋدجەت تۇسىمدەرى مەن شىعىستارىنا اسەر ەتەتىن فاكتورلاردى انىقتاۋعا جانە باسقارۋ شەشىمدەرىن قابىلداۋعا قاجەتتى بولجامدار ازىرلەۋگە كومەكتەسەدى، - دەدى قارجى مينيسترلىگىنە قاراستى ەلەكتروندىق قارجى ورتالىعىنىڭ ماماندارى.
وڭىرلەردىڭ قارجىلىق كورسەتكىشتەرى تالدانادى
ۆەدومستۆو وكىلدەرىنىڭ تۇسىندىرۋىنشە، مەملەكەتتىك قارجىنىڭ سيفرلىق كارتاسى وڭىرلەردىڭ قارجىلىق كورسەتكىشتەرىن ۆيزۋاليزاتسيالاۋعا جانە تالداۋعا مۇمكىندىك بەرەدى. ونىڭ كومەگىمەن اۋماقتار اراسىنداعى ايىرماشىلىقتاردى باعالاپ، قولجەتىمدى كورسەتكىشتەردىڭ وزگەرىسىن باقىلاۋعا بولادى.
كارتوگرافيالىق ۆيزۋاليزاتسيا وڭىرلەردەگى قارجىلىق جاعدايدى جان-جاقتى تالداپ، ءتيىستى شەشىمدەر قابىلداۋعا قاجەتتى اقپاراتتىق نەگىز قالىپتاستىرۋعا ىقپال ەتەدى. وسىلايشا، سيفرلىق كارتا جوسپارلاۋ كەزىندە دەرەكتەردىڭ كورنەكىلىگى مەن قولجەتىمدىلىگىن ارتتىراتىن اناليتيكالىق قۇرال رەتىندە قولدانىلادى.
بيزنەس دەرەكتەرى بيۋدجەت بولجامىن تولىقتىرادى
ەلەكتروندىق قارجى ورتالىعىنىڭ ماماندارى «بيزنەستىڭ سيفرلىق كارتاسى» قارجىلىق تالداۋدى كاسىپكەرلىك قىزمەتكە، بيزنەستىڭ وڭىرلەر بويىنشا ورنالاسۋىنا جانە مەملەكەتتىك قولداۋ شارالارىنا قاتىستى اقپاراتپەن تولىقتىرۋعا ارنالعانىن اتاپ ءوتتى.
- بيزنەستىڭ دەرەكتەرىن وڭىرلىك قارجىلىق كورسەتكىشتەرمەن بىرگە پايدالانۋ بەلگىلى ءبىر اۋماقتىڭ ەكونوميكالىق بەلسەندىلىگىن باعالاۋعا جانە ونىڭ بيۋدجەت تۇسىمدەرىمەن ءوزارا بايلانىسىن زەردەلەۋگە قوسىمشا مۇمكىندىك بەرەدى، - دەپ ءتۇسىندىردى ورتالىق ماماندارى.
جاساندى ينتەللەكت بولجامدى سەناريلەر ازىرلەۋگە كومەكتەسەدى
ەلەكتروندىق قارجى ورتالىعى وكىلدەرىنىڭ ايتۋىنشا، ماشينالىق وقىتۋ ادىستەرىن قولدانۋ تاريحي دەرەكتەردەگى زاڭدىلىقتاردى انىقتاۋعا، ماكروەكونوميكالىق كورسەتكىشتەردىڭ اسەرىن باعالاۋعا جانە بيۋدجەت كىرىسىنىڭ جەكەلەگەن كوزدەرى مەن شىعىستار باعىتتارى بويىنشا بولجامدى سەناريلەر ازىرلەۋگە مۇمكىندىك بەرەدى.
كىرىستەردى بولجاۋ كەزىندە سالىق تۇسىمدەرىنىڭ ديناميكاسى، سونىڭ ىشىندە كورپوراتيۆتىك تابىس سالىعى مەن قوسىلعان قۇن سالىعى، سونداي-اق ماكروەكونوميكالىق فاكتورلاردىڭ سالىق بازاسىنا ىقپالى تالدانۋى مۇمكىن. بۇل تۇسىمدەردىڭ ىقتيمال وزگەرىستەرىن باعالاپ، بيۋدجەتتىڭ اتقارىلۋىنا اسەر ەتۋى مۇمكىن فاكتورلاردى انىقتاۋعا كومەكتەسەدى.
- ال شىعىستاردى بولجاۋ كەزىندە ولاردىڭ بۇرىنعى ديناميكاسى، ماۋسىمدىق وزگەرىستەرى، بيۋدجەت مىندەتتەمەلەرى جانە قارجىلاندىرۋ قاجەتتىلىگىنە ىقپال ەتەتىن باسقا دا فاكتورلار ەسكەرىلەدى. ماشينالىق وقىتۋ مودەلدەرى شىعىستارداعى زاڭدىلىقتاردى زەرتتەپ، مامانداردىڭ كەيىنگى تالداۋىنا ارنالعان بولجامدى باعالاۋلاردى قالىپتاستىرۋعا مۇمكىندىك بەرەدى، - دەدى ورتالىق ماماندارى.
ورتالىق ماماندارىنىڭ پىكىرىنشە، مەملەكەتتىك بيۋدجەت كىرىستەرى مەن شىعىستارىنىڭ بولجامدى مودەلدەرىن ازىرلەۋدە تاريحي دەرەكتەردى، ماكروەكونوميكالىق ينديكاتورلاردى، وڭىرلىك قارجىلىق كورسەتكىشتەردى جانە كاسىپكەرلىك بەلسەندىلىك تۋرالى مالىمەتتەردى كەشەندى پايدالانۋ پەرسپەكتيۆالى باعىتتاردىڭ ءبىرى سانالادى.
- جاساندى ينتەللەكت تەحنولوگيالارى تۇراقتى زاڭدىلىقتاردى انىقتاۋعا، ءتۇرلى فاكتورلاردىڭ اسەرىن باعالاۋعا، بولجامدى ستسەنارييلەردى سالىستىرۋعا جانە ماماندارعا بولجامدى اۋىتقۋلارعا ۋاقتىلى نازار اۋدارۋعا كومەكتەسەدى. سونىمەن قاتار بولجامداردىڭ ساپاسى باستاپقى دەرەكتەردىڭ تولىقتىعى مەن سەنىمدىلىگىنە، ءادىسنامانىڭ دۇرىستىعىنا جانە ناتيجەلەردىڭ ۇنەمى تەكسەرىلۋىنە بايلانىستى، - دەپ تۇيىندەدى ورتالىق قىزمەتكەرلەرى.
دەمەك، اتالعان جوبالاردى دامىتۋ مەملەكەتتىك قارجى جۇيەسىن جان-جاقتى تالداۋعا مۇمكىندىك بەرەدى. جاساندى ينتەللەكت قۇرالدارىن كەزەڭ-كەزەڭىمەن ەنگىزۋ بولجام جاساۋ مۇمكىندىكتەرىن كەڭەيتىپ، اناليتيكالىق قورىتىندىلاردىڭ نەگىزدىلىگىن ارتتىرۋعا جانە مەملەكەتتىك قارجى سالاسىندا ءتيىمدى شەشىمدەر قابىلداۋعا ىقپال ەتەدى.