جاڭاوزەندە سىنىپتاستارى 11-سىنىپ وقۋشىسىن اياماي ۇرىپ، سوققىعا جىققان

اقتاۋ. KAZINFORM - وقيعا كەشكىسىن زارداپ شەككەن بالانىڭ ءۇيىنىڭ جانىندا بولعان. بۇزاقىلار كومەككە كەلگەن وقۋشىنىڭ اكەسىن دە كۇش كورسەتىپ، اياعىن سىندىرعان.

ايتا كەتەيىك، وقۋشىلار جاڭاوزەن قالاسىنداعى «ءبىلىم- يننوۆاتسيا» ليتسەيىندە وقيدى. بۇل وقيعا سىنىپتاستار اراسىنداعى تۇسىنىسپەۋشىلىكتىڭ سالدارى بولۋى مۇمكىن. ويتكەنى، تاياق جەگەن وقۋشى شەتەلدىك جوعارى وقۋ ورنىنا گرانت جەڭىپ العان. 

جاڭاوزەن قالالىق اۋرۋحاناسىنىڭ باس دارىگەرى مارات قايىرعالي ۇلىنىڭ ايتۋىنشا، زارداپ شەككەن اكە مەن بالا قازىر اۋرۋحانادا. جاعدايلارى جاقسى.

ال، پوليتسيا وسى وقيعاعا قاتىستى قىلمىستىق ءىس قوزعادى. بۇزاقىلار انىقتالىپ، اتا-انالارىمەن بىرگە بولىمشەگە جەتكىزىلگەن.

- جانجالدىڭ بارلىق قاتىسۋشىلارى انىقتالدى. قىلمىستىق ءىس قوزعالىپ، قاجەتتى تەرگەۋ ارەكەتتەرى جۇرگىزىلىپ جاتىر. كامەلەتكە تولماعانداردىڭ قۇقىقتارىن قورعاۋ جونىندەگى كوميسسياعا جىبەرۋ ءۇشىن ماتەريالدار دايىندالىپ جاتىر. قۇقىق بۇزۋشىلاردىڭ اتا-انالارىنىڭ نەمەسە زاڭدى وكىلدەرىنىڭ جاۋاپكەرشىلىگى ماسەلەسى قارالاتىن بولادى. بارلىق كىنالىلەر پروفيلاكتيكالىق ەسەپكە الىنادى، - دەيدى ماڭعىستاۋ وبلىستىق پوليتسيا دەپارتامەنتىنىڭ باسپا ءسوز حاتشىسى ايگەرىم يباتۋللايەۆا.

وبلىستىق ءبىلىم باسقارماسىنىڭ حابارلاۋىنشا، زارداپ شەككەن وقۋشىعا پسيحولوگيالىق قولداۋ كورسەتىلىپ جاتىر.

- اتالعان وقيعا 2025 -جىلعى 17-ءساۋىر كۇنى مەكتەپتەن تىس جەردە، جوعارى سىنىپ وقۋشىلارى اراسىندا بولعان. ءبىر وقۋشى اۋرۋحاناعا جەتكىزىلىپ، ءتيىستى ەم شارا قابىلداپ جاتىر. قازىرگى ۋاقىتتا وقۋشىنىڭ جاعدايى قاناعاتتانارلىق، ومىرىنە قاۋىپ ءتونىپ تۇرعان جوق. سونىمەن قاتار وعان جان- جاقتى پسيحولوگيالىق قولداۋ كورسەتىلىپ جاتىر. ليتسەي اكىمشىلىگى وقۋشىلاردىڭ اتا-انالارىمەن ءتۇسىندىرۋ جۇمىستارىن جۇرگىزىپ، پروفيلاكتيكالىق كەڭەس وتكىزىپ، وقۋشىلار مەكتەپشىلىك ەسەپكە الىندى، - دەلىنگەن حابارلامادا.

اۆتور

اياگوز ءىزباساروۆا