جاڭا سالىق كودەكسى: مەملەكەت بيزنەسكە قاتىستى ۇسىنىستىڭ 70 پايىزىن قاناعاتتاندىردى
استانا. KAZINFORM - ەلىمىزدە جاڭا سالىق كودەكسىنىڭ جوباسىنا قاتىستى جۇمىستار بەلسەندى جۇرگىزىلىپ جاتىر.
وسى ورايدا «اتامەكەن» ۇ ك پ باسقارما ءتوراعاسىنىڭ ورىنباسارى تيمۋر جاركەنوۆ Jibek Joly تەلەارناسىنا بەرگەن سۇحباتىندا بيزنەس- قوعامداستىق قانداي يدەيالار مەن ۇسىنىستار بەرەتىنىن ايتتى.
تيمۋر جاركەنوۆتىڭ ايتۋىنشا، ەلىمىزدىڭ بارلىق بيزنەس-قوعامداستىعى بۇل جۇمىسقا بەلسەندى قاتىسادى. كاسىپكەرلەر پالاتاسى مەملەكەتتىك ورگاندارمەن ءوزارا ءىس- قيمىلدى قامتاماسىز ەتۋ ءۇشىن بيزنەس ۇسىنىستارىن شوعىرلاندىرادى. وزگەرتۋلەر شاعىن جانە ورتا بيزنەستى، ءىرى كاسىپورىنداردى جانە تاۋ-كەن سالاسىن قوسا العاندا ەكونوميكانىڭ بارلىق سالاسىن قامتيدى.
جالپى، كاسىپكەرلەر پالاتاسى بيزنەستەن 400 ۇسىنىس الدى. دەگەنمەن ولاردىڭ كوبى قايتالاناتىنى ەسكەرىلىپ، تەك جارتىسى عانا مەملەكەتتىك ورگاندارعا جىبەرىلدى. قازىرگى ۋاقىتتا ولاردىڭ شامامەن 70 پايىزى جۇمىسقا قابىلداندى جانە قاناعاتتاندىرىلدى.
«مىسالى، ناعىز ۇسىنىستاردىڭ ءبىرى ءۇي جانىنداعى دۇكەندەرگە، اتاپ ايتقاندا الكوگول ونىمدەرىن ساتۋعا قاتىستى بولدى. بۇعان دەيىن ول ءۇشىن ارنايى رۇقسات پەن بەلگىلى ءبىر تولەم تالاپ ەتىلەتىن. مۇنىڭ ۇستىنە ول ءىرى سۋپەرماركەتتەر ءۇشىن دە، شاعىن دۇكەندەر ءۇشىن دە بىردەي ەدى. ۇكپ باستاماسىمەن الداعى ۋاقىتتا بۇل تولەم جويىلادى»، - دەدى تيمۋر جاركەنوۆ.
سونداي-اق، ونىڭ ايتۋىنشا، قازىرگى ۋاقىتتا قۇلدىراپ تۇرعان تاۋ-كەن سالاسىنىڭ ماسەلەلەرى دە تالقىلاندى.
«قازىرگى ۋاقىتتا قازاقستانداعى گەولوگيالىق بارلاۋدىڭ بارلىق پروتسەسىن قايتا باستاۋ ءۇشىن ءىس-شارالار جۇرگىزۋ قاجەت. جالپى العاندا، بارلىق بارلانعان قوردىڭ باسىم ۇلەسى جانە ولاردى ءوندىرۋ مەن وڭدەۋ كەڭەس زامانىنان باستالدى. قازاقستانداعى وسىنداي ىرگەلى سالا ەكونوميكانىڭ لوكوموتيۆى بولىپ قالا بەرۋى ءۇشىن گەولوگيالىق بارلاۋ جۇمىستارىن قولداۋدى كۇشەيتكەن ءجون. وسى جانە باسقا دا ماسەلەلەر جاڭا سالىق كودەكسىن ازىرلەۋ بارىسىندا كوتەرىلدى جانە ولاردىڭ كوپشىلىگى مەملەكەت تاراپىنان وڭ باعا الدى»، - دەپ اتاپ ءوتتى «اتامەكەن» ۇ ك پ ءتوراعاسىنىڭ ورىنباسارى.