— حالىق كەڭەسى - قۇرىلتايعا بالاما مەكەمە ەمەس. كەڭەس مۇشەلەرى قۇرىلتايدىڭ قۇزىرەتىنە كىرەتىن جۇمىسپەن اينالىسپايدى. دەپۋتاتتاردىڭ قىزمەتىنە ارالاسپايدى. زاڭ بويىنشا وسىنداي ارەكەتتەرگە قۇقى جوق. تيىسىنشە، قۇرىلتاي دەپۋتاتتارىنىڭ دا حالىق كەڭەسىنىڭ جۇمىسىنا ارالاسۋعا حاقى جوق، — دەپ اتاپ ءوتتى. مەملەكەت باسشىسى.
پرەزيدەنت ءبارىنىڭ الدىندا تۇرعان باستى ماقسات: ەكى ينستيتۋت تا ءبىر-ءبىرىن تولىقتىرىپ، بىرلەسە قىزمەت ەتۋى ەكەنىن ەسكە سالدى.
سوندىقتان حالىق كەڭەسى مەن قۇرىلتايدىڭ كوميتەتتەرى تىعىز بايلانىستا بولىپ، ۇيلەسىمدى تۇردە جۇمىس ىستەۋى قاجەت.
—- الدىمىزدا تۇرعان ماقسات تا - ءبىر، وتانىمىز دا — ءبىر. سوندىقتان ءبارىمىز ءبىرتۇتاس ەل بولىپ ءبىر جەڭنەن قول، ءبىر جاعادان باس شىعارىپ قازاقستان حالقى ءۇشىن تاباندى قىزمەت ەتۋىمىز كەرەك. زاڭ جوبالارىن ازىرلەۋ بارىسىندا جۇرتشىلىقتىڭ وي-پىكىرىن، تالاپ- تىلەگىن تولىققاندى ەسكەرۋ قاجەت. قۇرىلتاي مەن حالىق كەڭەسى ءارقاشاندا بىرگە بولسا، وسىنداي مۇمكىندىك مىندەتتى تۇردە پايدا بولادى، — دەدى قاسىم-جومارت توقايەۆ.
قازاقستان حالىق كەڭەسىنە ەتنومادەني بىرلەستىكتەردىڭ، ايماقتىق ءماسليحاتتار مەن قوعامدىق كەڭەستەردىڭ، سونداي-اق، قوعامدىق ۇيىمداردىڭ وكىلدەرى كىردى. وسىلايشا مەملەكەت پەن قوعام اراسىنداعى بايلانىستىڭ جاڭا، اۋقىمدى ءارى ءبىرتۇتاس جۇيەسى قالىپتاسىپ وتىر.
قازاقستان حالقى اسسامبلەياسىنىڭ بىرەگەي تاجىريبەسى ەشقاشان تاريح قويناۋىنا كەتپەيدى، كەرىسىنشە، حالىق كەڭەسىنىڭ جۇمىسىندا قولدانىلادى.
— قازاقستان حالقىنىڭ بىرلىگىن نىعايتۋ — وتە ماڭىزدى ماسەلە. سوندىقتان قازاقستان حالىق كەڭەسى ساباقتاستىقتى ساقتاپ، قازاقستان حالقى اسسامبلەياسى مەن ۇلتتىق قۇرىلتايدىڭ ءداستۇرى مەن ۇزدىك تاجىريبەسىن جالعاستىرۋى قاجەت، — دەپ اتاپ ءوتتى پرەزيدەنت.
بۇل رەتتە بۇكىل جۇمىستىڭ ساپاسىن جاڭا ساياسي جانە ۇيىمداستىرۋ دەڭگەيىنە كوتەرۋ قاجەت.
— قابىلدانعان شەشىمدەر مەن جۇرگىزىلىپ جاتقان رەفورمالاردىڭ سالدارى ەتنومادەني بىرلەستىكتەرگە قالاي اسەر ەتەدى دەگەن ورىندى ساۋال، ءتىپتى الاڭداۋشىلىق تۋىنداعانىن بىلەمىن. قازاقستان حالقى اسسامبلەياسى، شىن مانىندە، ءوز جۇمىسىن اياقتادى. ءبىراق بۇل ۇيىم اياسىندا قالىپتاسقان پايدالى ينستيتۋتسيونالدىق ينفراقۇرىلىم كەرەكسىز بولىپ قالادى دەگەندى بىلدىرمەيدى. سىزدەرگە تۋراسىن ايتايىن: قازاقستان حالقى اسسامبلەياسىنىڭ بىرەگەي تاجىريبەسى ەشقاشان تاريح قويناۋىنا كەتپەيدى، كەرىسىنشە، حالىق كەڭەسىنىڭ جۇمىسىندا قولدانىلادى، — دەدى مەملەكەت باسشىسى.
قاسىم-جومارت توقايەۆ جاھاندى تۇراقسىزدىق جايلاپ، دۇربەلەڭگە تولى كەزەڭ كەلگەنىن، الپاۋىت مەملەكەتتەردىڭ اراسىنداعى سەنىمگە سەلكەۋ تۇسكەنىن باسا ايتتى.
وسىنداي جاعدايدا قازاقستانداعى ۋاقىت تەزىنەن وتكەن ەتنوس ارالىق كەلىسىم مەن جالپى ۇلتتىق بىرلىك ۇلگىسى الداعى ۋاقىتتا دا ەلىمىزدىڭ قارقىندى، ورنىقتى دامۋىنا بەرىك نەگىز بولادى.
- ءبىز ەتنومادەني ورتالىقتارعا، تەاترلارعا، بۇقارالىق اقپارات قۇرالدارىنا بارىنشا قولداۋ كورسەتەمىز. بۇل - مەملەكەتتىڭ كونستيتۋتسيالىق مىندەتى، - دەدى ەل پرەزيدەنتى.