شىعىس قازاقستاندا قارجى پيراميدالارى 250 دەن استام ادامدى الداپ، 400 ميلليون تەڭگە پايدا كورگەن
وسكەمەن. KAZINFORM - شىعىس قازاقستان وبلىسىندا 6 قارجى پيراميداسىنىڭ جولى كەسىلدى.
شىعىس قازاقستان وبلىسىندا ازاماتتاردىڭ قارجىلىق قاۋىپسىزدىگىن قورعاۋ ماقساتىندا الاياقتىق سحەمالارعا قارسى كۇرەس كۇشەيتىلىپ جاتىر. بۇل تۋرالى ش ق و پ د كيبەرقىلمىسپەن كۇرەس باسقارماسى باستىعىنىڭ ورىنباسارى، پوليتسيا پودپولكوۆنيگى بەكجان مالعاجداروۆ ءمالىم ەتتى.
- سوڭعى ەكى جىلدا وبلىس اۋماعىندا 6 قارجى پيراميداسىنىڭ جولى كەسىلدى. رەسپۋبليكا اۋماعىندا «Chia Tai-Tianqing Pharmaceutical» جانە «eolus» برەندتەرىمەن جۇمىس ىستەگەن ەكى قۇرىلىمدىق بولىمشەنىڭ باسشىلارى سوتتالدى. تەرگەۋ بارىسىندا ولاردىڭ فارماتسيەۆتيكالىق كومپانيا مەن شەتەلدىك ينۆەستيتسيالىق جوبالارعا قاراجات تارتۋ سىلتاۋىمەن حالىقتان اقشا جيناعانى انىقتالدى. سونىڭ سالدارىنان 250 دەن استام ادام 400 ميلليون تەڭگەدەن استام شىعىنعا باتقان، - دەيدى ول.
سوڭعى ۋاقىتتا ايماقتا ينتەرنەت-الاياقتىق فاكتىلەرى ارتىپ كەلەدى. ەڭ كەڭ تاراعان تۇرلەرىنە فيشينگ، جالعان ينتەرنەت-دۇكەندەر، جارناما پلاتفورمالارىنداعى جالعان حابارلاندىرۋلار، ينتەرنەت ارقىلى بوپسالاۋ جاتادى.
- الاياقتاردىڭ ارەكەتتەرىنە ءتان نەگىزگى بەلگىلەرىنە - ولاردىڭ ءبىرىنشى بولىپ بايلانىسقا شىعۋى، قارجى ماسەلەسىنە ەرەكشە نازار اۋدارۋى، قۇپيا اقپاراتتى تالاپ ەتۋى، ەموتسيالىق قىسىم كورسەتۋى جانە جىلدام شەشىم قابىلداۋعا يتەرمەلەۋى جاتادى. سول ءۇشىن كۇماندى جوبالارعا اقشا سالماي، كومپانيالاردىڭ زاڭدى مارتەبەسىن تەكسەرىپ، جەكە مالىمەتتەردى جاريا ەتپەي جانە كۇدىك تۋىنداعان جاعدايدا بانككە نەمەسە قۇقىق قورعاۋ ورگاندارىنا جۇگىنۋ قاجەت، - دەيدى بەكجان مالعاجداروۆ.
ەسكە سالساق، وسىعان دەيىن قارجى پيراميدالارى مەن زاڭسىز جارناماعا قارسى شارالار كۇشەيتىلگەنى حابارلانعان.