شىعىس قازاقستاندا شەنەۋنىكتەر قانداستارعا ارنالعان قارجىنى جىمقىرۋدىڭ جولىن تاۋىپ العان

وسكەمەن. KAZINFORM – ش ق و پروكۋراتۋراسى بيۋدجەت قاراجاتىن ۇرلاۋ سحەمالارىن انىقتادى.

شىعىس قازاقستان وبلىسىنىڭ پروكۋراتۋراسى ادامداردى ەرىكتى تۇردە قونىس اۋدارۋ قاعيداسىنىڭ ساقتالۋىن تەكسەرۋ بارىسىندا باسقا ەلدەردەن ازاماتتاردى كوشىرۋ ءۇشىن تۇرعىن ءۇي ساتىپ الۋعا بولىنگەن بيۋدجەت قاراجاتىن ۇرلاۋدىڭ قىلمىستىق سحەماسىن انىقتادى.

بۇل قاراجاتتىڭ جالعان ساتىپ الۋ-ساتۋ كەلىسىمدەرى جانە ءۇي ساتۋشىلارمەن ءسوز بايلاسۋ ارقىلى قولما-قول اقشاعا اينالدىرىلىپ، ۇرلانعانى انىقتالدى.

كەيبىر جاعدايلاردا ۇرلىق مانساپ ورتالىقتارىنىڭ لاۋازىمدى تۇلعالارىنىڭ قاتىسۋىمەن جۇزەگە اسقان.

ماسەلەن، 2024 -جىلدىڭ باسىندا موڭعوليادان قونىس اۋدارعان ءۇش وتباسى جالپى سوماسى 18 ميلليون تەڭگە تۇرعىن ءۇي ساتىپ الۋعا كەلىسىمشارت جاساسا، ونىڭ 9 ميلليون تەڭگەسىن قونىس اۋدارۋشىلار كەلىسىمشارتقا قول قويعانعا دەيىن تولەگەن- مىس، ال قالعان سومانى ورتالىق ساتۋشىلاردىڭ ەسەپشوتىنا اۋدارعان.

سودان كەيىن ساتۋشىلار اقشانى قولما- قول اقشاعا اينالدىرىپ، ونى قونىس اۋدارعاندارعا قايتاردى، ولار جەكە قاجەتتىلىكتەرىنە، سونىڭ ىشىندە كولىك ساتىپ الۋعا جۇمسادى.

تاعى ءبىر جاعدايدا قونىس اۋدارۋشى 8 ميلليون تەڭگە سوماسىندا ءۇيدى ساتىپ الۋ- ساتۋ شارتىن جاساسقان، ونىڭ 4 ميلليون تەڭگەسى ەكونوميكالىق ۇتقىرلىق سەرتيفيكاتى ارقىلى تولەنگەن.

سونىمەن بىرگە، ساتىپ الىنعان ءۇي قيراپ، تۇرۋعا جارامسىز ەكەنى، اقشانى زاڭسىز الۋ ماقساتىندا جالعان كەلىسىمشارت جاسالعانى انىقتالدى.

وسى فاكتىلەر بويىنشا وبلىس پروكۋراتۋراسى سوتقا دەيىنگى تەرگەۋ باستادى.

تەرگەۋ مۇددەسى ءۇشىن قاتىسقان تۇلعالار تۋرالى اقپارات جاريالانبايدى.