- تابيعاتتى ايالاۋ، ءوزارا قۇرمەت قاعيداتتارىن، سونداي-اق بارلىق بەلگىلەنگەن نورمالار مەن ەرەجەلەردى ساقتاۋ وتانداستارىمىزدىڭ مىنەز-قۇلقىنىڭ، ءتىپتى ۇلت بولمىسىنىڭ اجىراماس بولىگىنە اينالۋعا ءتيىس. ونىڭ ۇستىنە، قازىر كونستيتۋتسيانىڭ ءوزى وسىعان مىندەتتەيدى، - دەپ اتاپ ءوتتى ق. توقايەۆ پرەزيدەنت ساياباعىندا وتكەن ەكولوگيالىق اكسيادا.
مەملەكەت باسشىسىنىڭ ايتۋىنشا، تازالىق، ءتارتىپ جانە جايلىلىق الەمدە حالىقتىڭ تۇرمىس مادەنيەتى مەن وركەنيەت دەڭگەيىنىڭ، سونداي-اق ادامگەرشىلىك قاسيەتتەرىنىڭ كورىنىسى رەتىندە قاراستىرىلادى.
ەل ىشىندەگى جەتىستىكتەر حالقىمىزدىڭ پاتريوتتىق سەزىمىن وياتادى. ءوز ەلىن ماقتان تۇتىپ، تۋعان جەرگە پايداسىن تيگىزۋگە ۇندەيدى.
- جاقىندا استانا مەن الماتىعا امەريكانىڭ بەلگىلى كونگرەسسمەندەرى كەلدى. ولار كوشەلەردىڭ تازالىعى مەن جيناقىلىعىنا تاڭعالىپ، قالانى باسقارۋ دەڭگەيى مەن ساپاسىنا جوعارى باعا بەردى. الەۋمەتتىك جەلىلەردە ءىرى قالالارىمىزدىڭ كەلبەتىنە ءتانتى بولعان شەتەلدىك قوناقتار مەن تۋريستەردىڭ بەينەجازبالارىن جيى بايقايمىز. كورىكتى قوعامدىق كەڭىستىكتەر، قاۋىپسىزدىك پەن جايلىلىق شەتەلدە قازاقستانعا قاتىستى وڭ پىكىر قالىپتاستىرادى. بۇل، ارينە، قۋانتارلىق جايت. دەگەنمەن ءبىز يميدج ءۇشىن جۇمىس ىستەمەي، ازاماتتارىمىزدىڭ الەۋمەتتىك جاعدايىن جاقسارتۋدى ويلاۋىمىز كەرەك. باستى ماقسات - وسى، - دەپ تۇيىندەدى پرەزيدەنت.
بۇعان دەيىن ق. توقايەۆ ەلىمىزدىڭ ءاربىر ازاماتى بۇگىن دە، ەرتەڭ دە «تازا قازاقستاندا» جايلى ءومىر ءسۇرۋى كەرەكتىگىن ايتقان ەدى.
جىل باسىنان بەرى «تازا قازاقستان» اكسياسىنا 7 ميلليون ادام قاتىسىپ، 130 مىڭ گەكتار جەر تازارتىلعان.
پرەزيدەنت «تازا قازاقستاندى» جاڭا دەڭگەيگە كوتەرىپ، ۇلتتىق تازالىق ستاندارتىن ازىرلەۋدى ۇسىندى.