شەرزات پولات ءىسى: ءىلياسوۆ مىلتىقپەن ۇرۋ سەبەبىن ءتۇسىندىردى

تالدىقورعان. KAZINFORM - شەرزات پولاتتىڭ ولىمىنە بايلانىستى جەتىسۋ وبلىسىنىڭ مامانداندىرىلعان اۋدانارالىق سوتىندا قارالىپ جاتقان قىلمىستىق ءىس اياسىندا سوتتالۋشى نۇرقياس ءىلياسوۆتان جاۋاپ الىندى.

سوتتا ءىلياسوۆ 2024-جىلعى 3-قازاننان 4-قازانعا قاراعان ءتۇنى دوسى راۆيل ساكيەۆپەن بىرگە «ەيفوريا» مەيرامحاناسىندا بولعانىن ايتتى.

ونىڭ ايتۋىنشا، مەيرامحاناعا كەيىننەن دانا مەن ەلميرا، ارتىنان دارحان، ازامات جانە شىڭعىس كەلگەن.

«ءبىز كوڭىل كوتەرىپ وتىرعان ۋاقىتتا نۇربول مەن دۋمان مەيرامحاناعا كەلدى. كەيىن ولار شىعىپ كەتتى، ءبىراق قايدا كەتكەندەرىن بىلمەيمىن. مەيرامحانا جابىلار كەزدە ازامات الدە شىڭعىس «نۇربولدى ۇرىپ كەتىپتى، بارىپ كومەكتەسەيىكشى» دەدى. بارلىعىمىز كولىكپەن «قاماجاي» دۇكەنىنە كەلدىك. وندا ءبىر توپ جاس ءوسپىرىم بولدى. نە بولعانىن ءبىلۋ ءۇشىن جاندارىنا بارىپ: «جىگىتتەر، نە بولىپ قالدى؟ نە سەبەپپەن ۇرىپ قويدىڭدار؟» دەپ سۇرادىم. سول كەزدە شەرزات پولات مەنى ۇرىپ جىبەردى»، - دەدى سوتتالۋشى.

سوت بارىسىندا ءىلياسوۆ وقيعا ورنىندا ەكى رەت مىلتىق اتىلعانىن، سونداي-اق قارجاۋبايدىڭ دۇكەن ىشىنەن پىشاقپەن شىققانىن مالىمدەدى.

ونىڭ سوزىنشە، توبەلەس شامامەن 3-4 مينۋتقا سوزىلعان.

«مەنىڭ ويىمشا، شەرزات دۇكەننىڭ الدىندا پىشاقتالدى. قاشىپ كەتۋىمە بولار ەدى. الايدا مىلتىق وقتاۋلى بولعان سوڭ، ارتىمنان اتىپ جىبەرە مە دەپ قورىقتىم. بۇرىلىپ قاشسام، نۇرقانات مەنى اتار ەدى. سەبەبى ول «اتام، ولتىرەم!» دەپ ايقايلاپ تۇردى. سول ساتتە مىلتىقتى الىپ الۋعا تىرىستىم. مىلتىقتىڭ دۇمىمەن جەلكە تۇسىنان ۇردىم، ءبىراق قاتتى تيمەدى»، - دەدى ءىلياسوۆ.

سوتتالۋشىنىڭ ايتۋىنشا، وقيعادان كەيىن ولار دۇكەننەن شىعىپ، «بياتلون» جاققا بارعان. سول جەردە وقيعانى تالقىلاپ، كەيىن قايتار جولدا تالعار اۋداندىق پوليتسيا قىزمەتكەرلەرى كولىكتى توقتاتىپ، كىسى ءولىمى بويىنشا جەدەل اقپارات العاندارىن حابارلاعان. سودان كەيىن بارلىعىن پوليتسيا بولىمىنە جەتكىزگەن.

ايتا كەتەيىك، وسى ءىس بويىنشا تاعى ءبىر سوتتالۋشى ديدار قالياحمەت دەنساۋلىعىنا بايلانىستى سوت پروتسەسىنە دايىن ەمەس ەكەنىن ايتىپ، كەلەسى وتىرىسقا دايىن بولاتىنىن مالىمدەگەن بولاتىن.

سوتتالۋشى وتىرىك ايعاق بەرگەنىن مويىندادى.

سوتتالۋشى دۋمان ىسقاق وزىنە تاعىلعان ايىپتى مويىندامادى.

العاشقى سوت وتىرىسىندا پروكۋرور وقيعانىڭ تولىق حرونولوگياسىن باياندادى.