شەرزات سوتى: 4-قازان كۇنى بولعان جانجال بەينەجازباسى جاريالاندى
تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.
بۇگىن سوت بارىسىندا قاماجاي دۇكەنىنىڭ ىشكى بەينەكامەرلارى تۇسىرگەن بەينەروليكتەر كورسەتىلدى. ودان كەيىن تالعار تۇرعىنىنىڭ ءوز ۇيىنەن تۇسىرگەن جانجالدىڭ بەينەجازباسى جاريالاندى. وندا سوتتالۋشىلاردىڭ جابىرلەنۋشىلەرگە سوققى جاساپ جاتقانى انىق كورىنەدى.
بەينەجازبا كوپشىلىككە كورسەتىلگەننەن كەيىن ادۆوكات ايىپتالۋشى دارحان اسكەنتايدان وسى جازباداعى ءوز ارەكەتىن ءتۇسىندىرۋدى سۇرادى.
- نۇربول (سوتتالۋشى) نۇرقانات عايىپبايەۆقا بارا جاتقان كەزدە مەن ارتىنان باردىم. ءارى قاراي «قوي» دەپ نۇربولدى الدىم دا، بالالاردى اجىراتتىم. وسى ۋاقىتتا ابزال شىناسىل (سوتتالۋشى) مەنى ەكى رەت ۇرىپ جىبەرەدى. سول جاق ماڭدايىمنان ۇردى، - دەدى دارحان اسكەتاي.
سۋديانىڭ «سەنى نە ءۇشىن ۇردى» دەگەن سۇراعىنا ايىپتالۋشى «شاتاستىرىپ العان شىعار، ول بالالاردى سول كۇنى عانا كوردىم» دەپ جاۋاپ بەردى.
ەسكە سالايىق، سۋديا بلوگەرلەر مەن الەۋمەتتىك جەلى قولدانۋشىلارىنا ەسكەرتۋ جاسادى.
اۆتور
دوسبول اتاجان