شاعىن شارۋاشىلىقتارى بار اۋدانداردا ءونىمدى قابىلدايتىن جانە ساقتايتىن ورتالىقتار قۇرۋ قاجەت - پرەزيدەنت

استانا. KAZINFORM - «اۋىل اماناتى» باعدارلاماسى ءالى دە كەڭەيتە ءتۇسۋ قاجەت. بۇل تۋرالى اۋىل شارۋاشىلىعى ەڭبەككەرلەرىنىڭ Ⅲ فورۋمىندا مەملەكەت باسشىسى قاسىم-جومارت توقايەۆ ايتتى.

فوتو: اقوردا

- تاعى ءبىر ماڭىزدى ماسەلە - اۋىلداعى كاسىپكەرلىكتى دامىتۋ. ەلىمىزدە «اۋىل اماناتى» باعدارلاماسىنا بۇگىنگە دەيىن 150 ميلليارد تەڭگە قارجى ءبولىندى. سونىڭ ارقاسىندا اۋىلداردا 22 مىڭنان استام جۇمىس ورنى اشىلدى. ارينە، بۇل - جاقسى كورسەتكىش. ءبىراق باستى ماسەلە - سول 22 مىڭ جۇمىس ورنى قازىرگى تاڭدا ساقتالدى ما؟ قالاي دەسەك تە، وسى جوبانىڭ اياسىن الدە دە كەڭەيتە ءتۇسۋ قاجەت، - دەدى قاسىم-جومارت توقايەۆ.

مەملەكەت باسشىسى بۇعان دەيىن سيفرلىق ساۋدا الاڭدارىنىڭ جانە بانكتەر مەن لوگيستيكالىق كومپانيالاردىڭ مۇمكىندىكتەرى اۋىل تۇرعىندارى مەن كاسىپكەرلەرى ءۇشىن قولجەتىمدى بولۋى كەرەك دەپ ناقتى ايتقانىن ەسكە سالدى.

- ەندى وسى جۇمىستى ءتيىمدى ۇيىمداستىرىپ، ونىمدەردى تۇتىنۋشىعا جەتكىزۋ جولىن ايقىندايتىن ناقتى كەلىسىمشارتتار جاساۋ كەرەك. جالپى، شاعىن شارۋاشىلىقتارى بار اۋدانداردا ءونىمدى قابىلدايتىن جانە ساقتايتىن ورتالىقتار قۇرۋ قاجەت. مۇنداي ينفراقۇرىلىم بارلىق وندىرۋشىلەرگە بىردەي قولجەتىمدى بولۋعا ءتيىس، - دەدى پرەزيدەنت.