دينارا زاكيەۆا سولتۇستىك قازاقستان تۇرعىنىنىڭ «ۇلىمدى ۇرلاپ كەتتى» دەگەن مالىمدەمەسىنە جاۋاپ بەردى

استانا. KAZINFORM – ق ر بالا قۇقىقتارى جونىندەگى ۋاكىل دينارا زاكيەۆا Instagram جەلىسىندەگى پاراقشاسىندا سولتۇستىك قازاقستاندا ءتۇرلى جاراقاتپەن اۋرۋحاناعا تۇسكەن ءتورت جاسار بالاعا قاتىستى جاڭا مالىمەت جاريالادى.

دينارا زاكيەۆانىڭ ايتۋىنشا، 23-قىركۇيەكتە پەتروپاۆل تۇرعىنىنىڭ ءتورت جاسار بالاسى (كەنجە ۇلى) «وڭ جاق بىلەكتىڭ ەكى سۇيەگىنىڭ جابىق سىنۋى، كەۋدە، ارقا، جامباس جانە تىزە بۋىندارىنىڭ، جىنىس مۇشەسىنىڭ كوگەرۋى» دياگنوزىمەن اۋرۋحاناعا تۇسكەن. اناسىنىڭ ايتۋىنشا، بالا باسپالداقتان قۇلاعان. الايدا دارىگەرلەر بۇل جاراقات تەك قۇلاعاننان بولۋى مۇمكىن ەمەسىن ايتقان.

وسى وقيعا بويىنشا قىلمىستىق كودەكستىڭ 107-بابى 8-تارماعى بويىنشا (كامەلەتكە تولماعان بالاعا قاتىستى دەنساۋلىققا قاساقانا ورتاشا اۋىرلىقتاعى زيان كەلتىرۋ) قىلمىستىق ءىس قوزعالدى.

دينارا زاكيەۆا ايەلدىڭ ۇلكەن ۇلى بالالاردى قولداۋ ورتالىعىنا ورنالاستىرىلعانىن اتاپ ءوتتى. ال اناسى كەنجە ۇلىن ەرتىپ، اۋرۋحانادان قاشىپ كەتكەن. بىرنەشە كۇننەن كەيىن تابىلىپ، بالا قايتادان اۋرۋحاناعا جاتقىزىلعان.

«تەرگەۋ بارىسىندا اناسى پوليسيا دەپارتامەنتىنىڭ قاۋلىسىمەن بالانىڭ مۇددەسىن قورعاۋدان شەتتەتىلدى»، - دەدى دينارا زاكيەۆا.

بالا قۇقىقتارى جونىندەگى ۋاكىل دەنەسى كوگەرگەن بالانىڭ سۋرەتىن جاريالاپ، ونىڭ ساۋ جەرى قالماعانىن جازدى.

ايتا كەتەيىك، الەۋمەتتىك جەلىدە پەتروپاۆل تۇرعىنى بەينەجازبا جاريالاپ، كەنجە ۇلىمەن اۋرۋحانادا جاتقاندا، قامقورشىلىق ورگاندارى ۇلكەن بالاسىن ۇرلاپ كەتكەنىن ايتقان. ايەلدىڭ ايتۋىنشا، ونىڭ كەنجە ۇلى باسپالداقتان قۇلاپ، جاراقات العان.

ءبىراق پوليتسەيلەر دەنساۋلىققا قاساقانا زيان كەلتىرۋ دەرەگى بويىنشا قىلمىستىق ءىس قوزعاعانىن ايتتى. قامقورشىلىق ورگاندارى ايەلدىڭ ايىپتاۋىنا جاۋاپ بەرىپ، بالانىڭ ۇلكەنى اتا-اناسىنىڭ قاراۋىنسىز قالعاندىقتان ارنايى ورتالىققا ورنالاستىرعانىن اتاپ ءوتتى.