دەپۋتاتتار قوقىس وڭدەۋ نارىعىنا قىتاي ينۆەستورلارى زاڭسىز جولمەن كىرمەكشى دەپ الاڭداپ وتىر

استانا. KAZINFORM - ءماجىلىس دەپۋتاتى ەرلان بارلىبايەۆ ماجىلىستە ءوتىپ جاتقان دوڭگەلەك ۇستەلدە قىتاي ينۆەستورلارى مەن بىرنەشە قالا اكىمدىگى تىكەلەي كەلىسىمشارت جاساۋ ارقىلى ەكولوگيا كودەكسىنىڭ تالاپتارىن بۇزۋى مۇمكىن ەكەنىن ءمالىم ەتتى.

- قالدىقتاردى قايتا وڭدەۋدىڭ ەنەرگەتيكالىق ءتاريفىن قاشان بەكىتەسىزدەر؟ شەكتى تاريف قانشا بولادى؟ اۋكسيون قاشان جاريالايسىزدار؟ جۋىقتا عانا الماتى جانە باسقا قالالاردا ونداي زاۋىتتاردى قىتاي تارابىمەن تىكەلەي كەلىسىمشارت ارقىلى سالۋدى جوسپارلاپ وتىرعاندارىڭىز تۋرالى ب ا ق- تا اقپارات شىقتى. بۇل ءبىرىنشى كەزەكتە ەكولوگيا كودەكسىن بۇزىپ تۇر عوي؟ ەگەر ۇكىمەتتىڭ ءوزى ورىندامايتىن بولسا، ءبىز مىنا جاقتا زاڭداردى نە ءۇشىن جازىپ جاتىرمىز؟ بۇل جەردە سىبايلاس جەمقورلىق قۇرامى بار دەپ ويلامايسىز با، - دەپ سۇرادى دەپۋتات.

ەكولوگيا جانە تابيعي رەسۋرستار ءمينيسترىنىڭ ورىنباسارى جومارت اليەۆ ازىرگە ەشبىر ينۆەستورمەن تىكەلەي كەلىسىمشارت جاسالماعانىمەن، كەلەشەكتە سونداي باستامالار ىسكە اسۋى مۇمكىن ەكەنىن جوققا شىعارمادى.

- قالدىقتاردى ورتەۋ ارقىلى كادەگە جاراتۋدىڭ شەكتى ەنەرگەتيكالىق ءتاريفى 1 كۆت/ساعاتقا 130,3 تەڭگە بولىپ بەكىتىلگەن. بۇگىنگى تاڭدا اۋكسيوندار وتكىزۋدىڭ قولدانىستاعى تارتىبىندە قوقىستى ورتەۋ ارقىلى ەنەرگيا الۋ باعىتى بويىنشا مەحانيزم جوق. اۋكسيوندى باستاۋعا زاڭ تۇرعىسىنان ەشقانداي كەدەرگى جوق. الماتى جانە ءبىرقاتار ءىرى قالادا قىتاي ينۆەستورلارىنان قوقىس ورتەيتىن زاۋىت سالۋ بويىنشا ۇسىنىستار تۇسكەنىن دۇرىس ايتىپ وتىرسىز. بۇل ۇكىمەت دەڭگەيىندە قارالىپ جاتقان ماسەلە. بۇگىنگى تاڭدا قاندايدا ءبىر ينۆەستورمەن ەشبىر تىكەلەي كەلىسىمشارت جاسالعان جوق. ءبىراق ۇكىمەت وسىنداي نورما ەنگىزۋدى قاراستىرىپ جاتىر، - دەدى ول.

دەپۋتاتتار مۇنىڭ ەكولوگيا كودەكسىنىڭ تالاپتارىنا قايشى ەكەنىن قايتا ەسكە سالدى.

- نەگە ونداي نورماعا بارىپ جاتىرمىز؟ شىنىمەن دە بىزدە ينۆەستور اۋكسيون كونكۋرسى ارقىلى انىقتالۋ كەرەك. ءبىراق قازاق قازاقستاندا ونداي جۇمىس جۇرگىزۋ تاجىريبەسى جوق. قوقىستى زاۋىتتا ورتەۋ تاجىريبەسى جوق. ەكولوگيا جانە تابيعي رەسۋرستار مينيسترلىگىندە بۇل ماسەلەلەردى تولىق باعالاۋعا ءبىلىم- بىلىگى جەتەتىن مامان جوق، - دەدى ۆيتسە مينيستر.

بۇل جاۋاپقا كوڭىلدەرى كونشىمەگەن دەپۋتاتتار ۇكىمەتكە رەسمي ساۋال جولدايتىن بولىپ ۋاعدالاستى.

ەسكە سالساق، جۋىقتا عانا جەتىسۋ وبلىسىندا پروكۋرورلار زاڭسىز قوقىس وڭدەيتىن زاۋىت سالماق بولعان كاسىپكەردەن 2 گەكتار جەردى مەملەكەتكە قايتارعان بولاتىن.