عىلىم وكىلدەرىنىڭ حالىقارالىق شيەلەنىستەردىڭ ازايۋىنا قوساتىن ۇلەسى وتە ماڭىزدى - پرەزيدەنت

استانا. KAZINFORM - قازىرگى بۇلىڭعىر زاماندا الەمدىك ۋنيۆەرسيتەتتەر قاۋىمداستىعى وزدەرىنىڭ سالماقتى پىكىرلەرى مەن ۇستانىمدارىن ايتۋى كەرەك.

Фото: Ақорда

بۇل تۋرالى III ستراتەگيالىق سەرىكتەستەر فورۋمىندا مەملەكەت باسشىسى قاسىم- جومارت توقايەۆ ايتتى.

- بۇگىن شىن مانىندە وتە ماڭىزدى جيىن ءوتىپ جاتىر. ءۇشىنشى ستراتەگيالىق سەرىكتەستەر فورۋمىنا جاھاندىق عىلىم جۇيەسىنىڭ كورنەكتى وكىلدەرى، الەمگە ايگىلى عالىمدار مەن ءبىلىم سالاسىنىڭ بىلىكتى ماماندارى جانە ساراپشىلار قاتىسىپ وتىر. وسى القالى جيىندا حالىقارالىق عىلىمي ىقپالداستىق ماسەلەسى جان-جاقتى تالقىلانىپ جاتىر. بۇل - وتە وزەكتى تاقىرىپ. سەبەبى قازىرگى تۇراقسىز، بۇلىڭعىر زاماندا الەمدىك ۋنيۆەرسيتەتتەر قاۋىمداستىعى وزدەرىنىڭ سالماقتى پىكىرلەرى مەن ۇستانىمدارىن ايتۋى كەرەك، مىندەتتى تۇردە ايتۋى كەرەك،-دەدى پرەزيدەنت.

مەملەكەت باسشىسىنىڭ پايىمىنشا، عىلىم وكىلدەرىنىڭ حالىقارالىق شيەلەنىستەردىڭ ازايۋىنا قوساتىن ۇلەسى وتە ماڭىزدى.

- وسىعان وراي بۇگىن عىلىمنىڭ دامۋ جولىنا جانە باسقا دا وزەكتى ماسەلەلەرگە قاتىستى قۇندى پىكىرلەر، ءتيىمدى ۇسىنىستار ايتىلىپ جاتىر. مۇنىڭ ءبارى دە وتاندىق جانە شەتەلدىك جوعارى ءبىلىم سالاسىنىڭ الەۋەتىن نىعايتۋعا سەپتىگىن تيگىزەرى ءسوزسىز. جاپپاي سيفرلاندىرۋ جانە جاساندى ينتەللەكت داۋىرىندە عىلىم- ءبىلىمنىڭ الەم وركەنيەتىندەگى ورنى ايرىقشا. عىلىم - بارشا ادامزاتقا ورتاق يگىلىك. ءبىز ەلدەرىمىزدىڭ جارقىن بولاشاعى مەن ازاماتتارىمىزدىڭ ساپالى تۇرمىسىن قامتاماسىز ەتۋ ءۇشىن الەم قاۋىمداستىعى بولىپ عىلىم-بىلىمدەگى ءار جەتىستىگىمىزدى سانالى تۇردە كادەگە جاراتۋىمىز كەرەك. ستراتەگيالىق سەرىكتەستەر فورۋمىنىڭ نەگىزگى ماقسات-مىندەتى دە وسى دەپ كۇمانسىز ايتۋعا بولادى،-دەدى قاسىم-جومارت توقايەۆ.