ءۇندىستانداعى ۇشاق اپاتى: 11-ورنىندا وتىرعان ءبىر جولاۋشى ءتىرى قالعان
نيۋ-دەلي. KAZINFORM -ءۇندىستاننىڭ احمەداباد قالاسىنداعى ۇشاق اپاتىندا 11A ورنىندا وتىرعان ءبىر ادام ءتىرى قالعانىن باس پوليتسەي حابارلادى، دەپ جازدى Timesofindia سايتى.
- پوليتسيا ءتىرى قالعان ادامدى تاپتى. قازىر ول اۋرۋحانادا ەم قابىلداپ جاتىر. قانشا ادامنىڭ قازا تاپقانى تۋرالى ناقتى ايتۋ مۇمكىن ەمەس. ويتكەنى ۇشاق تۇرعىن ءۇي اۋماعىنا قۇلاعاندىقتان، قۇرباندار سانى ءالى دە ارتۋى مۇمكىن، - دەپ حابارلادى احمەداباد قالاسىنىڭ پوليتسيا كوميسسارى گ. س. ماليك ANI جاڭالىقتار اگەنتتىگىنە بەرگەن مالىمدەمەسىندە.
ۇشاق بورتىندا 230 جولاۋشى مەن 12 ەكيپاج مۇشەسى - بارلىعى 242 ادام بولعان. ۇشاق مەگحاني اۋدانىندا قۇلاپ، جانارماي مولشەرىنىڭ كوپتىگىنە بايلانىستى جويقىن ءورت شىقتى.
قۇتقارۋ جۇمىستارىنا التى NDRF (ۇلتتىق اپاتتىق ارەكەت ەتۋ كۇشى) توبى، ءورت ءسوندىرۋ كولىكتەرى، جەدەل جاردەم جانە پوليتسيا بولىمشەلەرى جۇمىلدىرىلدى.
ۇشاقپەن بايلانىس ۇزىلەر الدىندا MAYDAY (دابىل سيگنالى) بەرىلگەن.
وسى ۋاقىتتا ءۇندىستان پرەمەر-ءمينيسترى نارەندرا مودي احمەدابادتاعى ۇشاق اپاتىنا بايلانىستى كوڭىل ايتتى. ول بۇل وقيعانى «سوزبەن ايتىپ جەتكىزۋ مۇمكىن ەمەس قايعىلى جاعداي» دەپ اتادى.
- احمەدابادتاعى قايعىلى وقيعا ءبارىمىزدى ەسەڭگىرەتىپ، جۇرەگىمىزگە قاياۋ سالدى. مۇنى سوزبەن ايتىپ جەتكىزۋ مۇمكىن ەمەس اۋىر تراگەديا. قازىر مينيسترلەرمەن جانە ءتيىستى ورگاندارمەن بايلانىستامىن، ولار زارداپ شەككەندەرگە كومەك كورسەتۋ ءۇشىن جۇمىس ىستەپ جاتىر، - دەپ جازدى پرەمەر-مينيستر مودي X جەلىسىندەگى جازباسىندا.
Timesofindia سايتى Air India ۇشاعىنىڭ اپاتقا ۇشىرۋىنا بايلانىستى، ۇلى بريتانيا كورولى 3-چارلز احمەدابادتاعى ۇشاق اپاتىنا بايلانىستى كوڭىل ايتقانىن جازدى.
ۇلى بريتانيا كورولى 3-چارلز جانە ونىڭ جۇبايى، كوروليەۆا كاميللا، «بۇگىن تاڭەرتەڭ احمەدابادتا بولعان قايعىلى وقيعاعا قاتتى ەسەڭگىرەپ، كۇيزەلگەندەرىن» جەتكىزدى.
بۋكينگەم سارايى تاراتقان مالىمدەمەدە:
- ءبىز وسى اۋىر ءارى تراگەديالىق جاعدايدان زارداپ شەككەن بارلىق ەلدەردىڭ ازاماتتارىنا، ولاردىڭ وتباسىلارى مەن جاقىندارىنا شىن جۇرەكتەن تىلەكتەستىگىمىزدى بىلدىرەمىز. ولار قازىر سۇيىكتى جاندارىنان حابار كۇتىپ وتىر، - دەلىنگەن.
76 جاستاعى مونارح سونداي-اق:
- وسىنداي قيىن ساتتە كومەك كورسەتىپ جاتقان جەدەل قىزمەت وكىلدەرىنە جانە بارلىق ەرىكتىلەرگە ەرەكشە العىس بىلدىرەمىن، - دەپ اتاپ ءوتتى.
بۇعان دەيىن نەگىزى Air India اپاتى: 242 جولاۋشىنىڭ ءبارى قازا تاپقانى حابارلانعان ەدى.
گۋدجارات شتاتىنىڭ دەنساۋلىق ساقتاۋ جانە الەۋمەتتىك قامسىزداندىرۋ دەپارتامەنتىنىڭ ورىنباسارى دحاناندجاي دۆيۆەدي كەيبىر جاراقات العانداردىڭ جاعدايى اۋىر، ءبىراق تۇراقتى ەكەنىن ايتتى.
ءۇندىستاننىڭ باتىسىندا Air India اۋەكومپانياسىنىڭ ۇشاعى قۇلاپ، جەردەگى 50-گە جۋىق ادام جاراقات الدى. بۇل تۋرالى جۋرناليستەرگە گۋدجارات شتاتىنىڭ دەنساۋلىق ساقتاۋ جانە الەۋمەتتىك قامسىزداندىرۋ دەپارتامەنتىنىڭ ورىنباسارى دحاناندجاي دۆيۆەدي حابارلادى.
ونىڭ ايتۋىنشا، ۇشاق قۇلاعان اۋماقتا مەديتسينالىق كوللەدجدىڭ جاتاقحاناسى مەن شتاتتىق اۋرۋحانا قىزمەتكەرلەرىنىڭ جاتىن ورنى، وزگە دە عيماراتتار بار.
- وسى اۋماقتا بولعاندار جاراقات الدى. شامامەن 50 زارداپ شەككەن احمەداباد اۋرۋحانالارىنا جەتكىزىلدى، - دەدى ول.