ماس كۇيىندە كولىك جۇرگىزگەندەر ءۇشىن جازا قاتاڭ

استانا. قازاقپارات - جاپونيادا سپيرتتىك ىشىمدىك ءىشىپ كولىك جۇرگىزگەندەرگە عانا ەمەس، ونى بىلە تۇرا، ءۇنسىز قالعاندارعا دا قاتاڭ جازا قولدانىلادى. سونىڭ ناتيجەسىندە وسىنداي جۇرگىزۋشىلەردىڭ كىناسىنەن بولاتىن جول اپاتتارى ازايعان.

جاپونيادا ماس كۇيىندە رولگە وتىرعاندار ءۇشىن جازا قاتاڭ. ەرەجە بۇزعاندارعا ءىرى كولەمدەگى ايىپپۇل قاراستىرىلعان. بۇدان بولەك، وقۋدان نە جۇمىستان شىعىپ كەتۋى دە عاجاپ ەمەس. 6 ايدان 5 جىلعا دەيىن باس بوستاندىعىنان ايىرىلۋى مۇمكىن. ءبىر ايتا كەتەرلىگى، مۇندا ماس جۇرگىزۋشىنى توقتاتپاي، جانىندا وتىرعان جولاۋشىدار دا جازاعا تارتىلادى. ال رولگە وتىراتىنىن بىلسە، بارمەندەرگە جۇرگىزۋشىگە ىشىمدىك ساتۋعا تىيىم سالىنادى. ءتيىستى تالاپتى ەلەمەگەندەر ليتسەنزياسىنىن ايىرىلۋى مۇمكىن.

وسىنداي قاتاڭ شارالاردىڭ ناتيجەسىندە كۇنشىعىس ەلىندە جول-كولىك اپاتىنا بايلانىستى كىسى ءولىمى بىرنەشە جىل قاتارىنان ازايىپ كەلەدى. 2022 -جىلى 100 مىڭ تۇرعىنعا شاققاندا 2,08 قايعىلى وقيعادان كەلگەن. بۇل - الەمدەگى ەڭ تومەن كورسەتكىشتىڭ ءبىرى.

ال فينليانديادا جول ەرەجەسىن بۇزعاندار ءۇشىن ايىپپۇل مولشەرى وقيعانىڭ اۋىرلىعىنا عانا ەمەس، رولدە وتىرعان ادامنىڭ تابىسىنا قاراي بەلگىلەنەدى. تيىسىنشە اۋقاتتى ادامدار ەرەجە بۇزسا، مەملەكەتتىك قازىناعا وزگە جۇرگىزۋشىلەردەن كوپ اقشا تولەيدى. مىسالى، 2004 -جىلى ەلدەگى ءىرى كاسىپكەردىڭ ۇلى كولىكپەن حەلسينكي ورتالىعىندا ساعاتىنا 80 شاقىرىم جىلدامدىقپەن ءجۇرىپ ءوتىپ، مەجەنى ەكى ەسە اسىرعانى ءۇشىن 170 مىڭ ەۋرو ايىپپۇل ارقالاعان.

سينگاپۋر ماس كۇيىندە كولىك تىزگىندەگەندەر ءۇشىن ءىرى كولەمدەگى جازا قاراستىرىلعان ەلدەردىڭ قاتارىنا جاتادى. مۇندا العاش رەت ەرەجە بۇزعان جۇرگىزۋشى 10 مىڭ دوللارعا دەيىن ارقالاپ، ءبىر جىلعا دەيىن باس بوستاندىعىنان ايىرىلۋى ىقتيمال. بۇل ەكى جازا قاتار قولدانىلاتىن كەزدەر دە بولادى. بۇدان بولەك، كەمى ەكى جىلعا كولىك جۇرگىزۋ قۇقىعىنان ايىرىلادى. رولگە ماس كۇيىندە ەكىنشى رەت وتىرسا، وندا جۇرگىزۋشى مىندەتتى تۇردە تۇرمەگە قامالادى. ال ايىپپۇل مولشەرى 20 مىڭ دوللارعا دەيىن جەتۋى مۇمكىن.

اۆتورى: جۇلدىز اتاگەلديەۆا.

24.kz