- قازاقستان - شىن مانىندە الەۋمەتتىك مەملەكەت. ول قۇر ءسوز ەمەس. ماسەلە الەۋمەتتىك قامسىزداندىرۋعا جۇمسالاتىن وراسان زور قارجى كولەمىندە دە ەمەس. ايتسە دە بۇل تاقىرىپتى قوزعاۋعا تۋرا كەلەدى، - دەدى قاسىم-جومارت توقايەۆ پرەزيدەنت ساياباعىندا وتكەن «تازا قازاقستان» ەكولوگيالىق اكسياسىندا.
ونىڭ ايتۋىنشا، مەملەكەت ءوزىنىڭ الەۋمەتتىك مىندەتتەمەلەرىنەن ەشقاشان باس تارتپايدى. ويتكەنى بۇل مىندەت كونستيتۋتسيامىزدا انىق ءارى تۋرا جازىلعان.
- اتا زاڭنىڭ ماتىنىندە «قازاقستان رەسپۋبليكاسىنىڭ ازاماتتارى زاڭدا بەلگىلەنگەن مەديتسينالىق كومەكتى اقى تولەمەي الۋعا قۇقىلى» دەگەن ارنايى باپ بار. ياعني مەملەكەت كەپىلدەندىرىلگەن كولەمدە تەگىن مەديتسينالىق كومەك بەرەدى. ءبىر ءسات تيك-توكتان باس كوتەرىپ، مۇنداي مىندەتتەمە تاعى قانداي ەلدىڭ كونستيتۋتسياسىندا بار ەكەنىن قاراپ كورىڭىزدەر، - دەدى پرەزيدەنت.
قازاقستاندا عانا بيۋدجەتتەن تولەنەتىن مەديتسينالىق كومەك مەملەكەتىمىزدىڭ ءار ازاماتىنا، تەك ءوز حالقىمىزعا عانا ەمەس، شەتەلدەن كەلگەن ءاربىر قانداسقا، ءتىپتى ەلىمىزدە تۇرۋعا رۇقساتى بار شەتەلدىك ازاماتتاردىڭ كەيبىر ساناتىنا دا ۇسىنىلادى.
- باسىڭىز اۋىرىپ، بالتىرىڭىز سىزداسا، سىزگە جاي عانا اسپيرين بەرە سالمايدى، ۋچاسكەلىك دارىگەر قابىلداپ، تەكسەرەدى، دياگنوز قويادى. دەنساۋلىعىڭىزعا قاۋىپ تونگەن جاعدايدا جەدەل كومەك كورسەتىلەدى. ديابەت، ونكولوگيا، تۋبەركۋلەز جانە باسقا دا كەڭ تارالعان سىرقات تۇرلەرىنە ەم-دوم جاسالادى. ناۋقاستارعا ءدارى-دارمەك تەگىن بەرىلەدى، جەدەل جاردەممەن، ءتىپتى سانيتاريالىق اۆياتسيامەن قامتاماسىز ەتىلەدى، - دەدى ق. توقايەۆ.
بۇعان دەيىن پرەزيدەنت ەل ىشىندەگى جولداردىڭ ساپاسىنا شۇيلىگىپ، سابوتاجعا تەڭەگەن ەدى.
قازاقستاننىڭ ءىرى قالالارىنداعى تازالىق، قاۋىپسىزدىك جانە جايلى قوعامدىق كەڭىستىكتەر شەتەلدىك قوناقتاردىڭ دا نازارىن اۋدارىپ وتىر.
سونداي-اق استانالىق ۋربانيستيكا ورتالىعىنىڭ تاجىريبەسىن وڭىرلەرگە تاراتۋ قاجەت.