مەملەكەت باسشىسى قوعامدا وقۋ-اعارتۋ سالاسىنداعى رەفورمالارعا قاتىستى تۇيتكىلدەر كوپ تالقىلانىپ جۇرگەنىن اتاپ ءوتتى.
- ءار وزگەرىس مۇعالىمنىڭ جۇمىسىن جەڭىلدەتۋگە، ونىڭ قىزمەتىندەگى ارتىق جۇكتەمەنى ازايتۋعا باعىتتالۋى كەرەك. ءىس جۇزىندە بۇل مىندەت تولىق ورىندالماي جاتقانى جاسىرىن ەمەس. بۇرىن قاعازباستىلىق كوپ ەدى. ەندى ونىڭ ورنىن ءتۇرلى پلاتفورمالارعا، سيفرلىق جۇيەلەرگە ەنگىزىلۋگە ءتيىس ەسەپتەر باسىپ وتىر. ۇستازدىڭ نەگىزگى ميسسياسى - بالاعا ساپالى ءبىلىم بەرۋ، ياعني ساۋاتتى، سانالى ۇرپاق تاربيەلەۋ. بۇل مىندەتتەردى ورىنداۋعا كەدەرگى كەلتىرەتىن باسى ارتىق جۇمىستى دوعارۋ كەرەك. ءبىز مۇعالىمدەردىڭ ابىروي-بەدەلىن قورعاۋىمىز قاجەت. سوڭعى ۋاقىتتا مەكتەپتەردە وقۋشىلار ۇستازدارىنا دورەكى سويلەپ، ءتىپتى، كۇش قولداناتىن جاعدايلار دا از ەمەس. مۇنداي كەزدە كوبىنەسە مەكتەپ اكىمشىلىگى دە مۇعالىمگە قىسىم كورسەتىپ جاتادى. بۇل - دۇرىس ەمەس، - دەدى ول.
پرەزيدەنتتىڭ سوزىنشە، ءار ماسەلە مۇقيات ءارى جان-جاقتى قارالۋعا ءتيىس. كەز كەلگەن جاعدايعا وتباسى دا، وقۋشى دا، ۇستاز دا، مەكتەپ تە - ءبارى دە بىردەي جاۋاپكەرشىلىكپەن قاراۋى كەرەك. ال وقۋ-اعارتۋ مينيسترلىگى بۇل جۇمىستى ءجىتى نازاردا ۇستاۋى قاجەت.
ينكليۋزيۆتى ءبىلىم الۋعا ءتيىس 237 مىڭ بالا بار
قازاقستاندا ينكليۋزيۆتى ءبىلىم الۋعا ءتيىس 237 مىڭنان استام بالا بار. پرەزيدەنت قاسىم-جومارت توقايەۆ ۇكىمەت پەن اكىمدەرگە ەرەكشە ءبىلىم بەرۋ قاجەتتىلىگى بار بالالارعا ارنالعان ينفراقۇرىلىمدى دامىتۋدى تاپسىردى.
پرەزيدەنتتىڭ ايتۋىنشا، سوڭعى جىلدارى ەرەكشە ءبىلىم بەرۋ قاجەتتىلىكتەرى بار بالالاردىڭ سانى ارتىپ كەلەدى. سوندىقتان بۇل ماسەلەگە ايرىقشا نازار اۋدارۋ قاجەت.
- ۇكىمەت اكىمدەرمەن بىرلەسىپ، وسى سالاعا قاتىستى ينفراقۇرىلىمدى دامىتۋعا ءتيىس. اۋقىمدى قۇرىلىستى جۇرگىزۋ كەزىندە بۇل باعىت نازاردان تىس قالماۋى قاجەت، - دەدى قاسىم-جومارت توقايەۆ حالىققا ارنالعان جولداۋىندا.
مەملەكەت باسشىسى مامان تاپشىلىعىن ازايتۋ جانە بالالاردىڭ دامۋ ەرەكشەلىكتەرىنە قاتىستى دياگنوزداردى ەرتە جاستان انىقتاۋ جۇمىسىن جۇيەلى تۇردە جۇرگىزۋ كەرەگىن اتاپ ءوتتى.
سونىمەن بىرگە، پرەزيدەنت بۇل باعىتتاعى جۇمىستارعا «قازاقستان حالقىنا» قورى بەلسەندى اتسالىسۋى كەرەكتىگىن ايتتى.