ول قازاقستاندا سيفرلىق ترانسفورماتسيانىڭ قۇقىقتىق نەگىزى قالانعانىن، «جاساندى ينتەللەكت تۋرالى» زاڭ مەن سيفرلىق كودەكس قابىلدانعانىن ەسكە سالدى. پرەزيدەنتتىڭ ايتۋىنشا، بۇل ارادا مۇقيات ويلاستىرىلعان ينستيتۋتسيونالدىق تەڭگەرىم مەن تاۋەكەلگە نەگىزدەلگەن ءتاسىل قاجەت.
- اتالعان سالانى شامادان تىس رەتتەۋگە بولمايدى. ويتكەنى الەۋەتى زور كوماندالار مەن ازىرلەمەلەر جانە كاپيتال باسقا يۋريسديكتسيالارعا كەتىپ قالۋى ىقتيمال. سوندىقتان قاراپايىم قاعيدانى ۇستانعان ءجون: ازاماتتاردىڭ قاۋىپسىزدىگى، قۇقىقتارى مەن اسا ماڭىزدى مۇددەلەرى سىنعا تۇسكەن جاعدايدا، تالاپتار قاتاڭ بولۋعا ءتيىس، الايدا شەكتەن شىقپاعان دۇرىس، - دەدى قاسىم-جومارت توقايەۆ.
مەملەكەت باسشىسى ادام كاپيتالىنا ايرىقشا ءمان بەردى. پرەزيدەنتتىڭ پىكىرىنشە، زاماناۋي دەرەكتەر ورتالىعى، وزىق تەحنولوگيالار وزدىگىنەن ەشقانداي ناتيجەگە كەپىل بولا المايدى. عالىمدار، ينجەنەرلەر، كاسىپكەرلەر بولماسا، تەحنولوگيالىق سەرپىلىس جاساۋ مۇمكىن ەمەس.
- سوندىقتان ءبىز ءبىلىمدى، بىلىكتى، جاسامپاز ماماندار دايارلايتىن ۇلتتىق عىلىمي- ينجەنەرلىك مەكتەپ قالىپتاستىرۋىمىز كەرەك. وسى ورايدا، جاڭادان اشىلعان Qazaq AI Research University-گە ايرىقشا مىندەت جۇكتەلەدى. بۇل وقۋ ورنى ءبىلىم بەرۋمەن قاتار، ءوندىرىس پەن ەكونوميكانىڭ سۇرانىسىنا ساي عىلىمي زەرتتەۋلەر جۇرگىزۋگە ءتيىس. وسى ماقساتپەن جاساندى ينتەللەكتىنى ناقتى سالالاردا قولدانۋعا ارنالعان AI X مودەلى قولعا الىنىپ وتىر. ونىڭ مۇمكىندىگىن ءوندىرىس، ەنەرگەتيكا، مەديتسينا، قارجى، مەملەكەتتىك باسقارۋ جۇيەسىندە ءتيىمدى پايدالانۋ كەرەك. جالپى، بىزگە دايىن ءونىم مەن جاڭا تەحنولوگيا جاساي الاتىن مىقتى، ياعني ناعىز بىلىكتى ماماندار قاجەت. وسى تۇستا ەسكەرەتىن ماڭىزدى ماسەلە بار. جاساندى ينتەللەكت ادامنىڭ ينتەللەكتۋالدىق قابىلەتىن الماستىراتىن قۇرال ەمەس، وقۋ جانە ءبىلىم الۋ ۇدەرىسىنە كومەكشى ءتاسىل بولعانى ءجون. تەحنولوگيا قارقىندى تۇردە دامىعان سايىن، ءبىلىم الۋ، سىني ويلاۋ، شەشىم قابىلداۋ جانە جاۋاپكەرشىلىكتى سەزىنۋ قاسيەتتەرى اسا وزەكتى بولا تۇسەدى. بۇل - اقيقات، - دەدى پرەزيدەنت.