بيىلعى وقۋ جىلىندا 31 مەكتەپتە جاڭا وقۋلىقتار سىناقتان ءوتىپ جاتىر

استانا. قازاقپارات - 2-قىركۇيەكتەن باستاپ ەلىمىزدىڭ 31 پيلوتتىق مەكتەبىندە وقۋ-اعارتۋ مينيسترلىگى رەسپۋبليكالىق عىلىمي-پراكتيكالىق ءبىلىم مازمۇنىن ساراپتاۋ ورتالىعىنىڭ باسشىلىعىمەن 2025-2026 وقۋ جىلىنا ارنالعان جاڭا وقۋلىقتار سىناقتان ءوتىپ جاتىر.

مۇنداعى ماقسات - جاڭا وقۋ باعدارلاماسى نەگىزىندە ازىرلەنگەن 4-سىنىپقا ارنالعان جەكەلەگەن پاندەر بويىنشا وقۋلىقتار مازمۇنىنىڭ ساپاسىن انىقتاۋ، سونداي-اق مەكتەپتەر ءۇشىن ءتيىمدى وقۋ ماتەريالىن تاڭداۋ.

اپروباتسيا 4-سىنىپقا ارنالعان مىنا وقۋلىقتاردى قامتيدى: «بەينەلەۋ ونەرى»، «ەڭبەككە باۋلۋ»، «ورىس ءتىلى»(قازاق تىلىندە وقىتاتىن مەكتەپتەر ءۇشىن)، «شەت تىلدەرى»(اعىلشىن، نەمىس، فرانسۋز) جانە «سيفرلىق ساۋاتتىلىق»(ەلەكتروندىق وقۋلىق).

اپروباتسياعا پەداگوگتەر مەن وقۋشىلار قاتىسۋدا، بۇل وقۋلىقتاردىڭ فۋنكتسيونالدىعى مەن تيىمدىلىگى تۋرالى تولىق ماعلۇمات الۋعا مۇمكىندىك بەرەدى.

ەستەرىڭىزگە سالا كەتەيىك، ورتالىق بەس ساتىلى ساراپتاما جۇمىسىن جۇرگىزەدى: عىلىمي-پەداگوگيكالىق ساراپتاما، پىسىقتاۋ كەزەڭى، پيلوتتىق مەكتەپتەردە سىناقتان وتكىزۋ، قوعامدىق تالقىلاۋ جانە پاندىك ساراپتاما كوميسسياسى.

ساراپشى بولۋعا ءوتىنىش بەرگىسى كەلەتىن مۇعالىمدەر bmso.kz رەسمي سايتىندا ساۋالنامادان وتە الادى.