بۋراباي مەملەكەتتىك ۇلتتىق تابيعي ساياباعىندا 32 مىڭ قاراعاي كوشەتى ەگىلدى
استانا. KAZINFORM - بۇگىن «تازا قازاقستان» رەسپۋبليكالىق ەكولوگيالىق اكسياسى اياسىندا بۋراباي مەملەكەتتىك ۇلتتىق تابيعي ساياباعىندا 4,07 گەكتار اۋماققا 32 مىڭ قاراعاي كوشەتى وتىرعىزىلدى.
اتالعان ناۋقانعا «بۋراباي» ۇلتتىق پاركى، «وقجەتپەس» شيپاجايى، «بۋراباي دامۋ» ج ش س جانە «قاراسۋ» ش ج ق ر م ك ۇجىمدارى قاتىستى.
- مۇنداي بىرلەسكەن ەكولوگيالىق اكتسيالار وسكەلەڭ ۇرپاققا جەرىمىزدى باپتاۋ، تازالىق ساقتاۋ جانە تابيعاتتى قورعاۋدى ۇلگى ەتۋدىڭ تاماشا مۇمكىندىگى. ونىڭ ۇستىنە وسىنداي ورتاق جۇمىس ادامداردى ۇيىستىرادى،- دەيدى «وقجەتپەس» ە س ك» ا ق جالپى ماسەلەلەر جونىندەگى ۆيتسە- پرەزيدەنتى بىرلىك بارجاقسىموۆ.
ءوز كەزەگىندە «بۋراباي دامۋ» ج ش س مۋلتيمەديالىق ينتەراكتيۆتى كەشەنىنىڭ گيدى باقىتگۇل جولداسوۆا دا «تازا قازاقستان» رەسپۋبليكالىق ەكولوگيالىق اكسياسى تاماشا باستاما ەكەنىن جەتكىزدى.
- بۇگىن قۇلشىنىسپەن جۇمىس ىستەدىك! تال ەگۋگە، ورمان القابىن ۇلعايتۋعا ۇلەس قوسقان، تالماي ەڭبەكتەنگەن ادامدار ونى ەشقاشان بۇلدىرمەيدى، وتامايدى دەپ ويلايمىن. «تازا قازاقستان» رەسپۋبليكالىق ەكولوگيالىق اكتسياسى تاماشا باستاما دەپ ەسەپتەيمىن. وسىنداي ءىس- شارالار تابيعاتتى ايالاپ، جاۋاپكەرشىلىكتى كۇشەيتۋ ءۇشىن ادامداردىڭ كۇش-جىگەرىن بىرىكتىرەدى، - دەگەن پىكىرىن ءبىلدىردى «بۋراباي دامۋ» ج ش س مۋلتيمەديالىق ينتەراكتيۆتى كەشەنىنىڭ گيدى باقىتگۇل جولداسوۆا.
ال، «بۋراباي» م ۇ ت پ ورمان ءوسىرۋ ينجەنەرى ءاليا ءابدىراحمانوۆا ۇلتتىق پارك ۇجىمى جاسىل جەلەكتى القاپتى ۇلعايتۋ جانە ورمان ءوسىرۋدىڭ كەشەندى جوسپارى اياسىندا جىل سايىن جاس شىبىقتاردى وتىرعىزۋ جۇمىستارىن جۇرگىزەتىنىن ايتتى. ول سونداي- اق بيىلعى ءىس- شاراعا ەرىكتى كومەكشىلەر كەلگەنىن اتاپ ءوتتى.
2024 -جىلدىڭ 8-ساۋىرىنەن باستاپ «تازا قازاقستان» رەسپۋبليكالىق ەكولوگيالىق اكتسياسى اياسىندا «بۋراباي» مەملەكەتتىك ۇلتتىق پاركىنىڭ 30 قۇرىلىمدىق بولىمشەسىنىڭ بىرلەسكەن كۇشىمەن كوردوندارعا ىرگەلەس اۋماقتاردا سانيتارلىق تازالاۋ جۇمىستارى جۇرگىزىلگەنىن، 180 تەكشە مەتر قوقىس شىعارىلعانىن ايتا كەتكەن ءجون.
- قازاقستاننىڭ تۇكپىر- تۇكپىرىندە ەكولوگيالىق شارالاردى وتكىزۋ جاقسى داستۇرگە اينالىپ كەلە جاتقانىنا قۋانىشتىمىن. بۇل، ارينە، پاتريوتيزم مەن دۇرىس ەكولوگيالىق تاربيەنى قالىپتاستىرادى،- دەپ اتاپ ءوتتى «بۋراباي» مەملەكەتتىك عىلىمي- وندىرىستىك كاسىپورنىنىڭ ديرەكتورى سەرگەي بىكوۆ.
ونىڭ ايتۋىنشا، مامىر ايىنىڭ سوڭىنا دەيىن ۇلتتىق پاركتىڭ اقىلباي، بۋراباي، پريوزەرنىي، زولوتوبور، ميرنىي، جالايىر ورمان شارۋاشىلىقتارىندا تاعى 800 مىڭعا جۋىق اعاش ەگىلەدى. جاڭا ورمان ەكپەلەرىنىڭ جالپى اۋدانى 104,6 گەكتارعا جەتەدى. جالپى، جىل سوڭىنا دەيىن ۇلتتىق پارك ۇجىمى 832,2 مىڭ اعاش وتىرعىزۋدى جوسپارلاپ وتىر.