بەكتەنوۆ ءۇش قالاداعى جاڭا ج ە و تۋرالى: رەسەي جاۋابىن سوزسا، ءوزىمىز سالامىز

استانا. KAZINFORM - پرەمەر- مينيستر ولجاس بەكتەنوۆ ۇكىمەت وتىرىسىنان كەيىن ءوتىپ جاتقان باسپا ءسوز ءماسليحاتىندا وسكەمەن، سەمەي، كوكشەتاۋ قالالارىندا سالىنۋعا ءتيىس ءۇش جىلۋ- ەلەكتر ورتالىعىنىڭ تاعدىرى نە بولاتىنىن ايتتى.

- ءۇش ج ە و بويىنشا باستاپقىدا رەسەيلىك سەرىكتەستەرمەن بىرگە ىسكە اسىرۋ مۇمكىندىگى قاراستىرىلدى. ازىرگە ءبىز رەسەي فەدەراتسياسىنان كەپىلدەندىرىلگەن، ارزانداتىلعان قارجىلاندىرۋ ۇسىنىستارى تۋرالى ناقتى اقپارات العان جوقپىز. سوندىقتان ءبىز كوكشەتاۋدى ءوز كۇشىمىزبەن سالا باستادىق. «سامۇرىق- ەنەرگو» دا اينالىسىپ جاتىر. سەمەي مەن وسكەمەندى ايتساق، رەسەي تارابىنان جاۋاپ كۇتىپ وتىرمىز. ەگەر جاۋاپ جاقىن ارادا بولماسا، جوبانى ءوز بەتىمىزبەن ىسكە اسىرۋدىڭ نۇسقالارىن دا قاراستىرامىز. ءبىز كۇتە المايمىز، - دەدى پرەمەر- مينيستر.

جۋرناليست ءۇش بىردەي ءىرى جوبانى قازاقستان بيۋدجەتى كوتەرە الا ما دەپ ناقتىلادى.

- كوتەرەمىز. «سامۇرىق- ەنەرگونىڭ» نارىق مەحانيزمدەرى بار. جىلۋ- ەلەكتر ورتالىعى دا بيزنەس جوبا. پايدالانۋعا بەرىلگەننەن كەيىن اقشا تاۋىپ، سالعان ينۆەستيتسياسىن قايتارادى، - دەدى ولجاس بەكتەنوۆ.

بۇعان دەيىن ەنەرگەتيكا ءمينيسترى ەرلان اقكەنجەنوۆ 18-25- ماۋسىمدا وتكەن پەتەربور ەكونوميكالىق فورۋمىندا وسى ماسەلە تالقىلاناتىنىن ايتقان بولاتىن.