جيىندا ونەركاسىپ سەكتورىن سيفرلىق ترانسفورماتسيالاۋ ماسەلەلەرى قارالدى.
مەملەكەت باسشىسى جاساندى ينتەللەكت جاڭا سيفرلىق داۋىردە باسەكەگە قابىلەتتىلىكتى ايقىندايتىن باستى فاكتورلاردىڭ بىرىنە اينالعانىن اتاپ ءوتتى.
- ب ۇ ۇ-نىڭ ونەركاسىپتىڭ دامۋى تۋرالى 2026 -جىلعى ەسەبىنە سايكەس، جي الەم ەكونوميكاسىنىڭ كەلبەتىن وزگەرتەتىن بەس ترانسفورماتسيالىق مەگاترەندتىڭ ءبىرى رەتىندە تانىلدى. سوڭعى بەس جىلدا جاساندى ينتەللەكتىمەن بايلانىستى پاتەنتتەردىڭ ۇلەسى شامامەن ءۇش ەسە وسكەن. بۇل ىرگەلى تەحنولوگيالىق وزگەرىستەردى بايقاتادى. ەندى تابيعي رەسۋرستار جانە كاپيتال مەن نارىق ءۇشىن عانا ەمەس، ءوندىرىس تيىمدىلىگى ءۇشىن دە باسەكەلەستىك قىزا ءتۇستى. قازاقستان وسى مۇمكىندىكتەردى قالت جىبەرمەۋى قاجەت. باستى مىندەت - ەڭبەك ونىمدىلىگىن ارتتىرۋ، تەحنولوگيالىق جاڭعىرۋدى جەدەلدەتۋ جانە قوسىلعان قۇنى جوعارى ءونىم ءوندىرۋدى كەڭەيتۋ. وسى جۇمىستاردى اتقارۋدا جاساندى ينتەللەكت نەگىزگى قۇرالداردىڭ ءبىرى بولۋعا ءتيىس، - دەدى پرەزيدەنت.
قاسىم-جومارت توقايەۆ 2029 -جىلعا دەيىنگى Digital Kazakhstan ستراتەگياسى اياسىندا ناقتى ەكونوميكالىق ناتيجەگە قول جەتكىزۋدى كوزدەيتىن جاساندى ينتەللەكتىنىڭ ۇلتتىق كەشەندى ەكوجۇيەسى ءتۇزىلىپ جاتقانىنا توقتالدى.
- بيىلعى سەگىز ايدا ونەركاسىپتەگى ءوندىرىس كولەمى 46 تريلليون تەڭگەگە جۋىقتادى. وڭدەۋ ونەركاسىبى بىلتىرعى وسى مەرزىممەن سالىستىرعاندا 8,4 پايىزعا ءوستى. دەگەنمەن ەكونوميكالىق ءوسىمنىڭ جوعارى قارقىنىن ساقتاۋ ءۇشىن ەڭبەك ونىمدىلىگىن ارتتىرىپ، ونەركاسىپ بازاسىن جاڭعىرتۋعا جانە قوسىلعان قۇنى جوعارى ءونىم وندىرۋگە ءمان بەرۋ قاجەت. بۇل ماقساتقا جەتۋدە جاساندى ينتەللەكتىنىڭ اتقاراتىن ءرولى ايرىقشا. ج ي-دىڭ شىنايى قۇندىلىعى سول - ادام الەۋەتىن كۇشەيتەدى. ياعني جي ينجەنەرلەرگە ناقتى قادامدار جاساۋعا، جۇمىس تيىمدىلىگىن ۇلعايتۋعا، باسشىلىققا قاجەت كەزىندە دەرەۋ تالداۋ دەرەكتەرىنە سۇيەنىپ، جەدەل ءارى دۇرىس شەشىم قابىلداۋعا مۇمكىندىك بەرەدى. ونەركاسىپتەگى ساياساتىمىز وسى قاعيداتقا نەگىزدەلگەن، - دەدى مەملەكەت باسشىسى.