باسپانا نارىعى قارا سىلاقتاعى، ارلەنبەگەن پاتەرلەر ساۋداسىنان قاشان ارىلادى

استانا. KAZINFORM - استانادا قۇرىلىسشىلار قاۋىمداستىعىنىڭ 20 جىلدىعىنا ارنالعان سالالىق كونفەرەنسيا ءوتتى. مەملەكەتتىك ورگاندار مەن قارجىلىق ينستيتۋت باسشىلارى، قۇرىلىس كومپانيالارى مەن سالالىق قاۋىمداستىق وكىلدەرى جينالعان ءىس-شارادا تۇرعىن ءۇي نارىعىنىڭ وزەكتى دەگەن ماسەلەلەرى تالقىلاندى.

كونفەرەنسيادا ءسوز العان بىرنەشە ساراپشى «وتباسى بانكتى» ەلدەگى تۇرعىن ءۇي نارىعىن ىنتالاندىرۋشى ينستيتۋت رەتىندە اتادى.

«جىل باسىنان بەرى ءبىز 466 ميلليارد تەڭگەگە يپوتەكالىق نەسيە بەردىك. سوڭعى ءۇش جىل قاتار جىل سايىن شامامەن 2,9 تريلليون تەڭگەگە تۇرعىنداردى نەسيەلەندىرىپ كەلەمىز. زاەمدار سانى 68 مىڭنان 80 مىڭعا دەيىن جەتەدى. ونىڭ 183 ميلليارد تەڭگەسى باستاپقى نارىقتان الىنعان باسپاناعا بەرىلدى. ءبىزدىڭ KPI- كورسەتكىشتەرىمىزدە جىل بويى بەرىلگەن نەسيەنىڭ ىشىندە باستاپقى نارىقتان الىنعان پاتەر يپوتەكاسىنىڭ ۇلەسى 30-35 پايىزدان كەم بولماۋ كەرەك دەيتىن مەجە بار. مۇنى ءبىزدىڭ نارىققا ىقپال ەتۋ تەتىگىمىز دەۋگە بولادى. بيىل «وتاۋ» جانە «ناۋرىز» دەيتىن ەكى ۇلكەن يپوتەكالىق باعدارلامانى باستادىق. ەكەۋىنىڭ قارجىلاندىرۋ كولەمى - 450 ميلليارد تەڭگە»، - دەدى وتباسى بانكتىڭ باسقارما ءتورايىمى ءلاززات يبراگيموۆا.

فوتو: وتباسى بانك

ءىرى قارجى ۇيىمىنىڭ باسشىسى ەلىمىزدىڭ تۇرعىن ءۇي نارىعىن بىرتىندەپ قارا سىلاق، ارلەنبەگەن پاتەرلەر ساۋداسىنان ارىلتۋ كەرەك، سەبەبى ول ساتىپ الۋشىلاردىڭ قالتاسىنا قوسىمشا جۇك سالادى دەگەن پىكىر ءبىلدىردى.

«تۇرعىن ءۇي نارىعىنا تالداۋ جاساي وتىرىپ يپوتەكا الۋشىلار پاتەرلەردى قارا سىلاقپەن، ارلەنبەگەن قالپىندا الاتىندىقتان، جوندەۋ جۇمىستارىن قوسىمشا كرەديت الاتىنىن كوردىك. سوندىقتان وسىنى ەسكەرە «ناۋرىز» باعدارلاماسىندا قوسىمشا تەتىك جاساپ قويدىق. نەسيە سوماسىنىڭ 30 پايىزىنا دەيىنگى اقشانى جوندەۋ جۇمىستارىنا جۇمساۋعا بولادى»، - دەيدى «وتباسى بانك» باسشىسى.

بانك باسشىسىنىڭ ۇسىنىستارىن قۇرىلىسشىلار دا قۇپ كورىپ وتىر. BI Group حولدينگىنىڭ باسقارما ءتوراعاسى امانگەلدى وماروۆ «ناۋرىز» جانە «وتاۋ» باعدارلاماسى بويىنشا سالىناتىن ۇيلەردى تەك تازا ارلەنگەن كۇيدە تاپسىرۋ تالابىن ەنگىزۋدى قولداپ وتىر.

ءوز كەزەگىندە «وتباسى بانك» باسشىسى ۇكىمەتكە 2025 -جىلدان باستاپ اتالعان ەكى باعدارلامانىڭ ۇيلەرىنە «تازا ارلەۋ» ستاندارتىن ەنگىزۋدى ۇسىناتىنىن جەتكىزدى.

«وتباسى بانك» الداعى سەگىز جىلدا ەلدەگى تۇرعىن ءۇي نارىعىن «ناۋرىز» باعدارلاماسى ارقىلى ىنتالاندىرۋدى كوزدەپ وتىر.

قارجى ينستيتۋتىنىڭ قور نارىعىنداعى وتىمدىلىگى وبليگاتسيالار ارقىلى قوسىمشا قارجى تارتىپ، سالانى ىنتالاندىرا تۇسۋگە مۇمكىندىك بەرىپ وتىر.

«وتكەن سارسەنبىدە ءبىز قازاقستان قور بيرجاسىنا 5 جىلدىق وبليگاتسيالارىمىزدى ورنالاستىرىپ، جىلدىق 14,25 پايىزدىق مولشەرلەمەمەن 170,5 ميلليارد تەڭگە تارتتىق. بۇل جەردە بانكتەر ءۇشىن نەسيەنىڭ پايىزدىق مولشەرلەمەسى 7 پايىز بولادى. قالعان 7,25 پايىزىن قۇرىلىس جانە ونەركاسىپ مينيسترلىگى سۋبسيديالايدى. 2025 -جىلى «ناۋرىز» باعدارلاماسىن جالعاستىرامىز. بۇل - 8 جىلدىق جوبا. وسى ارالىقتا ءبىز بيرجاعا جالپى سوماسى 1,7 تريلليون تەڭگە بولاتىن وبليگاتسيالار شىعارامىز»، - دەيدى ءلاززات يبراگيموۆا.

«وتباسى بانك» باسشىسى مەملەكەتتىك باعدارلامالاردىڭ كەسىرىنەن باسپانا باعاسىنىڭ قىمباتتايتىنى تۋرالى سىندارعا توقتالدى.

«وسى سىنعا جاۋاپ رەتىندە «BaSpana-market» دەيتىن پورتال جاساپ شىعاردىق. ءبىرىنشى كەزەڭدە قۇرىلىس كومپانيالارمەن كوممۋنيكاتسيانى جولعا قويامىز. تۇرعىن ءۇي سالۋشىلارمەن بىرگە وتىرىپ ءبىز ارقىلى ساتىلاتىن پاتەردىڭ باعاسىن بەلگىلەيمىز. باعا كەلىسىمىنە قول قويىلعاننان كەيىن عانا ساتىلاتىن پاتەرلەر ءبىزدىڭ پورتالداعى 20 مىڭ ادامعا («وتاۋ» باعدارلاماسى) كورىنەدى»، - دەدى ول.

بۇل ەكى باعدارلامانىڭ ەلدەگى تۇرعىن ءۇي قۇرىلىسىنا جاڭا قارقىن بەرەتىن ءتۇرى بار. مىسالى، «وتباسى بانك» الماتى قالاسىندا 5400 جۋىق ءوتىنىش قابىلدادى. ال نارىق ۇسىنىپ وتىرعان پاتەرلەر سانى 1652 عانا، ياعني تاعى 3822 پاتەر جەتىسپەيدى دەگەن ءسوز.

قارجى ينستيتۋتى ءوز سالىمشىلارىن كۇماندى قۇرىلىس كومپانيالارى مەن ساپاسىز سالىنعان ۇيلەردەن قورعاۋ ءۇشىن تۇرعىن ءۇي سالۋشىلاردىڭ رەيتينگىن قالىپتاستىرماقشى. ول رەيتينگ بانك سالىمشىلارىنىڭ وزدەرى العان ۇيگە بەرگەن باعاسى نەگىزىندە جاسالادى.

كونفەرەنسيا بارىسىندا «قازاقستان تۇرعىن ءۇي كومپانياسى» اكسيونەرلىك قوعامىنىڭ باسقارما ءتوراعاسى التاي كۇزدىبايەۆ 2025 -جىلدان باستاپ تۇرعىن ءۇي قۇرىلىسىنا ۇلەسكەر قاراجاتىن تارتۋدىڭ ەرەجەسى قاتاڭدايتىنىن ەسكە سالدى.

«بىلتىر نارىقتى زەرتتەگەن كەزدە سالىنىپ جاتقان باسپانانىڭ 68 پايىزى، ياعني، 105 مىڭ پاتەردىڭ تاۋەكەل ايماعىندا تۇرعانى بەلگىلى بولدى. ۇلەسكەرلەردى تارتۋدا 17 كەلىسىمشارت ءتۇرى بولعان. 2025 -جىلدىڭ قاڭتارىنان باستاپ تۇرعىن ءۇي قۇرىلىسى كووپەراتيۆىنەن پاي يەلەنگەندەردى ۇلەسكەرلىك قۇرىلىسقا قاتىسۋشىمەن تەڭەستىرەمىز»، - دەدى ول.

قازاق قۇرىلىس جانە ساۋلەت عىلىمي-زەرتتەۋ ينستيتۋتى قۇرىلىستى نورمالاۋ ورتالىعىنىڭ ديرەكتورى ارمان حاسەن تۇرعىن ءۇي باعاسىن جوبالاۋ سمەتاسى بويىنشا ەمەس، كەرىسىنشە جوبالاۋ سمەتاسىن باعا كورسەتكىشتەرى بويىنشا ازىرلەۋدى ۇسىندى.

اۆتور
ەسىمجان ناقتىباي