بالقاشتا ا ە س سالۋ بويىنشا قىتايمەن كەلىسسوز جۇرگىزگەن جوقپىز - رينات وقاسوۆ
استانا. KAZINFORM - «قازاقستان اتوم ەلەكتر ستانسيالارى» ج ش س باس ديرەكتورىنىڭ ورىنباسارى رينات وقاسوۆ بالقاش ىرگەسىنەن ورىن تەبۋ مۇمكىن ا ە س ماسەلەسى بويىنشا قىتايدىڭ كەلىسىمىن الۋ ماسەلەسى قالاي شەشىلىپ جاتقانىن ايتتى.
ماسەلە قايدان شىقتى؟
قازاقستاننىڭ العاشقى ا ە س-ى الماتى وبلىسى جامبىل اۋدانى ۇلكەن كەنتىنىڭ اۋماعىندا سالىناتىنى تۋرالى ۇكىمەت قاۋلىسى شىققان. ۇلكەن كەنتى بالقاش كولىنىڭ ىرگەسىندە تۇر دەۋگە بولادى. ەنەرگەتيكتەر بۇل تاڭداۋدى وڭتۇستىك وڭىرلەرگە ا ە س وندىرگەن ەلەكتر قۋاتىن تاسىمالداۋ جەڭىلدەيتىنىمەن، ا ە س تۋربينالارىن سۋىتۋ جۇمىستارىن جەڭىلدەتۋگە ىڭعايلى بولۋىمەن بايلانىستىرىپ وتىر. الايدا بالقاش كولىنىڭ نەگىزگى سۋى باستاۋى قىتاي اۋماعىندا جاتقان ىلە وزەنىنەن كەلەدى. حالىقارالىق نورما بويىنشا ترانسشەكارالىق وزەن بويىنا قانداي ءبىر ءىرى ينفراقۇرىلىم سالۋ ءۇشىن سۋ بويىنداعى ەلدەردىڭ تۇگەل كەلىسىمىن الۋ كەرەك. سوندىقتان ۇلكەن كەنتىنە ا ە س سالۋ ءۇشىن قىتايدىڭ كەلىسىم بەرگەنى قاجەت.
قىتاي كەلىسە مە؟
«قازاقستان اتوم ەلەكتر ستانسيالارى» ج ش س باس ديرەكتورىنىڭ ورىنباسارى رينات وقاسوۆتىڭ ايتۋىنشا، بۇل ماسەلەدە قيىندىق بولماۋى كەرەك.
- قازاقستان اتوم ەنەرگەتيكاسى سالاسىندا بۇكىل حالىقارالىق كونۆەنسيالاردىڭ مۇشەسى بولىپ ەسەپتەلەدى. ءبىزدىڭ شورت-پاراعىمىزدا وسى قىتايدىڭ دا كورپوراتسياسى بار. سوندىقتان ناقتى ا ە س سالۋ ماسەلەسىندە ىلە وزەنى بويىنشا كەلىسسوز جۇرگىزگەن جوقپىز. ءبىراق بۇل ماسەلەدە ەشقانداي قيىندىق بولا قويادى دەپ ويلامايمىن، - دەدى رينات وقاسوۆ.
بۇعان دەيىن ا ە س سالۋعا مەملەكەت كەپىلدىگىمەن قارىز تارتىلۋى مۇمكىن ەكەنىن جازعان ەدىك.