بالاسى ۇستازعا دورەكىلىك تانىتقان اتا-انانى جازالاۋ كەرەك پە - وقۋ-اعارتۋ مينيسترلىگىنىڭ ۇستانىمى
استانا. KAZINFORM - وقۋ-اعارتۋ مينيسترلىگى بالاسى ۇستازدارعا دورەكىلىك تانىتاتىن اتا-انالاردى جازالاۋ ماسەلەسىنە قاتىستى ۇستانىمىن ءبىلدىردى.
ورتالىق كوممۋنيكاتسيالار قىزمەتىندەگى بريفينگ بارىسىندا تىلشىلەر مينيسترلىك وكىلدەرىنەن: «قازىرگى ۋاقىتتا كوپتەگەن وقۋشى ۇستازدارىنا دورەكى قىلىق تانىتىپ، ولاردى مۇقاتىپ، كورگەنسىزدىك تانىتىپ جاتادى. وسى ماسەلەدە، پەداگوگتاردىڭ قۇقىقتارىن قورعاۋدا مينيسترلىك ۇستانىمى قانداي؟ سىزدەردىڭ ويلارىڭىزشا، مۇنداي وقۋشىلاردىڭ اتا-انالارىن جازالاۋ قاجەت پە؟»، - دەپ سۇراعان ەدى.
ساۋالعا جاۋاپ بەرگەن وقۋ-اعارتۋ مينيسترلىگىنىڭ ءبىلىم سالاسىنداعى ساپانى قامتاماسىز ەتۋ كوميتەتى ءتوراعاسىنىڭ ورىنباسارى مايرا مەلدەبەكوۆا ەلىمىزدە «پەداگوگ مارتەبەسى تۋرالى» زاڭ سوڭعى 5 جىلدا كۇشىندە ەكەنىن اتاپ ءوتتى.
- بۇل زاڭ ەڭ الدىمەن مۇعالىمدەردىڭ قۇقىقتارىن قورعاۋعا باعىتتالعان. ەگەر اتا-انالاردىڭ نە وقۋشىلاردىڭ تاراپىنان جانجالدى جاعداي تۋىنداسا، وندا پەداگوگ قۇقىعى مىندەتتىت تۇردە قورعالۋى ءتيىس. ءبارى دە ناقتى جاعدايعا بايلانىستى. ءتۇرلى جايتتار بولادى ءارى ونىڭ ءارقايسىسى پەداگوگيكالىق ادەپ جونىندەگى كەڭەستە، اتا-انالار جينالىسىندا، سونداي-اق جۇرتشىلىق قاتىساتىن كەزدەسۋلەردە جەكە-جەكە قارالادى. ەگەر وقۋشىنىڭ نەمەسە اتا-انانىڭ ارەكەتى اكىمشىلىك قۇقىق بۇزۋشىلىققا جاتسا، وندا زاڭدا اتا-انالارعا ايىپپۇلدى قوسا العاندا اكىمشىلىك جاۋاپكەرشىلىك كوزدەلگەن، - دەدى ول.
بۇعان دەيىن ورتا ءبىلىم بەرۋ جۇيەسىندە كادر تاپشىلىعى تولىق جويىلعانىن جازعان ەدىك.
اۆتور
مارلان جيەمباي