پرەزيدەنتتىڭ پىكىرىنشە، الەمدە تىڭعىلىقتى بايىپتاپ، مۇقيات ويلاستىرىلعان شەشىمدى قاجەت ەتەتىن اسا كۇردەلى ءارى بۇرىن-سوڭدى بولماعان ۇدەرىستەر ورىن الىپ جاتىر.
- تۇپتەپ كەلگەندە، حالىقارالىق قاۋىپسىزدىك ارحيتەكتۋراسىنىڭ ىرگەسى شايقالا باستادى. بۇل جايت قۇقىق ۇستەمدىگى كولەڭكەدە قالىپ، كۇش كورسەتۋ باسىمدىققا يە بولعان قاۋىپتى ۇردىسپەن قاتار جۇرۋدە. بىلتىر الەمدە قارۋلى قاقتىعىستار سانى ەكىنشى دۇنيەجۇزىلىك سوعىس كەزىندەگى كورسەتكىشتەن اسىپ ءتۇستى. بۇل كيكىلجىڭدەردىڭ قۇنى ستاتيستيكالىق دەرەكتەرمەن عانا ەمەس، ادام عۇمىرىمەن دە ولشەنىپ جاتىر. وتكەن جىلدىڭ وزىندە 20 قارۋلى قاقتىعىس بولىپ، 37 مىڭنان استام بەيبىت تۇرعىن اجال قۇشتى. 117 ميلليوننان اسا ادام بوسقىنعا اينالدى، ال 266 ميلليون جان ىشەر اسقا جارىماي وتىر. بۇل ءۇردىس ۇزاق جىلدار بويى جاھاندىق تۇراقتىلىق پەن قاۋىپسىزدىككە قول جەتكىزۋگە باعىتتالعان بىرلەسكەن ساياسي كۇش-جىگەردىڭ ناتيجەسىن جوققا شىعاردى. سوندىقتان ازياعا اناعۇرلىم مىقتى ينستيتۋتتار قاجەت. نيەتتەستىك جونىندەگى دەكلاراتسيالار قابىلداۋدىڭ ءداۋىرى ءوتتى، - دەدى قاسىم-جومارت توقايەۆ.
پرەزيدەنت 2022-جىلى استانادا ۇيىمداستىرىلعان VI سامميتتە ا و س ش ك مۇشە مەملەكەتتەرى كەڭەستى تولىققاندى حالىقارالىق ۇيىمعا اينالدىرۋعا ۋاعدالاسقانىنا نازار اۋداردى.
- بۇگىندە ۇيىمعا ءتوراعالىق ەتىپ وتىرعان ازەربايجان بۇل ميسسيانى لايىقتى دەڭگەيدە ىسكە اسىرىپ كەلەدى. ا و س ش ك جارعىسىنىڭ قابىلدانۋىن اسىعا كۇتەمىز. بۇل الداعى ءىس-قيمىلىمىزدىڭ جول كارتاسى بولادى. قازاقستاننىڭ ا و س ش ك ترانسفورماتسياسىنا قاتىستى ۇستانىمى بۇعان دەيىن بەكىتىلگەن مىندەتتەمەلەرگە نەگىزدەلگەن. سونداي-اق ورتاق تۇسىنىستىككە قول جەتكىزۋگە جانە ءتيىستى كەلىسىمدەردى ازىرلەۋگە يكەم تانىتۋدى باسشىلىققا الادى. كەڭەس ازياداعى ورنىن ساقتاي وتىرىپ، جاھاندىق سەرىكتەستەرمەن ىنتىماقتاستىققا اشىق ينستيتۋت بولۋعا ءتيىس. ۇيىم ءوزارا سەنىم رۋحىنداعى دايەكتى ديالوگ پەن سىندارلى كونسۋلتاتسياعا نەگىزدەلگەن قاۋىپسىزدىك مودەلىن ىلگەرىلەتۋى كەرەك، - دەدى مەملەكەت باسشىسى.