ازيادا جۇلدەگەرلەرى مەن باپكەرلەرىنە قانشا سىياقى تولەنەدى؟

قازاقستان ۇكىمەتىنىڭ 2014-جىلعى 19-جەلتوقسانداعى 1345-قاۋلىسىنا سايكەس، ازيا ويىندارىندا التىن العان سپورتشىعا 10 مىڭ دوللار، كۇمىس جۇلدەگەرگە 5 مىڭ دوللار، ال قولا جۇلدەگەرگە 3 مىڭ دوللار بەرىلەدى. قازىرگى ەسەپپەن بۇل تيىسىنشە 4477300، 2238650 جانە 1 343190 تەڭگە.

الايدا جالپى تولەم كولەمى تەك مەدال سانىنا قاراپ ەسەپتەلمەيدى. كوماندالىق جارىستا جۇلدە العان قۇرامانىڭ ءار مۇشەسىنە جەكە سىياقى بەرىلەدى.

مىسالى، بىرنەشە سپورتشىدان قۇرالعان كوماندا التىن جۇلدە يەلەنسە، ونىڭ ءارقايسىسى چەمپيونعا بەلگىلەنگەن سومانى الادى. سوندىقتان كوماندالىق سايىستاعى ءبىر التىن مەدال ءۇشىن مەملەكەت بىرنەشە سپورتشىعا جەكە-جەكە سىياقى تولەيدى.

ايتا كەتەيىك، ازيا ويىندارىنىڭ جۇلدەگەرلەرىن دايىنداعان جاتتىقتىرۋشىلار ءۇشىن دە بولەك تولەمدەر قاراستىرىلعان.

التىن مەدال يەگەرىن دايىنداعانى ءۇشىن 5 مىڭ دوللار، كۇمىس جۇلدەگەر ءۇشىن - 3 مىڭ دوللار، قولا جۇلدەگەر ءۇشىن - 2 مىڭ دوللار (تيىسىنشە 2238650، 1343190 جانە 895460 تەڭگە) تولەنەدى.

قازاقستان قانشا مەدال جەڭىپ الدى؟

ەسكە سالايىق، ايچي مەن ناگوياداعى 2026-جىلعى ازيادادا قازاقستان قۇراماسى 84 مەدال يەلەندى: 12 التىن، 24 كۇمىس جانە 48 قولا. جالپىكوماندالىق ەسەپتە ۇلتتىق قۇراما سەگىزىنشى ورىنعا تابان تىرەدى.