ازەربايجاننىڭ قازاقستان ەكونوميكاسىنا سالعان ينۆەستيتسياسى 211 ميلليون دوللاردان استى
باكۋ. KAZINFORM - ازەربايجان قازاقستان ەكونوميكاسىنا 211,4 ميلليون دوللار ينۆەستيتسيا قۇيدى. ال قازاقستاننىڭ ازەربايجان ەكونوميكاسىنا سالعان كاپيتال كولەمى 114 ميلليون دوللار بولعان.
ازەربايجاننىڭ ەنەرگەتيكا ءمينيسترى پيارۆيز شاحبازوۆ پەن قازاقستاننىڭ كولىك ءمينيسترى مارات قارابايەۆ ازەربايجان مەن قازاقستان اراسىنداعى ساۋدا-ەكونوميكالىق ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ 20-وتىرىسىندا ازەربايجان ارقىلى وتەتىن ءتۇرلى باعىت بويىنشا قازاقستاندىق مۇنايدىڭ ترانزيتىن ۇلعايتۋ ماسەلەسىن تالقىلادى. سونداي-اق، ورتالىق ازيادان ەۋروپاعا «جاسىل ەنەرگيا» ەكسپورتى ءۇشىن ءدالىز قۇرۋ جاعى قارالدى.
«وتكەن جىلى قازاقستان مەن ازەربايجان اراسىنداعى جۇك تاسىمالىنىڭ كولەمى 1,5 ەسە، 4,3 ميلليون تونناعا دەيىن ۇلعايدى. بۇل رەتتە، ورتا ءدالىز بويىنشا جۇك تاسىمالداۋ كولەمى 65 پايىزعا نەمەسە 2,8 ميلليون تونناعا دەيىن ارتتى. وتكەن جىلى ەكى ەل اراسىنداعى تاۋار اينالىمىنىڭ كولەمى 314 ميلليون دوللار بولدى. بۇگىندە ازەربايجاننىڭ قازاقستانعا جيناقتالعان ينۆەستيتسيالارى 211,4 ميلليون دوللارعا، ال قازاقستاننىڭ ءازىربايجان ەكونوميكاسىنا قۇيعان كاپيتال كولەمى 114 ميلليون دوللارعا جەتتى»، - دەدى مارات قارابايەۆ.
كەزدەسۋدە ازەربايجان-قازاقستان ينۆەستيتسيالىق قورىن قۇرۋ، ونەركاسىپتىك پاركتەردە بىرلەسكەن ءوندىرىستى ۇيىمداستىرۋ، «اليات» پورتىندا استىق تەرمينالىن سالۋ، كەمە جاساۋ سالاسىنداعى ىنتىماقتاستىق، سونداي-اق قازاقستاندىق كومپانيالاردىڭ وككۋپاتسيادان بوساتىلعان اۋماقتاردا ىسكە اسىرىلاتىن جوبالارعا قاتىسۋ مۇمكىندىكتەرى تالقىلاندى.
سونىمەن قاتار تاراپتار مۇناي-گاز سالاسىنداعى ىنتىماقتاستىقتى كەڭەيتۋ، ءارتۇرلى باعىت بويىنشا قازاقستاندىق مۇناي ترانزيتىنىڭ كولەمىن ۇلعايتۋ جانە ورتا ءدالىز بويىنشا جۇك تاسىمالداۋ ماسەلەلەرىن تالقىلادى.
كوميسسيانىڭ 21-وتىرىسى كەلەسى جىلى باكۋدە وتەدى.