گازاداعى اتىستى توقتاتۋ كەرەك: جوزەپ بوررەل حاماس كوشباسشىسىنىڭ قازاسى تۋرالى

استانا. KAZINFORM - ەۋرووداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارى وكىلى جوزەپ بوررەلل حاماس جەتەكشىسىنىڭ يراندا قايتىس بولۋى تۋرالى حاباردان كەيىن شيەلەنىستى ازايتۋدىڭ جولدارىن ىزدەۋ قاجەت ەكەنىن ايتىپ، گازاداعى قاقتىعىستاردى تەز ارادا توقتاتۋعا شاقىردى.

حاماس كوشباسشىسى يسمايل حانيانىڭ تەگەراندا قايتىس بولۋى جانە ودان كەيىنگى يران بيلىگىنىڭ مالىمدەمەلەرى تاياۋ شىعىستاعى سوعىستىڭ كەڭەيۋىنە قاتىستى الاڭداۋشىلىق تۋعىزدى.

ەۋرووداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل ۆەتنامعا ساپارى بارىسىندا قاقتىعىستى دەەسكالاتسيالاۋ جولدارىن ىزدەۋ قاجەت ەكەنىن اتاپ ءوتتى.

- مەن قانداي دا ءبىر تۇسىنىك بەرمەس بۇرىن قوسىمشا اقپارات كۇتۋىم كەرەك. ءبىراق بۇعان دەيىن شەكارادا شيەلەنىس بولىپ، گازاداعى سوعىس جالعاسىپ جاتىر. مەن لاوستا بولعانىمدا ليۆاننىڭ سىرتقى ىستەر ءمينيسترى بۋ حابيبپەن سويلەستىم. مەن تەك شيەلەنىستى باسەڭدەتۋ جولدارىن ىزدەستىرۋ جانە بۇكىل ايماققا، ءتىپتى ودان تىس جەرلەرگە دە اسەر ەتەتىن سوعىستى بولدىرماۋ كەرەك ەكەنىن ايتا الامىن. ءدال قازىر گازاداعى اتىستى توقتاتۋ كەرەك، - دەدى بوررەل.

قىتاي حاماس ساياسي بيۋروسىنىڭ باسشىسى يسمايل حانيانىڭ قازاسىنا قاتتى الاڭداۋشىلىق ءبىلدىرىپ، ونىڭ ولتىرىلۋىنە ءۇزىلدى-كەسىلدى قارسىلىق ءبىلدىرىپ، ايىپتايدى، دەپ حابارلادى سارسەنبى كۇنى قىتاي سىرتقى ىستەر مينيسترلىگىنىڭ باسپا ءسوز حاتشىسى لين جيان.

- ءبىز بۇل وقيعاعا بەيجاي قارامايمىز، كىسى ولتىرۋگە ءۇزىلدى-كەسىلدى قارسىمىز. سونىمەن قاتار، بۇل وقيعا ايماقتاعى تۇراقسىزدىقتى ودان ءارى ۋشىقتىرۋ مۇمكىندىگىنە الاڭدايمىز. قىتاي ءارقاشان ايماقتىق داۋلاردى كەلىسسوزدەر مەن ديالوگ ارقىلى شەشۋدى جاقتايدى. قاقتىعىستار مەن تەكەتىرەستىڭ ودان ءارى ورشۋىنە جول بەرمەۋ ءۇشىن گازادا مۇمكىندىگىنشە تەزىرەك جان-جاقتى جانە تۇراقتى اتىستى توقتاتۋعا قول جەتكىزۋ قاجەت، - دەدى قىتايلىق ديپلومات.

ا ق ش قورعانىس ءمينيسترى للويد وستين دە تاياۋ شىعىستاعى جاعدايدىڭ شيەلەنىسۋ قاۋپىنە الاڭداۋشىلىق ءبىلدىردى، ءبىراق ول حانيانىڭ قازاسى ايماقتا ۇلكەن سوعىسقا ۇلاسادى دەپ ەسەپتەمەيدى.

كرەمل حاماس جەتەكشىسىنىڭ ءولتىرىلۋىن ايىپتاپ، مۇنداي ارەكەت ايماقتا بەيبىتشىلىك ورناتۋ ارەكەتتەرىنە قارسى باعىتتالعان جانە «ونسىز دا شيەلەنىسكەن جاعدايدى ايتارلىقتاي تۇراقسىزداندىرۋى مۇمكىن» ەكەنىن مالىمدەدى.

بۇعان دەيىن حاماس جەتەكشىسىنىڭ قازاسى الەمدە قانداي رەاكسيا تۋدىرعانى تۋرالى حابارلانعان بولاتىن.

اۆتور

ەركەجان سماعۇلوۆا