— جالپى، كەز كەلگەن رەفورمانى ىسكە اسىرۋ ءۇشىن زاڭداردى جەتىلدىرۋ، ساياسي ينستيتۋتتاردى نىعايتۋ جەتكىلىكسىز. ەڭ الدىمەن، سانا جاڭعىرۋعا ءتيىس. ەلىمىز ورنىقتى دامۋى ءۇشىن قوعامدا جاڭا ەتيكا ورنىعۋى قاجەت. «ادال ازامات» يدەولوگياسى ءومىرىمىزدىڭ اجىراماس بولىگىنە اينالۋى كەرەك. «ارەكەت ءتۇبى — بەرەكەت» دەگەن حالقىمىز. سوندىقتان مەيلىنشە شيراق بولىپ، وتانشىل ازامات ەكەنىمىزدى جاسامپاز ىستەرمەن كورسەتۋ اسا ماڭىزدى. ال وتانشىل بولۋ — زاڭدى قۇرمەتتەۋ، تارتىپكە باعىنۋ، ەل يگىلىگى ءۇشىن تاباندى ەڭبەك ەتۋ دەگەن ءسوز. زاڭعا قۇرمەتپەن قارايتىن ادام ءارقاشاندا تابىستى بولادى. مەن قازاقستان ءاربىر ازاماتتىڭ دامۋىنا جول اشاتىن، جالپىعا بىردەي مۇمكىندىك بەرەتىن، بىرلىگى بەكەم، ادىلەتتى ءارى وركەنيەتتى مەملەكەت بولۋىن تىلەيمىن. اتالعان ماقساتقا جەتۋ ءۇشىن بار كۇش-جىگەرىمدى سالىپ كەلەمىن جانە الداعى ۋاقىتتا دا سولاي بولادى، — دەدى قاسىم-جومارت توقايەۆ.
پرەزيدەنتتىڭ ايتۋىنشا، قازىرگى زاماننىڭ باستى قۋاتى - ءبىلىم مەن عىلىمدا، وزىق يننوۆاتسيالاردا. جاڭا تەحنولوگيالاردى، جاساندى ينتەللەكتىنى تەرەڭ مەڭگەرگەن ەل داميدى.
— مەملەكەتىمىزگە مىقتى عالىمدار، كاسىبي ينجەنەرلەر، ۇلاعاتتى ۇستازدار مەن بىلىكتى دارىگەرلەر ءارقاشاندا كەرەك بولادى. مەن ۇلتىمىزدىڭ كوشىن العا باستاي الاتىن وتانشىل ازاماتتارعا زور ۇمىتپەن قارايمىن. بۇگىن مەن ەلىمىزدە جاسالىپ جاتقان اۋقىمدى وزگەرىستەرگە كەڭىنەن توقتالدىم. جارقىن بولاشاعىمىزدى ايقىندايتىن ماڭىزدى باستامالار جونىندە ايتتىم. الدىمىزدا تۇرعان تاريحي مىندەتتەردى تابىستى جۇزەگە اسىرۋىمىز كەرەك. ءبىز ءار ازاماتتىڭ دامۋىنا، بارشا جۇرتتىڭ وركەندەۋىنە جول اشاتىن بەرەكەلى قوعام، ادىلەتتى قازاقستاندى مىندەتتى تۇردە قۇرامىز. بارشاڭىزعا اماندىق جانە تابىس تىلەيمىن! وتانىمىز — قازاق ەلى ماڭگى جاساسىن!، — دەدى مەملەكەت باسشىسى.
ايتا كەتەلىك پرەزيدەنت جاڭا ازاماتتىق كودەكس قابىلداۋ قاجەت ەكەنىن ايتقان ەدى.