- بۇدان بولەك، اۋىل شارۋاشىلىعى ونىمدەرىن تەرەڭ وڭدەۋ ءىسىن دامىتۋعا باسا ءمان بەرگەن ءجون. قازىردىڭ وزىندە بۇل باعىتتا تابىستى جوبالار بار. ماسەلەن، قىزىلوردا وبلىسىنىڭ شارۋالارى قاتاڭ كليماتقا قاراماستان جۇگەرى مەن سويا ءوسىرىپ، ونى وڭدەۋمەن اينالىسادى. ال تۇركىستان وبلىسىندا قىتاي كومپانياسى سۋدى ءتيىمدى پايدالاناتىن زاماناۋي ماقتا-توقىما كلاستەرىن قۇرىپ جاتىر. ۇكىمەت وسىنداي وزىق تاجىريبەلەردىڭ ەل اۋماعىندا كەڭ تاراۋىنا جاعداي جاساپ، ينۆەستورلارعا ۋاقتىلى قولداۋ كورسەتۋى كەرەك، - دەدى قاسىم-جومارت توقايەۆ.
سونىمەن قاتار پرەزيدەنت مۇنداي زاماناۋي تاسىلدەردى مال شارۋاشىلىعىندا دا جان-جاقتى پايدالانعان دۇرىس ەكەنىن اتاپ ءوتتى.
- بۇگىندە سولتۇستىك قازاقستان وبلىسىنىڭ تاجىريبەسىن باسشىلىققا الا وتىرىپ، ەلىمىزدە 71 تاۋار-ءسۇت فەرماسى ىسكە قوسىلدى. بۇل فەرمالاردا جىل سايىن 462 مىڭ توننادان استام ءسۇت وندىرىلەدى.
اقمولا وبلىسىندا شەتەلدىڭ وزىق تاجىريبەسىنە ساي ەت كلاستەرى قۇرىلىپ جاتىر. وسىنداي جوبالاردى قولداۋعا بولادى، قاجەتتى جاعدايدا قاراجات تا ءبولۋ كەرەك، - دەدى مەملەكەت باسشىسى.
وتاندىق تراكتورلار مەن كومباينداردىڭ سانىن كوبەيتۋ قاجەت - پرەزيدەنت
سونداي-اق، قازاقستان حالقىنا جولداۋىن جاريالاۋ كەزىندە پرەزيدەنت قاسىم-جومارت توقايەۆ تاعام ونەركاسىبىندەگى جوبالاردى جۇزەگە اسىرۋ جانە اۋىل شارۋاشىلىعى سالاسىن تەحنولوگيالىق تۇرعىدان جاڭعىرتۋ جونىندە مالىمدەدى.
- «بايتەرەك» حولدينگى تاعام ونەركاسىبى سالاسىندا جالپى قۇنى 500 ميلليارد تەڭگەدەن اساتىن الەۋەتى زور جوبالار ءتىزىمىن دايىندادى. سونىڭ ءبارىن تابىستى جۇزەگە اسىرۋ ءۇشىن قولجەتىمدى ءارى جەڭىلدەتىلگەن شارتتارمەن قارجى ءبولۋ ماسەلەسىن سوزبالاڭعا سالماي، ساپالى جوبالاردى دەرەۋ ىسكە اسىرۋ كەرەك - دەدى ول.
سونىمەن قاتار مەملەكەت باسشىسىنىڭ سوزىنشە، اۋىل شارۋاشىلىعى سالاسىن تەحنولوگيالىق تۇرعىدان جاڭعىرتۋدىڭ ءساتى كەلدى.
- ەلىمىزدە شىعارىلاتىن تەحنولوگيالىق تۇرعىدان ساپاسى جوعارى تراكتورلار مەن كومباينداردىڭ سانىن كوبەيتۋ قاجەت. بۇل - وزەكتى ماسەلە. وسىلايشا، ءبىز اۋىل شارۋاشىلىعى ءوندىرىسىنىڭ تيىمدىلىگىن ارتتىرا تۇسەمىز، - دەدى ول.
ايتا كەتەيىك، بۇعان دەيىن پرەزيدەنت ستراتەگيالىق مىندەتتەردى شەشۋگە كاسىپكەرلەردى تارتۋ جونىندە مالىمدەدى.