اتىراۋ وبلىسىنىڭ 12 مەكتەبىندە 41 «ءولى جانعا» 90 ميلليون تەڭگە جالاقى تولەنگەن
اتىراۋ. KAZINFORM - اتىراۋ وبلىسىنىڭ 12 مەكتەبىندە 41 «ءولى جانعا» 90 ميلليون تەڭگە جالاقى تولەنگەنى انىقتالعان.
سىبايلاس جەمقورلىققا قارسى ءىس- قيمىل اگەنتتىگى اتىراۋ وبلىستىق دەپارتامەنتى باسشىسىنىڭ ءبىرىنشى ورىنباسارى نۇرلان ءجاحيننىڭ ءمالىم ەتۋىنشە، ءبىلىم سالاسىندا جاس ۇرپاقتى تاربيەلەۋ مەن وقىتۋعا ەلەۋلى توسقاۋىل بولاتىن سىبايلاس جەمقورلىق تاۋەكەلدەرى بار.
«ماسەلەن، وتكەن جىلى ءبىلىم بەرۋ سالاسىندا سىبايلاس جەمقورلىق تاۋەكەلدەرىنە سىرتقى تالداۋ جۇرگىزدى. سونىڭ ناتيجەسىندە سىبايلاس جەمقورلىق 10 عا تاۋەكەلى بايقالدى. وسىعان بايلانىستى ءتيىستى ورگانعا 26 ۇسىنىس بەرىلدى. تالداۋ كەزىندە 12 مەكتەپتە ءىس جۇزىندە جۇمىس ىستەمەيتىن 41 «ءولى جانعا» جالاقى اۋدارىلىپ، مەملەكەتكە شامامەن 90 ميلليون تەڭگە شىعىن كەلتىرىلگەنى انىقتالدى» ، - دەيدى نۇرلان جاحين.
ونىڭ ايتۋىنا قاراعاندا، جەرگىلىكتى دەپارتامەنت باسشىلارى سىبايلاس جەمقورلىق تاۋەكەلىن جوياتىن بىرنەشە ۇسىنىس بەرىپ وتىر.
«بىرىنشىدەن، بۋحگالتەرلىك ەسەپتىڭ اقپاراتتىق جۇيەلەرىنە تسيفرلىق شەشىمدەردى ەنگىزۋ شەڭبەرىندە بيۋدجەتتىك وتىنىمدەردى ۇسىنۋ ءتارتىبىن بەكىتۋ قاجەت. ەكىنشىدەن، جالاقى تولەۋگە، ونىڭ ىشىندە اۆانستى بەرۋگە باقىلاۋ تەتىگىن ازىرلەۋ، ەنگىزۋ ماسەلەسىنىڭ تيىمدىلىگى بار. ۇشىنشىدەن، قولدانىستاعى زاڭناماعا سايكەس پەداگوگتەر مەن باسقا دا قىزمەتكەرلەردىڭ جۇمىس ساعاتىن ليميتتەن تىس بەلگىلەۋدى بولدىرمايتىن تەتىك بولىگىنە ءبىرقاتار ۇسىنىس بەردىك. وسى ۇسىنىستاردىڭ ناتيجەسىندە ءقازىردىڭ وزىندە تىيمدىلىگى بايقالا باستادى. ونىڭ ىشىندە جىمقىرۋ تاۋەكەلدەرىن بارىنشا ازايتۋ مۇمكىندىگى بايقالدى. سونداي- اق جەرگىلىكتى اتقارۋشى ورگانداردىڭ بۋحگالتەرلىك ەسەپتى جۇرگىزۋ بويىنشا ساتىپ الىناتىن اقپاراتتىق جۇيەلەردىڭ مىندەتتى پارامەترلەرى مەن تەحنيكالىق سيپاتتامالارىن بىرىزدەندىرۋ ءۇشىن قۇقىقتىق جاعدايلار جاسالدى» ، - دەپ ءمالىم ەتتى نۇرلان جاحين.
دەپارتامەنت وكىلىنىڭ پىكىرىنشە، ءبىلىم سالاسى قىزمەتكەرلەرىنىڭ ءبىر عانا مىندەتى بار. بۇل - ساپالى ءبىلىم بەرۋ جانە جاس ۇرپاققا وتانسۇيگىشتىك، ەڭبەكقورلىق، پاراساتتىلىق قۇندىلىقتارىن ءسىڭىرۋ.
ەسكە سالا كەتەلىك، بۇعان دەيىن اتىراۋ وبلىسىندا 60 اۋىلدىڭ وقۋشىلارى مەكتەپكە تاسىمالداناتىنىن جازعان ەدىك.