استانالىق كوسمەتولوگ ليتسەنزياسىز جۇمىس ىستەپ، دەنساۋلىققا زيان كەلتىرگەنى ءۇشىن سوتتالدى

ول ءتيىستى ليتسەنزيا مەن سەرتيفيكاتسىز، ساقتاۋ مەرزىمى وتكەن فيللەردى قولدانىپ، كوسمەتيكالىق پروتسەدۋرالار جۇرگىزگەن. ناتيجەسىندە جابىرلەنۋشىنىڭ دەنەسىندە قابىنۋ پروتسەسى بولىپ، مەديتسينالىق كومەككە جۇگىنگەن.

«كىنالىگە 1 جىل 6 اي باس بوستاندىعىنان شەكتەۋ جازاسى تاعايىندالىپ، ءماجبۇرلى ەڭبەككە تارتىلىپ، مەديتسينالىق قىزمەتپەن اينالىسۋ قۇقىعىنان ايىرىلدى»، - دەلىنگەن حابارلامادا.

سوتتالعاننان جابىرلەنۋشىنىڭ پايداسىنا 5,8 ميلليون تەڭگە ماتەريالدىق جانە مورالدىق شىعىن ءوندىرىلدى.

ۇكىم زاڭدى كۇشىنە ەندى.

قالا پروكۋراتۋراسى ازاماتتاردى مەديتسينالىق پروتسەدۋرالاردى قابىلداۋ ءۇشىن تەك ليتسەنزياسى بار بىلىكتى ماماندارعا عانا جۇگىنۋدىڭ ماڭىزدىلىعى تۋرالى ەسكەرتەدى.