استاناداعى اۆتوبۋس اپاتى: اياعىنان ايىرىلعان قىزدىڭ وتباسىنا 20 ميلليون تەڭگەگە جۋىق تولەم جاسالدى

استانا. KAZINFORM - «ەۋرازيا» ساقتاندىرۋ كومپانياسى استانادا اۆتوبۋس اپاتى سالدارىنان ەكى اياعىنان ايىرىلعان قىز بالانىڭ وتباسىنا 19,66 ميلليون تەڭگە كولەمىندە جەدەل ساقتاندىرۋ تولەم جاسادى.

كومپانيا وكىلدەرىنىڭ تۇسىندىرۋىنشە، تولەم جولاۋشىلار تاسىمالداۋشىنىڭ ازاماتتىق-قۇقىقتىق جاۋاپكەرشىلىگى مىندەتىن ساقتاندىرۋ اياسىندا جاسالعان. اۆتوپاركتىڭ جاۋاپكەرشىلىگى «ەۋرازيا» ساقتاندىرۋ كومپانياسىندا ساقتاندىرىلعان.

بالاعا ۇزاق مەرزىمدى ەمدەۋ، وڭالتۋ جانە كەيىننەن پروتەز سالۋ قاجەت بولاتىنىن ەسكەرە وتىرىپ، كومپانيا زاڭنامادا كوزدەلگەن قۇجاتتار پاكەتى تولىق جينالعانىن جانە مۇگەدەكتىگى تۋرالى انىقتامانى كۇتپەي-اق، تولىق كولەمدە تولەم جاساۋ تۋرالى شەشىم قابىلدادى.

- تاسىمالداۋشىنىڭ جولاۋشىلار الدىنداعى ازاماتتىق- قۇقىقتىق جاۋاپكەرشىلىگىن مىندەتتى ساقتاندىرۋ تۋرالى زاڭعا سايكەس، ەگەر جول اپاتى سالدارىنان بالا مۇگەدەك بولىپ قالسا، 5000 ا ە ك مولشەرىندە، ياعني 19660000 تەڭگە كولەمىندە تولەم كوزدەلگەن. قازاقستاندا مۇگەدەكتىك انىقتاماسىن الۋ ءۇشىن مەديتسينالىق-الەۋمەتتىك ساراپتامادان ءوتۋ قاجەت، ول كوپ ۋاقىت الادى، - دەپ مالىمدەدى «ەۋرازيا» ساقتاندىرۋ كومپانياسىنىڭ وكىلدەرى.

سونداي-اق، كومپانيا ساقتاندىرۋ جاعدايىنان كەيىن زارداپ شەككەن اۆتوبۋس جولاۋشىلارى مەن ولاردىڭ وكىلدەرىنە ارنالعان جەدەل جەلى ۇيىمداستىرىلعانىن ەسكە سالدى. بارلىق جۇگىنگەن ازاماتقا ساقتاندىرۋ تولەمىن الۋ ءتارتىبى ءتۇسىندىرىلىپ، كەڭەس بەرىلدى.

بىرنەشە كۇن بۇرىن استانادا اۆتوبۋس جۇرگىزۋشىسى رولگە يە بولا الماي، جول جيەگىندەگى باعانعا سوقتىعىسقانى انىقتالدى.

جول اپاتىنان ءبىر زارداپ شەگۋشىنىڭ جاعدايى اۋىر ەكەنى، وتا جاسالاتىنى ايتىلدى. كەيىن زارداپ شەككەن 1 جولاۋشىنىڭ اياعىنا امپۋتاتسيا جاسالعانى بەلگىلى بولدى.

ايتا كەتەيىك، استاناداعى اۆتوبۋس اپاتىنان اياعىنان ايىرىلعان قىز بالا مەملەكەتتىك جاردەماقى الادى.

اۆتور

داۋلەت ىزتىلەۋ