استانادا ماس كۇيىندە كولىك ايداعان جۇرگىزۋشى پوليتسيادان قاشىپ، پاترۋلدىك كولىككە سوقتىعىستى

استانا. KAZINFORM - استانادا جۇرگىزۋشى كۋالىگىنەن ايىرىلعان ازامات ماس كۇيىندە كولىك باسقارىپ، پوليتسەيلەردەن قاشۋعا تىرىستى. ول بىرنەشە رەت جول قوزعالىسى ەرەجەسىن بۇزىپ، اقىرى پاترۋلدىك اۆتوكولىكپەن سوقتىعىسقان. بۇل تۋرالى استانا قالاسىنىڭ پروكۋراتۋراسى ءمالىم ەتتى.

پوليتسيا قىزمەتكەرلەرى توقتاۋ تالابىن قويعان ساتتە ەر ادام باعىنباي، وقيعا ورنىنان بوي تاسالاۋعا تىرىسقان. قاشۋ بارىسىندا جول قوزعالىسى ەرەجەلەرىن ورەسكەل بۇزىپ، اينالاداعى ادامداردىڭ ءومىرى مەن دەنساۋلىعىنا قاۋىپ توندىرگەن.

- قىلمىستىق ارەكەت پاترۋلدىك اۆتوكولىككە سوقتىعىسۋمەن اياقتالدى. بۇزاقى ۇستالىپ، ۋاقىتشا ۇستاۋ يزولياتورىنا قامالدى.

سوت ۇكىمىمەن ول كىنالى دەپ تانىلىپ، 4 جىل مەرزىمگە باس بوستاندىعىنان جانە ءومىر بويى كولىك باسقارۋ قۇقىعىنان ايىرىلدى. كەلتىرىلگەن ماتەريالدىق شىعىن سوتتالۋشى تاراپىنان تولىق وتەلگەن، - دەپ جازدى پروكۋراتۋرادان.

استانا قالاسىنىڭ پروكۋراتۋراسى كولىك جۇرگىزۋ قۇقىعىنان ايىرىلعان ادامنىڭ الكوگولدىك، ەسىرتكىلىك نەمەسە ۋىتقۇمارلىق ماس كۇيىندە كولىك باسقارۋى، سونداي-اق مۇنداي ادامعا كولىك قۇرالىن باسقارۋعا مۇمكىندىك بەرۋ - ق ر زاڭناماسىنا سايكەس، ءومىر بويى كولىك جۇرگىزۋ قۇقىعىنان ايىرا وتىرىپ، 10 جىلعا دەيىن باس بوستاندىعىنان ايىرۋ جازاسىنا اكەلەتىنىن ەسكەرتەدى.

ايتا كەتەيىك، بيىل كولىك پوليتسەيلەرى 20 ميلليون جولاۋشىنىڭ قاۋىپسىزدىگىن قامتاماسىز ەتتى.