استانا اكىمدىگى جول ءجۇرۋ اقىسى قىمباتتاۋىنىڭ سەبەبىن ءتۇسىندىردى

استانا. KAZINFORM - ەلوردادا بيىل 1-تامىزدان باستاپ قوعامدىق كولىكتە جول ءجۇرۋ اقىسى 110 تەڭگەگە قىمباتتايدى. ون جىل بويى توقسان تەڭگە تولەپ كەلگەن تۇرعىندار تاريفتىڭ كوتەرىلۋىن قۇپتاپ وتىرعان جوق. اكىمدىك بولسا، وزگەرىستىڭ وزىندىك سەبەبى بار ەكەنىن العا تارتىپ وتىر.

استانا قالاسى كولىك جانە جول- كولىك ينفراقۇرىلىمىن دامىتۋ باسقارماسىنىڭ باس مامانى ءاليحان كەرىمجاننىڭ ايتۋىنشا، تاريف 10 جىل بويى وزگەرمەگەن. ال بۇل ۋاقىتتا تاسىمالداۋشىلاردىڭ شىعىنى ارتا تۇسكەن.

«كەيىنگى 10 جىل ىشىندە تاسىمالداۋشىلار كوپتەگەن شىعىنعا تاپ كەلگەنىن العا تارتىپ وتىر. مىسالى، ديزەل وتىنىنىڭ قۇنى 2014 -جىلى 107 تەڭگەنى قۇراسا، بۇگىندە 295 تەڭگەگە تەڭ. اۆتوبۋس جۇرگىزۋشىلەردىڭ جالاقىسىنا توقتالساق، 2014 -جىلى 100-150 مىڭ تەڭگە بولسا، قازىرگى تاڭدا 500-600 مىڭ تەڭگەنى قۇرايدى»، - دەدى ول.

ايتا كەتەيىك، استانادا جولاۋشىلاردى تاسىمالداۋعا 8 اۆتوبۋس پاركى جۇمىلدىرىلعان. ولاردىڭ بارلىعى مەملەكەت تاراپىنان سۋبسيديا الىپ وتىر. تاريفتىڭ قىمباتتاۋى تاسىمالداۋشىلارعا ۇلەستىرىلەتىن سۋبسيديانى شامامەن 15 پايىزعا ازايتادى دەپ كۇتىلىپ وتىر.

قالا بەردى، تاسىمالداۋشىلار تەحنيكا پاركىن جاڭارتۋعا مىندەتتەلمەك. بيىلدىڭ وزىندە سۋ جاڭا 200 اۆتوبۋس قاتارعا قوسىلادى دەپ جوسپارلانۋدا.

ەستەرىڭىزگە سالساق، ەلوردا اكىمى جەڭىس قاسىمبەك تۇرعىندارمەن كەزدەسۋدە جازدا استاناداعى جول ءجۇرۋ اقىسى 20 تەڭگەگە قىمباتتايتىنىن ايتقان بولاتىن.

اۆتور

ورالحان قوجانوۆ