تولىعىراق قازاقپارات ساراپشىسىنىڭ شولۋ ماقالاسىندا.
Eureporter.co: قازاقستان مەن شۆەيتساريا ەكىجاقتى ارىپتەستىكتى قايتا قارادى
13-شىلدەدە Eureporter باسىلىمى ق ر پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ قازاقستانعا رەسمي ساپارمەن كەلگەن شۆەيتساريا كونفەدەراتسياسىنىڭ فەدەرالدى كەڭەسشىسى، سىرتقى ىستەر دەپارتامەنتىنىڭ باسشىسى ينياتسيو كاسسيسپەن كەلىسسوزدەر جۇرگىزگەنى تۋرالى جازدى.
تاراپتار قازاقستان- شۆەيتساريا قاتىناستارىنىڭ سەرپىندى دامۋىن قۇپتاي وتىرىپ، ساياسي، ساۋدا- ەكونوميكالىق، ينۆەستيتسيالىق، مادەني- گۋمانيتارلىق، عىلىمي- تەحنيكالىق جانە تۋريستىك سالالارداعى ءوزارا ءتيىمدى ىنتىماقتاستىقتىڭ جاي- كۇيى مەن دامۋ پەرسپەكتيۆالارىن، حالىقارالىق جانە وڭىرلىك كۇن تارتىبىندەگى ماسەلەلەردى تالقىلاعان. ولار بىلتىرعى ءوزارا ساۋدانىڭ 1,4 ميلليارد دوللارعا جەتكەنىن جوعارى باعالادى. سونىمەن قاتار شۆەيتساريا قازاقستان ەكونوميكاسىنا 31 ميلليارد دوللاردان استام ينۆەستيتسيا سالىپ، قازاقستاننىڭ ەڭ ءىرى ينۆەستورلارىنىڭ ۇشتىگىنە كىرەتىنىن دە اتاپ ءوتتى.
قازىرگى تاڭدا قازاقستاندا Novartis, Glencore International, Clariant, Roche Holding, SGS، ABB، Sika, Bühler Group جانە Stadler Rail سياقتى 300-گە جۋىق شۆەيتساريالىق كومپانيا جۇمىس ىستەيدى.
Mining-technology: رەسەيلىك Polymetal قازاقستانداعى «باقسى» كەن ورنىنىڭ 75 پايىز ۇلەسىن ساتىپ الدى
11-شىلدەدە Mining-technology باسىلىمى رەسەيدەگى ەڭ ءىرى كۇمىس جانە التىن ءوندىرۋشى كاسىپورىن «Polymetal International plc» كومپانياسى جوبا سەرىكتەستەرىنىڭ ءبىرىنىڭ ۇلەسىن ساتىپ الۋ وپتسيونىن جۇزەگە اسىرۋ ارقىلى «باقسى» كەن ورنىنداعى (قازاقستان) ۇلەسىن 75 پايىزعا دەيىن ۇلعايتقانى تۋرالى جازعان.
وپتسيوندى ۇيىمداستىرۋعا دەيىن Polymetal قازاقستاندىق جوبانىڭ 7,5 پايىز اكتسياسىنا عانا يە بولعان. وپتسيوندى ىسكە اسىرۋ ناتيجەسىندە 7,5 پايىزدان 75 پايىزعا دەيىن ۇلعايتىلدى. قالعان 25 پايىز «قازگەولوگيا» ا ق مەملەكەتتىك كومپانياسىنا تيەسىلى.
«باقسى» كەن ورنى مىس جانە التىن اكتيۆتەرىن دامىتۋ جانە قازاقستانداعى ۇلەسىمىزدى كوبەيتۋگە قاتىستى ءبىزدىڭ ماقساتتارىمىزعا سايكەس كەلەدى. ءبىز بەلسەندى بارلاۋدى جالعاستىرۋدى، مينەرالدى رەسۋرستاردى JORC ستاندارتى بويىنشا باعالاۋدى جوسپارلاپ وتىرمىز. سونىمەن قاتار 2024 -جىلى ءوندىرىستى باستاۋدى جوسپارلاپ وتىرمىز»، - دەپ ءتۇسىندىردى Polymetal International plc باس ديرەكتورى ۆيتالي نەسيس.
ۋچاسكەنىڭ الاڭى 776 شارشى شاقىرىمدى قۇرايدى، ول سولتۇستىك قازاقستان وبلىسىندا، كومپانيا مەنشىگىندەگى ۆارۆارين توراپىنان 300 شاقىرىم جەردە ورنالاسقان.
Caspiannews.com: «قازاقتەلەكوم» جانە «AzerTelecom» ترانسكاسپي تالشىقتى- وپتيكالىق جوباسىن ىسكە اسىرۋ ءۇشىن كەلىسىمگە قول قويدى
11-شىلدەدە Caspiannews باسىلىمى قازاقستان مەن ازەربايجاننىڭ جەتەكشى تەلەكوم- وپەراتورلارى ترانسكاسپي تالشىقتى- وپتيكالىق بايلانىس جەلىسىن (ت و ب ج) سالۋ جانە پايدالانۋ ءۇشىن بىرلەسكەن كاسىپورىن قۇرۋ تۋرالى اكتسيونەرلەردىڭ كەلىسىمىنە قول قويعانى جايلى جازدى.
«قازاقتەلەكوم» ا ق تاراپىنان قۇجاتقا قازاقستاننىڭ جەتەكشى تەلەكوم- وپەراتورى قۋانىشبەك ەسەكەيەۆ، ازەربايجان تاراپىنان «AzerTelecom» قۇرامىنا كىرەتىن NEQSOL Holding تەلەكوممۋنيكاتسيالىق بولىمشەسىنىڭ باسشىسى ۆاسيل لاتسانيچ قول قويدى. بۇل قۇجات قازاقستان- ازەربايجان باعىتى بويىنشا ترانسكاسپي تالشىقتى- وپتيكالىق بايلانىس جەلىسىن سالۋ جانە پايدالانۋ جونىندەگى بىرلەسكەن كاسىپورىننىڭ ماقساتى مەن مىندەتتەرىن ايقىندايدى.
قۋانىشبەك ەسەكەيەۆ ءوز كەزەگىندە بۇل سالادا كوشباسشى رەتىندە تانىلعان «قازاقتەلەكوم» مەن «AzerTelecom» بۇل جوبانىڭ ترانسفورماتسيالىق الەۋەتىن تولىق تۇسىنەتىنىن ءارى ونى دامىتۋعا الەۋەتى جەتەتىنىن ايتتى.
Akipress.com: ق ر پرەمەر-ءمينيسترى ەكولوگيا مينيسترلىگىنە قىرعىزستان جانە وزبەكستانمەن سۋارۋعا ارنالعان سۋدى جەتكىزۋدى ۇلعايتۋ تۋرالى كەلىسسوزدەر جۇرگىزۋدى تاپسىردى
Akipress باسىلىمى 13-شىلدەدە قازاقستان ۇكىمەتى ەلدىڭ وڭتۇستىك وڭىرلەرىنىڭ اۋىل شارۋاشىلىعى تاۋارىن وندىرۋشىلەرىن سۋمەن قامتاماسىز ەتۋ ماسەلەسىن تالقىلاعانى تۋرالى جازعان.
ق ر ۇكىمەت باسشىسى مەملەكەتارالىق نىسانداردى سۋمەن قامتاماسىز ەتۋ بويىنشا كەلىسىلگەن كەستەلەردى ساقتاۋدىڭ، سونداي-اق سۋ رەسۋرستارىن پايدالانۋ بويىنشا كورشىلەس ەلدەرمەن بىرلەسكەن ۇيلەسىمدى جۇمىستىڭ ماڭىزدىلىعىن اتاپ وتكەن. پرەمەر-مينيستر سۋدى ىسىراپ ەتپەي، جالپى اگرارلىق-ونەركاسىپتىك كەشەنگە سۋ ۇنەمدەۋ تەحنولوگيالارىن ەنگىزۋ ءۇشىن ەلىمىزدەگى گيدروتەحنيكالىق قۇرىلىستاردى رەكونسترۋكتسيالاۋ، جاڭعىرتۋ جانە سيفرلاندىرۋ جۇمىستارىن كۇشەيتۋدى تاپسىردى.
ماسەلەنى شەشۋ ءۇشىن قازاقستان پرەمەر-ءمينيسترى ەكولوگيا مينيسترلىگىنە قىرعىزستانمەن جانە وزبەكستانمەن سۋارۋ سۋىن جەتكىزۋدى ۇلعايتۋ تۋرالى كەلىسسوزدەر جۇرگىزۋدى تاپسىردى.
Trend.az: وزبەكستان مەملەكەتى قازاقستاندا اۋىل شارۋاشىلىعى تەحنيكاسىن قۇراستىراتىن ءىرى زاۋىتتار سالۋدى جوسپارلاپ وتىر
Trend باسىلىمى 14-شىلدەدە وزبەكستان مەملەكەتى ازەربايجان مەن قازاقستاندا اۋىل شارۋاشىلىعى تەحنيكالارىن قۇراستىراتىن ءىرى زاۋىتتار سالۋدى جوسپارلاپ وتىرعانىن حابارلادى. بۇل تۋرالى وزبەكستاننىڭ ينۆەستيتسيالار، يندۋستريا جانە ساۋدا ءمينيسترىنىڭ ورىنباسارى وليمحون رۋستاموۆ تاشكەنت وبلىسى شىرشىق قالاسىنداعى اۋىلشارۋاشىلىق تەحنيكالارىن شىعاراتىن كاسىپورىندارعا ساپارى بارىسىندا ءمالىم بولعان.
«ونەركاسىپتىك كووپەراتسيانى كەڭەيتۋ ماقساتىندا قازاقستان مەن ازەربايجاندا اۋىل شارۋاشىلىعى تەحنيكاسىنىڭ اۋقىمدى قۇراستىرۋ وندىرىستەرىن قۇرۋدى جوسپارلاپ وتىرمىز. سەرىكتەستەرمەن كەلىسسوزدەر اياقتالۋ ساتىسىندا»، - دەپ حابارلادى مينيسترلىك.
2023 -جىلدىڭ قاڭتارىندا ءبىرىڭعاي جوبا - «تاشكەنت تراكتور زاۋىتى» ج ش ق كلاستەرى ىسكە قوسىلعان. جوبانىڭ جالپى قۇنى 65 ميلليون دوللاردى قۇرادى.
الىنعان مالىمەتتەرگە سايكەس، كومپانيا ءوز ونىمدەرىن كورشى ەلدەرگە، سونىڭ ىشىندە قازاقستان، قىرعىزستان، تۇرىكمەنستان، تاجىكستان جانە ازەربايجانعا ەكسپورتتايدى.
Eurasiareview: بيىل قازاقستان شانحاي ىنتىماقتاستىق ۇيىمىنا ءتوراعالىق ەتەدى
Eurasiareview باسىلىمىندا جاريالانعان ماقالادا قازاقستاننىڭ 2023 -جىلدىڭ-شىلدەسىنەن 2024 -جىلدىڭ-شىلدەسىنە دەيىن ش ى ۇ ءتوراعالىعى كەزىندەگى الەۋەتى قاراستىرىلىپ، ونىڭ ايماقتىق سىن- قاتەرلەردى شەشۋگە، مۇشە مەملەكەتتەر اراسىنداعى ىنتىماقتاستىقتى نىعايتۋعا جانە ايماقتىق تۇراقتىلىق پەن دامۋعا جاردەمدەسۋگە باعىتتالعان كۇش- جىگەرى تۋرالى باياندالعان. قىتاي، رەسەي، قىرعىزستان، تاجىكستان جانە وزبەكستانمەن بىرگە شانحاي ىنتىماقتاستىق ۇيىمىنىڭ (ش ى ۇ) قۇرىلتايشى مۇشەلەرىنىڭ ءبىرى قازاقستان 2001 -جىلى ش ى ۇ جارعىسىنا قول قويىپ، ايماقتىق ىنتىماقتاستىقتىڭ نەگىزىن قالادى. قازاقستان شانحاي ىنتىماقتاستىق ۇيىمىنىڭ (ش ى ۇ) نەگىزىن قالاۋشى رەتىندە ايماقتىق ىنتىماقتاستىقتى، قاۋىپسىزدىك پەن تۇراقتىلىقتى ىلگەرىلەتۋدە ماڭىزدى ءرول اتقاردى. قازاقستاننىڭ شانحاي ىنتىماقتاستىق ۇيىمىنا (ش ى ۇ) الداعى ءتوراعالىعى ش ى ۇ ءۇشىن دە، ايماق ءۇشىن دە ماڭىزدى. قازاقستان 2023 -جىلدىڭ-شىلدەسىنەن 2024 -جىلدىڭ-شىلدەسىنە دەيىن ش ى ۇ-عا كەزەكتى ءتوراعالىق ەتەدى، بۇل ىنتىماقتاستىقتى ىلگەرىلەتۋگە، ايماقتىق ينتەگراتسيانى نىعايتۋعا جانە تۋىندايتىن مىندەتتەردى شەشۋگە مۇمكىندىك بەرەدى.
اۆتور:
ۆەنەرا جولامان قىزى