جاس كاسىپكەر قۇرىلىس سالاسىنا وزىق تەحنولوگيالاردى الىپ كەلۋدى قالايدى - «Kaznews»
بايان-ولگي ايماعىندا قۇرىلىس ينجەنەرينگ سالاسىنىڭ جاڭا بۋىنى قالىپتاسىپ كەلەدى. ولاردىڭ ءبىرى جانە بىرەگەيى «Happy Town» دەپ اتالاتىن تۇرعىن ءۇي قۇرىلىسىن سالىپ، ەل اراسىندا تانىمال بولعان جاس كاسىپكەر بەگارىس الدانىش ۇلى ەكەنى بەلگىلى، دەپ حابارلايدى موڭعوليانىڭ «Kaznews» اقپاراتتىق پورتالى.
بەگارىس الدانىش ۇلى تۋعان جەرىنە تۋ تىگىپ، ولگي قالاسىنىڭ وركەندەۋىنە قالاي ۇلەس قوسۋعا بولاتىنى جايلى ايتىپ، سۇحبات بەرگەن.
موڭعوليالىق ب ا ق-تىڭ مالىمەتىنشە، جاس كاسىپكەر بەگارىس ينجەنەر بولۋدى بالا كەزىنەن ارمانداعان. ۇلانباتىر قالاسىنداعى عىلىم تەحنولوگيا مەملەكەتتىك ۋنيۆەرسيتەتىن قۇرىلىس ينجەنەرى ماماندىعى بويىنشا ءتامامداعان. كەيىننەن الماتى قالاسىندا ماماندىعىن جەتىلدىرىپ، قۇرىلىس ماتەريالدارىنىڭ ينجەنەرى ماگيستراتۋراسىن قورعاعان. الماتى قالاسىندا بيزنەستى جۇيەلى تۇردە الىپ جۇرۋگە تاجىريبە جيناقتاپ، ءبىلىمىن جەتىلدىرەدى.
ونىڭ قۇرىلىس سالاسىنا قىزىعۋعا سەبەپكەر بولۋى سۋرۋگا كومپانياسىمەن تىكەلەي بايلانىستى. اتالمىش كومپانيادان جاپونيالىق ءادىستى ۇيرەنىپ، ءوز كومپانياسىنا ەنگىزگەن.
جاس كاسىپكەر بۇل جولعى بەرگەن سۇحباتىندا قازىرگە دەيىنگى جەتكەن جەتىستىكتەرى تۋرالى ءوز ويلارىن ايتىپ بەرگەن.
بيىل «الاشانكوۋداعى» سىرتقى ساۋدا اينالىمى ەڭ جوعارى دەڭگەيگە جەتتى - People.cn
ءتىلشىنىڭ «الاشانكوۋ» كەدەنىنەن العان اقپاراتىنا سايكەس، وسى جىلدىڭ العاشقى بەس ايىندا «الاشانكوۋ» تەمىرجول مەن اۆتوموبيل پورتىنداعى يمپورتتىق جانە ەكسپورتتىق جۇكتەردىڭ كولەمى بەس جىل كولەمىندە سايكەس كەزەڭدەگى ەڭ جوعارى دەڭگەيگە جەتكەن. اتالعان كەدەن بەكەتىنىڭ يمپورتتىق جانە ەكسپورتتىق جۇكتەردىڭ كولەمى وتكەن جىلدىڭ سايكەس كەزەڭىمەن سالىستىرعاندا 24,7 پايىزعا وسكەن، دەپ حابارلايدى قىتايدىڭ «People.cn» اقپاراتتىق پورتالى.
اتالعان باسىلىمنىڭ دەرەگىنشە، وسى جىلدىڭ العاشقى بەس ايىندا «الاشانكوۋ» تەمىرجول پورتىنىڭ يمپورتتىق جانە ەكسپورتتىق جۇكتەرىنىڭ كولەمى 5,627 ميلليون توننا بولىپ، وتكەن جىلدىڭ سايكەس مەزگىلىمەن سالىستىرعاندا 21 پايىزعا ۇلعايعان. ونىڭ ىشىندە يمپورتتىق جۇكتەردىڭ كولەمى 4,093 ميلليون توننا بولىپ، وتكەن جىلدىڭ سايكەس كەزەڭىمەن سالىستىرعاندا 24,2 پايىزعا ارتقان. ال، ەكسپورتتىق جۇكتەردىڭ كولەمى 1,534 ميلليون توننا بولىپ، وتكەن جىلعى كورسەتكىشپەن سالىستىرعاندا 13,2 پايىزعا ءوستى.
اتاپ ايتقاندا، اۆتوموبيل پورتىنىڭ يمپورتتىق جانە ەكسپورتتىق جۇكتەرىنىڭ كولەمى 250000 تونناعا جەتكەن. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 300,5 پايىزعا ۇلعايعانىن كورسەتتى.
تۇرىكسويدىڭ مەرەكەلىك ءىس- شارالارى باستالدى - «TRT»
وزبەكستاندا تۇرىكسويدىڭ مەرەكەلىك ءىس-شارالارى باستالدى. حالىقارالىق تۇرىكسوي ۇيىمىنىڭ 30 جىلدىعىنا ارنالعان مەرەكەلىك ءىس-شارالار وزبەكستاننىڭ باس قالاسى تاشكەنتتە باستالدى، دەپ حابارلايدى تۇركيا راديو تەلەۆيزيا پورتالى.
اتالعان اقپارات كوزىنىڭ كەلتىرگەن دەرەگىنە سۇيەنسەك، مەرەكەلىك شارالار اياسىندا «تۇرىكسوي مادەنيەت كۇندەرى» ءوتتى.
شارادا وزبەكستان مەملەكەتتىك كوركەم ونەر مۇراجايىندا تۇرىك الەمىنە قاتىستى كارتينا، فوتوسۋرەت جانە قولونەر بۇيىمدارىنىڭ كورمەسى اشىلعان.
اتالمىش حالىقارالىق مەرەكەلىك باسقوسۋدا وزبەكستان مادەنيەت جانە تۋريزم ءمينيسترى وزودبەك نازاربەكوۆ ءوز پىكىرىن بىلدىرگەنى ايتىلادى.
ايتا كەتەيىك، ءىس-شارا اياسىندا قوناقتارعا تۇرىك الەمىنىڭ تاعامدارى ۇسىنىلدى.
سونداي-اق، وسى اپتادا تۇركيالىق باق- تا بىشكەكتە «جاس تۇركولوگتەردىڭ جازعى مەكتەبى» جالعاسۋدا» دەگەن تاقىرىپتاعى اقپارات جاريالاندى.
«TRT» - نىڭ دەرەگىنشە، بىشكەكتەگى قىرعىزستان- تۇركيا «ماناس» ۋنيۆەرسيتەتىندە حالىقارالىق تۇرىك اكادەمياسىنىڭ «جاس تۇركولوگتەردىڭ جازعى مەكتەبى» جالعاسىپ جاتىر.
باعدارلاماعا قاتىسۋ ءۇشىن ءوتىنىش بەرگەن 226 جاس عالىمنىڭ ىشىنەن 30 جاس عالىم جولداما العان. جاس عالىمدار تۇرىك الەمىنىڭ ورتاق مادەنيەتى، تاريحى مەن ادەبيەتىن تالقىلايدى.
قازاقستان لاستاۋشى گازداردى ازايتۋعا بەت بۇردى - «Parstoday»
قازاقستان لاستاۋشى گازداردى ازايتۋ جونىندەگى حالىقارالىق مىندەتتەمەلەرىنە سايكەس الماتى-2 ەلەكتر ستانسياسىندا كومىر مەن ەلەكتر ەنەرگياسىن گازعا اۋىستىردى، دەپ جازدى «Parstoday» اقپارات اگەنتتىگى.
يراندىق ب ا ق-تىڭ ا ك ي (قىرعىزستان) اقپارات اگەنتتىگىنىڭ مالىمەتىنە سىلتەمە جاساپ حابارلاۋىنشا، ازيا دامۋ بانكى مەن الماتى ەلەكتر ورتالىعى 9-ماۋسىمدا بۇل جوباعا 219 ميلليون دوللارلىق كەلىسىمشارتقا قول قويعان. بۇل جوبانىڭ جۇزەگە اسۋىمەن كومىر جانە ەلەكترمەن بىرىكتىرىلگەن وتىنمەن جۇمىس ىستەيتىن الماتى-2 ەلەكتر ءوندىرۋ ورتالىعى جاڭارتىلدى.
ايتا كەتەيىك، ازيا دامۋ بانكى ءقازىر وسى ەلەكتر ستانتسياسىن جاڭعىرتۋ جوباسىنىڭ ءۇشىنشى ينۆەستيسيالىق سەرىكتەسى بولىپ تابىلادى.
«كومىردى ەلەكتر ستانسيالارىندا پايدالانۋعا بايلانىستى قازاقستان الەمدەگى ەڭ لاستانعان جانە لاستاۋشى گازداردى ەڭ كوپ وندىرەتىن ەلدەردىڭ ءبىرى بولىپ تابىلادى. سيفرلىق اقشانى ءوندىرۋ ەلەكتر ەنەرگياسىن جوعارى تۇتىنۋمەن مۇمكىن بولادى جانە بۇل ەل الەمدەگى كريپتوۆاليۋتا وندىرەتىن ءۇش ءىرى ەلدىڭ ءبىرى بولىپ تابىلادى. وسى سەبەپتى قازاقستاننىڭ كومىر ەلەكتر ستانسيالارى ماكسيمالدى قۋاتىندا ەلەكتر ەنەرگياسىن وندىرۋدە. بۇل ەل ەڭ ماڭىزدى ءىرى ەلەكتر ستانسيالارىنىڭ بىرىندە كومىردى پايدالانۋدى توقتاتتى»، دەپ تۇيىندەيدى يراندىق باسىلىم.
وزبەكستاننىڭ سىرتقى ساۋدا اينالىمىندا قازاقستان ءۇشىنشى ورىندا تۇر - «ءوز ا»
2023 -جىلدىڭ قاڭتار- مامىر ايلارىندا وزبەكستاننىڭ سىرتقى ساۋدا اينالىمىندا قىتاي ەلى كوش باستاپ تۇر. سەرىكتەس ەلدەر اراسىندا قىتايدىڭ جوعارى ۇلەسى - 4,5 ميلليارد دوللار. ستاتيستيكا اگەنتتىگىنىڭ الدىن الا مالىمەتى بويىنشا، ودان كەيىنگى ورىنداردا تاۋار اينالىمى تيىسىنشە 3,8 ميلليارد جانە 1,9 ميلليارد دوللار بولاتىن رەسەي مەن قازاقستان تۇر، دەپ حابارلايدى «ءوز ا» اقپاراتتىق اگەنتتىگى.
بۇل كورسەتكىشتى ارى قاراي تۇركيا (1,3 ميلليارد)، كورەيا (1,0 ميلليارد)، گەرمانيا (894 ميلليون) قاتارلى ەلدەر جالعاستىرعان.
سونداي-اق، وسى اپتادا «وزبەكستاندا قازاقستان مادەنيەتى كۇندەرى ءوتىپ جاتىر» دەگەن تاقىرىپتاعى اقپارات جارىق كوردى.
2023 -جىلدىڭ 20-24-ماۋسىمىندا تاشكەنت، سامارقاند، بۇحارا قالالارىندا قازاقستان مادەنيەتى كۇندەرى، 20-23-ماۋسىم ارالىعىندا تاشكەنتتە قازاق كينوسىنىڭ كۇندەرى وتەدى، دەپ حابارلانعان «ءوز ا» اقپاراتتىق اگەنتتىگى.
وزبەكستاندىق باسىلىمنىڭ مالىمەتىنشە، اتالعان مادەني شارا باعدارلاماسىنا سايكەس، 20-ماۋسىم كۇنى تاشكەنتتەگى «تۇركىستان» ونەر سارايىندا قازاقستاننىڭ مادەنيەت كۇندەرىنىڭ اشىلۋ سالتاناتى جانە ر. باعلانوۆا اتىنداعى «قازاق كونسەرت» مەملەكەتتىك مەكەمەسىنىڭ شىعارماشىلىق توبىنىڭ كونسەرتتىك باعدارلاماسى وتەدى.
كونسەرتتىك باعدارلامادا قازاقستان رەسپۋبليكاسىنىڭ ەڭبەك سىڭىرگەن قايراتكەرى الىشەر كارىموۆ، حالىقارالىق بايقاۋلاردىڭ لاۋرەاتتارى رۋحيا بايدۇكەنوۆا، ءمادي سىزدىقوۆ، «گۇلدەر»، «تۇران» فولكلورلىق-ەتنوگرافيالىق انسامبلدەرى ونەر كورسەتەدى.
سونىمەن قاتار، 20-23-ماۋسىم ارالىعىندا وتەتىن كينو كۇندەرى اياسىندا تاشكەنتتەگى الىشەر ناۋاي اتىنداعى كينوتەاتر زالدارىندا «سۇلتان بەيبارىس»، «مۇقاعالي»، «دوس- مۇقاسان»، «ۆرەميا پاتريوتوۆ»، «پاراليمپياداشى»، «نا ستارتە»، «لەتو 1941 گودا» كوركەم فيلمدەرى، «كەنجە قىز»، «بەسىك جىرى»، «امەن اعا اعاشى» مۋلتفيلمدەرى كورسەتىلەدى.
ايتا كەتەيىك، الىشەر ناۋاي اتىنداعى وزبەكستان مەملەكەتتىك اكادەميالىق ۇلكەن تەاترىندا قازاقستاننىڭ مادەنيەت كۇندەرىنىڭ جابىلۋ سالتاناتى مەن اباي اتىنداعى قازاق ۇلتتىق وپەرا جانە بالەت تەاترىنىڭ «اباي» سپەكتاكلى قويىلۋى كوزدەلگەن.
اۆتور:
بەيسەن سۇلتان