تارازدا جازعى سپارتاكيادا باستالدى

تاراز. قازاقپارات - تارازدا قازاقستان رەسپۋبلياسىنىڭ Ⅵجازعى سپارتاكياداسىنىڭ سالتاناتتى اشىلۋ ءراسىمى ءوتىپ جاتىر، دەپ حابارلايدى قازاقپارات ءتىلشىسى.

سالتاناتتى راسىمگە ق ر مادەنيەت جانە سپورت ءمينيسترى اسحات ورالوۆ ارنايى كەلدى.

ءىس-شارا جوعارى وقۋ ورىندارى جانكۇيەر ستۋدەنتتەرىنىڭ شەرۋىمەن باستالدى. مۇنان سوڭ ەلىمىزدىڭ تۇكپىر-تۇكپىرىنەن كەلگەن سپورتشىلار قۇراما كوماندالارى ورتاعا شىقتى.

ەسكە سالا كەتەيىك، حانجوۋدا وتەتىن ⅩⅨ جازعى ازيا ويىندارىنىڭ جانە 2024-جىلى پاريجدە وتەتىن وليمپيادا ويىندارىنىڭ قارساڭىندا ۇيىمداستىرىلىپ وتىرعان VI جازعى سپارتاكيادا 2003-جىلدان باستاپ ءار 4 جىل سايىن جازعى وليمپيادا ويىندارىنىڭ قارساڭىندا وتكىزىلەدى.

ويىندارعا ەلىمىزدىڭ بۇكىل وڭىرىنەن 27 سپورت ءتۇرى بويىنشا 10 مىڭنان اسا سپورتشى قاتىسىپ، باق سىنايدى.

مۇندا گرەك-ريم كۇرەسى، ايەلدەر كۇرەسى، ەركىن كۇرەس، تاەكۆوندو، ۇستەل تەننيسى، ترەكتەگى ۆەلوسيپەد سپورتى، سەمسەرلەسۋ، سپورتتىق گيمناستيكا، باتۋت گيمناستيكاسى، بوكس (ايەلدەر)، باسكەتبول (ەرلەر، ايەلدەر)، كوركەم گيمناستيكا، ۆولەيبول (ەرلەر، ايەلدەر)، دزيۋدو (ەرلەر، ايەلدەر)، سۋ دوبى (ەرلەر، ايەلدەر)، قول دوبى (ەرلەر، ايەلدەر)، ساداق اتۋ، بايداركا مەن كانوەدە ەسۋ، ءجۇزۋ، ۆەلوسيپەد سپورتى (تاس جول)، جەڭىل اتلەتيكا، اۋىر اتلەتيكا، وقپەن اتۋ، تەننيس، ترياتلون، ستەند اتۋ، بوكس (ەرلەر) سىندى سپورت تۇرلەرىنەن جۇلدەلەر ساراپقا سالىنادى.

سپارتاكيادا باعدارلاماسىنا ەنەتىن 27 سپورت ءتۇرىنىڭ 3 سپورت ءتۇرى تاراز قالاسىندا وتەدى.

ولار - سۋ دوبى (ەرلەر، ايەلدەر)، ۆولەيبول (ەرلەر، ايەلدەر) جانە دزيۋدو (ەرلەر، ايەلدەر).

ايتا كەتەيىك، بۇعان دەيىن قازاقستاننىڭ VI جازعى سپارتاكياداسىنىڭ اشىلۋ ءراسىمى تارازدا وتەتىنىن حابارلاعان بولاتىنبىز.