التىننىڭ قىزىل، القىزىل، جاسىل، كوك، ءتىپتى قارا تۇستەرى دە بولادى. بۇگىندە كوپتەگەن بەلگىلى زەرگەرلىك ۇيلەر ءتۇرلى-ءتۇستى التىندى كەڭىنەن پايدالانادى.
مامانداردىڭ ايتۋىنشا، ءتۇرلى-ءتۇستى التىننىڭ سارى التىننان سىناماسى تومەن بولمايدى. نەگىزىنەن، ءتۇرلى-ءتۇستى التىندى قولدانۋ سوناۋ XIX عاسىردا، ياعني وسميي، روديي، پاللاديي سەكىلدى قىمبات مەتالدار اشىلعان كەزدە باستاۋ العان. التىنعا وسى مەتالدار بالقىتىلىپ قوسىلاتىن بولعان. الايدا بۇل قوسپالار التىننىڭ سىناماسىنا جانە زەرگەرلىك بۇيىمداردىڭ ساپاسىنا كەرى اسەر ەتپەيدى.
زەرگەرلىك كاسىپتە ەشقاشان تازا ساف التىن قولدانىلمايدى. 585 سىنامالى التىندا تازا التىننىڭ ۇلەسى 58،5 پايىز، ال 750 سىنامالى التىندا 75 پايىز. ءتۇرلى-ءتۇستى التىننان جاسالاتىن زەرگەرلىك بۇيىمدار، نەگىزىنەن، 750 سىنامالى بولىپ كەلەدى. زەرگەرلىك تىلدە ءتۇرلى-ءتۇستى قوسپا ليگاتۋرا دەپ اتالادى. ەڭ كەڭ تارالعان ليگاتۋرالار - كۇمىس پەن مىس. اق التىن ال ءۇشىن پاللادي مەن پلاتينا پايدالانىلادى، القىزىل جانە قىزىل التىننىڭ قۇرامىندا - مىس، جاسىل التىن الۋ ءۇشىن بەلگىلى ءبىر مولشەردە كۇمىس، مىرىش، پاللاديي، كوگىلدىر التىندا - يندي مەن رودي، سياكوك التىندا - اليۋميني مەن كالي، قارا التىندا كوبولت پەن حروم قوسپالارى قولدانىلادى.