قوسشى قالاسىنىڭ شەكاراسى بەلگىلەندى

استانا. قازاقپارات - ۇكىمەت ەلوردا ىرگەسىندەگى قوسشى قالاسىنىڭ اۋماعىن بەلگىلەۋگە قاتىستى قاۋلى شىعاردى، دەپ حابارلايدى قازاقپارات ءتىلشىسى.

«وسى قاۋلىعا قوسىمشاعا سايكەس «اقمولا وبلىسى قوسشى قالاسىنىڭ شەكاراسىن بەلگىلەۋ تۋرالى» اقمولا وبلىسى اكىمدىگىنىڭ 2022 -جىلعى 23-قاراشاداعى № ا-11/554 بىرلەسكەن قاۋلىسىنا جانە اقمولا وبلىستىق ءماسليحاتىنىڭ 2022 -جىلعى 23-قاراشاداعى №7س-22-3-شەشىمىنە كەلىسىم بەرىلسىن»، - دەلىنگەن ق ر ۇكىمەتىنىڭ 2022 -جىلعى 21-جەلتوقسانداعى №1041-قاۋلىسىندا.

قۇجات «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» زاڭنىڭ 11-بابى 2-تارماقشاسىنا سايكەس قابىلدانعان. ول 10 كۇننەن سوڭ كۇشىنە ەنەدى.

ەسكە سالا كەتەيىك، 2021 -جىلعى 27-شىلدەدە ق ر پرەزيدەنتى قاسىم-جومارت توقايەۆ اقمولا وبلىسىنىڭ اكىمشىلىك-اۋماقتىق قۇرىلىسىنداعى وزگەرىستەر تۋرالى جارلىققا قول قويدى.

«قازاقستان رەسپۋبليكاسىنىڭ اكىمشىلىك- اۋماقتىق قۇرىلىسى تۋرالى» قازاقستان رەسپۋبليكاسىنىڭ 1993 -جىلعى 8-جەلتوقسانداعى زاڭىنىڭ 9-بابىنا سايكەس اقمولا وبلىسىنىڭ سەلينوگراد اۋدانى ودان وبلىستىق ماڭىزى بار قالا مارتەبەسىن العان قوسشى اۋىلىن ءبولۋ جولىمەن قايتا ۇيىمداستىرىلدى.

بىلتىر 23-تامىزدا اقمولا وبلىسى اكىمىنىڭ وكىمىمەن قوسشى قالاسىنىڭ اكىمى بولىپ عايدار قاسەنوۆ تاعايىندالدى.

قوسىمشا ايتا كەتەيىك، قوسشى قالاسىنىڭ اۋماعى - 5198 گەكتار. قالانىڭ سولتۇستىك شەكاراسى استانا قالاسىنىڭ اكىمشىلىك باعىنىسىنداعى اۋماقپەن شەكتەسەدى. ال، باتىس، وڭتۇستىك جانە شىعىس جاعى اقمولا وبلىسىنىڭ تسەلينوگراد اۋدانى ارقىلى وتەدى.