قازاقستاندا زەينەتاقىنىڭ ورتاشا كولەمى قانداي

بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنەن ءمالىم ەتتى، دەپ حابارلايدى قازاقپارات.

بيىلعى 11 ايدا قازاقستاندىقتارعا 2,7 تريلليون تەڭگەدەن استام سوماعا زەينەتاقى تولەندى. تەك قاراشا ايىندا عانا 245,9 ميلليارد تەڭگەگە زەينەتاقى تولەندى، ونىڭ ىشىندە بازالىق زەينەتاقىنى تولەۋگە - 74,9 ميلليارد تەڭگە، ىنتىماقتى زەينەتاقىنى تولەۋگە - 171 ميلليارد تەڭگە ءبولىندى.

2022 -جىلعى 1-جەلتوقسانداعى جاعداي بويىنشا ەلدەگى زەينەتكەرلەر سانى - 2 ميلليون 276 مىڭ ادام.

«1-جەلتوقسانداعى جاعداي بويىنشا زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن ەسكەرە وتىرىپ) 108960 تەڭگە بولدى»، - دەلىنگەن ۆەدومستۆو مالىمەتىندە.

2018 -جىلعى 1-شىلدەدەن باستاپ مەملەكەتتىك بازالىق زەينەتاقى تولەمى زەينەتاقى جۇيەسىندەگى ءوتىلىن ەسكەرە وتىرىپ، ءار الۋشىعا جەكە تاعايىندالاتىنىن ەسكە سالامىز.

بۇل رەتتە 1998 -جىلعى 1-قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.