قازاقستان SWAP ارقىلى يرانعا كوبىرەك مۇناي ساۋداسىن جاسايدى - Parstoday
قازاقستان ەنەرگەتيكا ءمينيسترى بۇل ەلدىڭ SWAP (س ۆ و پ) ارقىلى يرانمەن قاتار قىتايعا دا كوبىرەك مۇناي ساتاتىنىن حابارلادى.
قازاقستان SWAP جوباسى بويىنشا يرانعا مۇناي جىبەرەدى، وسىلايشا جانارماي قازاقستاننىڭ اقتاۋ پورتىنان تانكەرلەرمەن يراننىڭ سولتۇستىك پورتتارىنا جەتكىزىلىپ، ودان يراننىڭ تابريز جانە تەھرانداعى مۇناي وڭدەۋ زاۋىتتارىنا جونەلتىلەدى.
بۇل تۋرالى وسى اپتادا يراننىڭ Parstoday اقپارات اگەنتتىگى حابارلادى.
يراندىق باسىلىم تاراتقان بۇل اقپاراتتا قازاقستاننىڭ ەنەرگەتيكا ءمينيسترى بولات اقشولاقوۆتىڭ پىكىرى دە بىرگە جاريالانعان.
قازاقستاندىق ءمينيستردىڭ ايتۋىنشا، مۇنداي ارەكەت مۇناي ەكسپورتىنىڭ بالامالى جولدارىن دامىتۋ جول كارتاسىنىڭ جوباسىندا بار. قازاقستان قىتاي جانە يرانمەن مۇناي ەكسپورتتاۋ جولدارىن دامىتۋدى جوسپارلاپ وتىر. سوندىقتان ءازىربايجان، گرۋزيا جانە تۇركيا پورتتارى ارقىلى وتەتىن ترانسكاسپيي حالىقارالىق كولىك باعىتىن، سونداي-اق قىتاي مەن يرانعا ەكسپورتتىق باعىتتاردى دامىتۋعا باسا نازار اۋدارىلادى.
تاشكەنتتە اباي كۇندەرى اياسىندا حالىقارالىق كونفەرەنسيا ءوتتى - «ءوز ا»
تاشكەنت قالاسىنداعى ورتالىق ازيا حالىقارالىق ينستيتۋتىندا قازاقستاننىڭ ر. سۇلەيمەنوۆ اتىنداعى شىعىس تانۋ ينستيتۋتىمەن بىرلەسىپ «XIX عاسىرداعى وزبەك جانە قازاق ويشىلدارىنىڭ دۇنيەتانىمىنداعى ورتاق تاريحي-مادەني مۇرانى نىعايتۋ جانە دامىتۋ» تاقىرىبىندا حالىقارالىق كونفەرەنتسيا ءوتتى، دەپ حابارلايدى وزبەكستاندىق «ءوز ا» اقپاراتتىق اگەنتتىگى.
اتالعان باسىلىمنىڭ مالىمەتىنشە، اباي قۇنانبايەۆتىڭ شىعارماشىلىق مۇراسىنا ارنالعان مادەنيەت كۇندەرى اياسىندا ۇيىمداستىرىلعان شاراعا، وزبەكستان عىلىم اكادەمياسىنىڭ (قوعامدىق- گۋمانيتارلىق عىلىمدار ءبولىمى)، تاريح ينستيتۋتى، تۋريزم جانە مادەني مۇرا مينيسترلىگىنە قاراستى مادەني مۇرا اگەنتتىگىنىڭ وكىلدەرى قازاقستان رەسپۋبليكاسىنىڭ وزبەكستانداعى توتەنشە جانە وكىلەتتى ەلشىسى بەيبىت اتامقۇلوۆ، ر. سۇلەيمەنوۆ اتىنداعى شىعىس تانۋ ينستيتۋتىنىڭ رەسپۋبليكالىق تاريحي ماتەريالداردى زەرتتەۋ ورتالىعىنىڭ ديرەكتورى مەرۋەرت ابۋسەيىتوۆا، م. اۋەزوۆ اتىنداعى ادەبيەت جانە ونەر ينستيتۋتىنىڭ باس ديرەكتورى كەنجەحان ءماتيجانوۆ، قازاقستاننىڭ عىلىمي مەكەمەلەرىنىڭ جەتەكشى ماماندارى قاتىسقان.
اتالعان كونفەرەنتسيادا XIX عاسىرداعى وزبەك جانە قازاق ويشىلدارىنىڭ عىلىمي، فيلوسوفيالىق جانە ادەبي مۇرالارىن زەرتتەۋ ماسەلەلەرى، وزبەك جانە قازاق زيالىلارىنىڭ مادەنيەت سالاسىنداعى ءوز ارا ىنتىماقتاستىعىن جانە الەمدىك دامۋعا قوسقان ۇلەسى تالقىلاندى.
موڭعول سپورتشىسى قازاق كۇرەسىنەن الەم چەمپيونى اتاندى - «Kaznews»
وسى اپتادا 12-14-جەلتوقسان ارالىعىندا استانا قالاسىنداعى جاقسىلىق ۇشكەمپىروۆ اتىنداعى جەكپە-جەك سارايىندا وتكەن قازاق كۇرەسىنەن الەم چەمپيوناتىندا موڭعوليالىق پالۋاندار ءبىر التىن جانە ءبىر قولا مەدال جەڭىپ الدى، دەپ حابارلايدى موڭعوليانىڭ «Kaznews» اقپاراتتىق پورتالى.
اتالعان باسىلىمنىڭ كەلتىرگەن مالىمەتىنشە، قازاق كۇرەسىنەن 75 كەلى سالماق دارەجەسىندە باق سىناعان تسوگ- وچير باتتسەتسەگ فينالدا نيدەرلانديالىق پالۋان دەبوراح ۆوس كايليدى ۇتىپ، الەم چەمپيونى اتاندى.
سونداي-اق، ەرلەر اراسىندا 100 كەلى سالماق دارەجەسىندە بوز كىلەمگە شىققان موڭعوليالىق پالۋان داۆاابات تسوگتبااتار قولا مەدال ەنشىلەدى.
ەسكە سالا كەتەيىك، چەمپيوناتقا الەمنىڭ 40 ەلىنەن 350 بالۋان قاتىستى.
قوس حالىقتىڭ ۇلى پەرزەنتىنىڭ تۋعانىنا 177 جىل - «تامدى شارۋاگەرى» گازەتى
اقىن، فيلوسوف، عۇلاما اباي قۇنانباي ۇلىنىڭ تۋعانىنا 177 جىل تولۋىنا وراي وزبەكستاننىڭ تامدى اۋدانىنداعى مادەنيەت ۇيىندە اۋقىمدى ءىس-شارا ءوتتى. شارادا اۋدان اكىمى ق. الدابەرگەنوۆ، حالىق قابىلحاناسى مەڭگەرۋشىسى ت. مەدەتوۆ قاتىسىپ، ءسوز سويلەدى، دەپ حابارلايدى وزبەكستاننىڭ «تامدى شارۋاگەرى» گازەتى.
اتالعان اقپارات كوزىنىڭ دەرەگىنە سۇيەنسەك، اقىن شىعارماشىلىعان ونەرپازدار مەن جالىندى جاستار جاعىنان تاماشا ورىندالىپ، اسەم اندەرى، كۇمبىرلەگەن كۇيلەرى كورەرمەندەرگە تارتۋ ەتىلدى. قارا سوزدەرى مەن ۇلى عۇلامانىڭ افوريزمدەرى مانەرلەپ جاتقا وقىلىپ، اقىن ومىرىنە ارنالعان ساحنالىق كورىنىستەر قويىلعان.
«شەتەلدىكتەر قازاقتى اباي ارقىلى تانيدى، اقىننىڭ جىرلارى ارقىلى باعالايدى. ونىڭ جالپىادامزاتتىق قۇندىلىقتاردى ناسيحاتتاۋعا تولى شىعارمالارى بۇكىل حالىقارالىق قاۋىمداستىققا جاتادى، الەمدىك مادەنيەتتىڭ بولىگى بولىپ تابىلادى»، دەپ تۇيىندەيدى «تامدى شارۋاگەرى».
شىڭجاڭ دەلەگاتسياسى ورتالىق ازيا ەلدەرىنە ساپارىن جەتىسۋ وبلىسىنان باستادى - «ورتالىق حالىق راديوسى»
شىڭجاڭ ۇكىمەتىنىڭ ەكونوميكالىق جانە ساۋدا دەلەگاتسياسى قازاقستاننىڭ جەتىسۋ وبلىسىمەن بيزنەس- فورۋم وتكىزدى.
قىتايدىڭ شىڭجاڭ ۇيعىر اۆتونوميالىق ولكەسى حالىق ۇكىمەتىنىڭ ەكونوميكالىق جانە ساۋدا دەلەگاتسياسى ءوزىنىڭ ساپارىن - قازاقستاننىڭ جەتىسۋ وبلىسىنان باستادى. قىتاي مەن قازاقستان بىرلەسىپ ءوز ارا ءتيىمدى ىنتىماقتاستىق ماسەلەلەرى بويىنشا تەرەڭ پىكىر الماسۋ ءۇشىن بيزنەس- فورۋم وتكىزگەن. شىڭجاڭ ولكەسى حالىق ۇكىمەتى ءتوراعاسىنىڭ ورىنباسارى سۋن حۋنمەي جانە قازاقستان جەتىسۋ وبلىسىنىڭ اكىمى بەيبىت يسابايەۆ فورۋمعا تەڭ ءتوراعالىق ەتكەن.
بۇل تۋرالى وسى اپتادا «ورتالىق حالىق راديوسى» اقپاراتتىق پورتالى حابارلادى.
قىتايلىق ب ا ق-تىڭ دەرەگىنە سۇيەنسەك، فورۋم بارىسىندا ەكى تاراپ الداعى ۋاقىتتا دا قورعاس قىتاي- قازاقستان حالىقارالىق شەكارالىق ىنتىماقتاستىق ورتالىعىنىڭ اشىق پلاتفورماسى ءرولىن اتقاراتىنىنا ۋاعدالاستى جانە ىنتىماقتاستىق ورتالىعىنىڭ جەرگىلىكتى بيلىك ورگاندارىنىڭ ۇيلەستىرۋ تەتىگى مەن قولداۋ ساياساتىن بەلسەندى قۇرۋدى تالقىلادى.
ايتا كەتەيىك، قازاقستانعا جەتكەن شىڭجاڭ ۇكىمەتىنىڭ ەكونوميكالىق جانە ساۋدا دەلەگاتسياسى ورتا ازيا ەلدەرىنە بولعان 10 كۇندىك ساپارىن باستادى. بۇل جولى، دەلەگاتسيا ەكونوميكالىق جانە ساۋدا ىنتىماقتاستىعى بويىنشا ءبىرقاتار ءىس-شارالار وتكىزۋ ءۇشىن قازاقستان، وزبەكستان، قىرعىزستان جانە تاجىكستان ەلدەرىنە بارادى.
«الاش تۋى استىندا» اتتى دەرەكتى فيلمى تۇرىك تىلىندە سويلەدى - TRT
قازاقتىڭ ۇلت-ازاتتىق الاش قوزعالىسى تۋرالى سىر شەرتەتىن «الاش تۋى استىندا» اتتى دەرەكتى فيلمنىڭ تۇرىك تىلىندە دۋبلياجدالعان نۇسقاسى ءبىرىنشى رەت انكارادا كورسەتىلدى.
«كوكتۋ» قازاق مادەنيەتى قوعامىنىڭ باستاماسى جانە قازاقستاننىڭ تۇركياداعى ەلشىلىگى قولداۋىمەن فيلم قاجى بايرام ۆەلي ۋنيۆەرسيتەتىندە ءبىرىنشى رەت كورسەتىلدى، دەپ مالىمدەيدى تۇركيا راديو تەلەۆيزيا پورتالى.
تۇركيالىق باسىلىمنىڭ كەلتىرگەن مالىمەتىنە سۇيەنسەك، 105 جىل بۇرىن «الاش» اۆتونومياسى ومىرگە كەلگەن كۇنگە ءدوپ كەلگەن كورسەتىلىمگە ۋنيۆەرسيتەت جانىنداعى «ەۋرازيا جانە تۇرىك الەمى زەرتتەۋ ورتالىعى» دا ءوز قولداۋىن كورسەتكەن.
دەرەكتى فيلمنىڭ كورسەتىلىمىندە «كوكتۋ» قازاق مادەنيەتى قوعامىنىڭ ءتورايىمى ءلاززات ءمۇلازىموعلۋ ءسوز سويلەپ، ورتاق تۇرىك تاريحىندا وتە ماڭىزدى ورىنعا يە بۇل قوزعالىستىڭ جەتەكشىلەرى بارلىق قيىنشىلىقتارعا قاراماستان وزدەرىن وتە جاقسى جەتىلدىرىپ، وزدەرى باستاعان بۇل قاسيەتتى جولدا كەزدەسەتىن قيىندىقتاردى كوتەرە بىلگەنىن تىلگە تيەك ەتكەن.
زەرتتەۋ ورتالىعىنىڭ باسشىسى پروفەسسور، دوكتور ناجيە يىلدىز وسىنداي دەرەكتى فيلمدەردى ستۋدەنتتەر مەن وقۋشىلارعا كورسەتۋدىڭ ءوزىنىڭ وتە ۇلكەن ساباق ەكەنىن ايتتى. ول تاقىرىپتىڭ وتە ماڭىزدى ەكەنىن اتاپ كورسەتتى.
تۇركيلىق ب ا ق-تىڭ دەرەگىنشە، ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى تۇسىرگەن «الاش تۋى استىندا» دەرەكتى فيلمى تۇركيادا ءبىرىنشى رەت تۇرىكشە سۋبتيترمەن انكارادا 2018 -جىلى كورسەتىلگەن بولاتىن.
سەناريىن بولات ءمۇرسالىم جازعان دەرەكتى فيلمگە بەلگىلى تاريحشى مامبەت قويگەلدى باس كەڭەسشى، ادەبيەت سىنشىسى تۇرسىنجان شاپاي شىعارماشىلىق كەڭەسشى قىزمەتىن بەرگەن بولاتىن.
اۆتور
بەيسەن سۇلتان ۇلى