قازاقستانعا باراتىن «شاندۋن ءنومىرلى» قىتاي-ەۋروپا پويىزى العاش رەت جولعا شىقتى - «حالىق گازەتى»
قازاقستانعا باراتىن «شاندۋن ءنومىرلى» قىتاي-ەۋروپا پويىزى العاش رەت جولعا شىقتى. 15-قاراشا كۇنى جيبو حۋانتاي - قازاقستان الماتى باعىتىنداعى «شاندۋن» ءنومىرلى قىتاي-ەۋروپا پويىزى جيبو ارنايى جەلىسىنەن جولعا ءساتتى شىقتى، دەپ حابارلايدى قىتايدىڭ «حالىق گازەتى» اقپاراتتىق پورتالى.
اتالعان ب ا ق-تىڭ مالىمەتىنشە، العاشقى پويىزعا حۋانتايدا جانە وعان جاقىن اۋدانداردا وندىرىلگەن قۇنى شامامەن 6 ميلليون يۋانعا جۋىق 50 ۆاگون كولىك دوڭعالاقتارىن، بولات شارلاردى، حيميالىق ونىمدەردى، تۇرمىسقا قاجەتتى زاتتاردى جانە كەراميكالىق بۇيىمداردى جونەلتتى. پويىز شىڭجاڭداعى قورعاس شەكاراسى ارقىلى ەلدەن شىعىپ، قازاقستاننىڭ الماتى قالاسىنا بارادى. تاسىمالداۋ ۋاقىتى شامامەن 7 كۇنگە سوزىلادى.
سونداي-اق، وسى اپتادا «حالىق» گازەتىندە «قازاقستان قىتايعا بالىق ونىمدەرىنىڭ ەكسپورتىن ۇلعايتادى» دەگەن تاقىرىپتاعى اقپارات جارىق كوردى.
قىتايلىق باسىلىمنىڭ كەلتىرگەن دەرەگىنە سۇيەنسەك، قازاقستاننىڭ ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ - قاراشانىڭ 14 كۇنگى پارلامەنتتىك ۇكىمەت وتىرىسىندا قازاقستان قىتايعا بالىق ونىمدەرىنىڭ ەكسپورتىن ۇلعايتاتىنىن مالىمدەدى.
ول قازاقستان ونىمدەرىنىڭ قىتايعا ەكسپورتتالۋىنا ەرەكشە ءمان بەرەتىنىن ايتقان.
مينيستر ەكسپورتتىق نارىقتى كەڭەيتۋ ماقساتىندا قازاقستان مەن قىتاي ۆەتەريناريالىق سەرتيفيكات تۋرالى كەلىسىمگە كەلگەنىن مالىمدەگەن.
«قازاقستاننىڭ تابيعي سۋلارىندا جىل سايىنعى بالىق اۋلاۋ كولەمى شامامەن 40000-45000 توننانى قۇراپ، بۇل دەرەكتەر جىلدان جىلعا ارتىپ كەلەدى. قازاقستان جىل سايىن 25000 توننا بالىق پەن سۋ ونىمدەرىن ەكسپورتتايدى. ولاردىڭ كوپشىلىگى وڭدەلگەن ونىمدەر. بۇلار ىشكى جانە حالىقارالىق نارىقتا بەلگىلى ءبىر باسەكەگە قابىلەتتىلىككە يە»، دەپ جازادى قىتايلىق ب ا ق.
سامارقاندتا «ەۋروپالىق وداق -ورتالىق ازيا» مينيسترلەرىنىڭ كەزدەسۋى ءوتتى-«ءوز ا»
سامارقاند قالاسىندا «ەۋروپا وداعى -ورتالىق ازيا» فورماتىندا مينيسترلەر كەزدەسۋى ءوتتى. سىرتقى ىستەر مينيسترلىگىنىڭ حابارلاۋىنشا، ەۋروپالىق وداق پەن ورتالىق ازيا ەلدەرىنىڭ سىرتقى ساياسي ۆەدومستۆولارىنىڭ باسشىلارى مەن وكىلدەرى ەكى ايماق اراسىنداعى ساياسي-ديپلوماتيالىق، ساۋدا-ەكونوميكالىق، ينۆەستيتسيالىق سۋ-ەنەرگەتيكا، ەكولوگيالىق جانە مادەني-مادەني سالالارداعى ەكىجاقتى قارىم-قاتىناستاردىڭ قازىرگى جاعدايى مەن دامۋ پەرسپەكتيۆالارىن تالقىلادى، دەپ حابارلايدى وزبەكستاندىق «ءوز ا» اقپاراتتىق اگەنتتىگى.
اتالعان باسىلىمنىڭ مالىمەتىنشە، شارانىڭ اشىلۋ سالتاناتىندا وزبەكستان رەسپۋبليكاسىنىڭ سىرتقى ىستەر ءمينيسترى ۆلاديمير نوروۆ بۇل كونفەرەنتسيانى سامارقاندتا وتكىزۋ تۋرالى شەشىم ورتالىق ازيانىڭ، اتاپ ايتقاندا سامارقاند قالاسىنىڭ ايماقارالىق قاتىناستارداعى جاڭا «حاب» رەتىندە گەوساياسي ماڭىزدىلىعىنىڭ ارتىپ كەلە جاتقانىن كورسەتەتىنىن اتاپ ءوتتى.
«مينيسترلەردىڭ سامارقاندتاعى كەزدەسۋى ءوڭىرارالىق ديالوگتىڭ جاڭا كۇن ءتارتىبىن ازىرلەۋگە جانە ۇزاق مەرزىمدى پەرسپەكتيۆادا ءتيىمدى ىنتىماقتاستىقتىڭ ناقتى باعىتتارىن انىقتاۋعا مۇمكىندىك بەرەتىنىنە سەنىم ءبىلدىردى»، دەپ جازادى «ءوزا».
قانداسىمىز ايناگۇل ايىپحان قىزى الەمدىك IWEC-2022 سىيلىعىنا يە بولدى - Kaznews
يسپانيانىڭ مادريد قالاسىندا 15-شى IWEC (تhe International Women’s Entrepreneurial Challenge Foundation) ايەلدەر كاسىپكەرلىگى جونىندە كونفەرەنتسياسى وتۋدە، دەپ حابارلايدى «Kaznews» اقپاراتتىق اگەنتتىگى.
كونفەرەنتسياعا الەمنىڭ 50 ەلىنەن 150 گە جۋىق كاسىپكەر ايەلدەر قاتىسۋدا. اتالمىش شاراعا بايان-ولگي ايماعىنان «پاككالە» كومپانياسىنىڭ ديرەكتورى ايناگۇل ايىپحان قىزى، «Best» ساۋدا ورتالىعىنىڭ ديرەكتورى لاشىن ساحابا قىزى، «بايان-مەديانا» كومپانياسىنىڭ ديرەكتورى ريزا ميزانباي قىزى قاتارلى كاسىپكەرلەر قاتىسۋدا.
موڭعوليالىق ب ا ق-تىڭ كەلتىرگەن مالىمەتىنە سۇيەنسەك، بۇل كونفەرەنتسيا اياسىندا «2022 IWEC» سىيلىعىمەن ايناگۇل ايىپحان قىزى ماراپاتتالدى.
استانا - تەھران قارىم-قاتىناسىنىڭ كوكجيەگى ايقىن - Parstoday
قازاقستاننىڭ يران يسلام رەسپۋبليكاسىنداعى ەلشىسى استانا-تەھران قارىم-قاتىناسىنىڭ بولاشاق كوكجيەگىن جارقىن دەپ اتادى. بۇل تۋرالى وسى اپتادا يراننىڭ Parstoday اقپارات اگەنتتىگى حابارلادى. يراندىق باسىلىمنىڭ مالىمەتى بويىنشا، اسحات ورازباي 20-قاراشادا وتەتىن ەلدىڭ پرەزيدەنتتىك سايلاۋىنا قاتىستى ماقالاسىندا ەكى ەلدىڭ بولاشاق قارىم-قاتىناسى تۋرالى پىكىرىن بىلدىرگەن.
«قازاقستان مەن يران يسلام رەسپۋبليكاسى سالعان بەرىك نەگىزدى ەسكەرە وتىرىپ، ەكى ەل اراسىنداعى قارىم-قاتىناستاردىڭ بولاشاعىنا وپتيميستىك كوزقاراسپەن قاراۋعا كوپتەگەن سەبەپتەر بار. يران مەن قازاقستان اراسىنداعى 2022 -جىلدىڭ قاڭتار-تامىز ارالىعىنداعى ساۋدا كولەمى وتكەن جىلدىڭ سايكەس كەزەڭىمەن سالىستىرعاندا 9,3 پايىزعا ارتىپ، 350,2 ميلليون دوللارعا جەتتى»، -دەپ جازعان اسحات ورازباي.
قازاقستاننىڭ يرانداعى ەلشىسى ەكى ەل اراسىنداعى ساۋدا-ەكونوميكالىق ىنتىماقتاستىقتىڭ كەڭەيۋىنە توقتالعان.
سونداي-اق، يراندىق ب ا ق-تا «قازاقستاننىڭ تەھرانداعى ەلشىسى ءبىز يرانمەن ەكونوميكالىق ىنتىماقتاستىقتى كەڭەيتۋگە مۇددەلىمىز»، دەگەن تاقىرىپتاعى ماقالا جارىق كوردى.
«سىرتقى ساياساتتا يراننان بولەك وزبەكستان، تاجىكستان، قىرعىزستان، ءازىربايجان، تۇركىمەنستان سياقتى ايماق ەلدەرىمەن جاقسى قارىم-قاتىناستا بولۋعا تىرىسامىز»، -دەدى قازاقستاننىڭ تەھرانداعى ەلشىسى.
Parstoday اقپارات اگەنتتىگىنىڭ حابارلاۋىنشا، اسحات ورازباي الداعى سايلاۋدان كەيىن جانە ءوزىنىڭ ءبىرقاتار قوعامدىق بەلسەندىلەرىمەن جاڭا ساياسي رەفورمالار باعدارلاماسى باستالعاننان كەيىن قازاقستاننىڭ «شاحيد رادجاي» باندار ابباس پورتىنىڭ قۋاتىن پايدالانۋدى ويلاستىرىپ جاتقانىنا نازار اۋداردى. ول سونىمەن بىرگە قازاقستاننىڭ جەكە سەكتورى ءوزىنىڭ وكىلدىگىن اشۋعا كىرىسىپ كەتكەنىن، ەكونوميكالىق شارالار ارقىلى يرانمەن ىنتىماقتاستىق كەڭەيىپ، ەكى ەل اراسىنداعى تۇراقتى ەكونوميكالىق قارىم-قاتىناستار داميتىنىنا ۇمىتتەنەمىز دەپ مالىمدەگەن.
انتالياعا تۋريست جىبەرەتىن ەلدەردىڭ كوشىن رەسەي باستاپ تۇر - TRT
انتالياعا 1-قاڭتار مەن 15-قاراشا ارالىعىندا اۋە جولدارى ارقىلى كەلگەن تۋريست سانى وتكەن جىلدىڭ ۇقساس كەزەڭىمەن سالىستىرعاندا 48 پايىز ارتتى. انتالياعا ەڭ كوپ تۋريست جىبەرگەن ەلدەر اراسىندا 2 ميلليون 826 مىڭ اداممەن رەسەي العاشقى ورىندى يەلەدى، دەپ حابارلايدى تۇركيا راديو تەلەۆيزيا پورتالى.
اتالعان ب ا ق-تىڭ دەرەگىنشە، 1-قاڭتار مەن 15-قاراشا ارالىعىندا اۋە جولدارى ارقىلى كەلگەن تۋريست سانى 13 ميلليون 3 مىڭ 263 كىسىگە جەتكەن انتاليادا نەمىس جانە اعىلشىن تۋريست سانى بويىنشا بارلىق ۋاقىتتاردا رەكورد جاڭالانعان.
«TRT» -نىڭ دەرەگىنشە، 1-قاڭتار مەن 15-قاراشا ارالىعىندا انتالياعا اۋە جولدارى ارقىلى 13 ميلليون 3 مىڭ 263 تۋريست كەلگەن. وتكەن جىلدىڭ ۇقساس كەزەڭىندە قالاعا 8 ميلليون 812 مىڭ 981 تۋريست كەلسە، بيىل بۇل مولشەر 48 پايىز ارتقان.
«ءتۇرلى ەلدەن كەلگەن قوناقتاردىڭ دەمالۋ ءۇشىن تاڭدايتىن مەكەندەرىنىڭ ءبىرى انتالياعا ەڭ كوپ تۋريست جىبەرگەن ەلدەر اراسىندا 2 ميلليون 826 مىڭ اداممەن رەسەي العاشقى ورىندى يەلەدى.
2 ميلليون 670 مىڭ اداممەن گەرمانيا ەكىنشى، 1 ميلليون 88 مىڭ اداممەن ۇلى بريتانيا ءۇشىنشى، 744 مىڭ 78 اداممەن پولشا ءتورتىنشى جانە 434 مىڭ 224 تۋريستپەن گوللانديا بەسىنشى ورىندى الدى»، دەپ جازادى تۇركيالىق باسىلىم.
موڭعوليالىق تەاتر «بۇركىت» دراماسى كورەرمەنگە جول تارتتى - Kaznews
بايان-ولگي ايماعىنىڭ م. قۇرمانحان اتىنداعى مۋزىكالى دراما تەاترىنىڭ 66-قىسقى ماۋسىمىنىڭ اشىلۋىنا وراي موڭعوليا ونەرىنە ەڭبەك سىڭىرگەن قايراتكەر اقتان بابي ۇلىنىڭ «بۇركىت» تۋىندىسى جەلىسىمەن جازىلعان موڭعوليا مادەنيەتىنە ەڭبەك سىڭىرگەن قايراتكەر شىناي راحمەت ۇلىنىڭ «بۇركىت» دراماسىن 18-19-قاراشا كۇندەرى وتەدى، دەپ جازدى Kaznews.
ايتا كەتەيىك، موڭعولياداعى قازاق جازبا ادەبيەتتىڭ نەگىزىن سالۋشى -اقتان بابي ۇلى (1897-1973) تۆورچەستۆوسىنىڭ كەسەك سالاسىنىڭ ءبىرى ونىڭ پوەمالارى. ول «بۇركىت» (1959 ج.)، «دوسىمبەك-بالقيا» (1964 ج.)، «ءومىر جولى» (1972 ج.) قاتارلى پوەمالارىندا موڭعوليا قازاقتارىنىڭ رەۆوليۋتسيا قارساڭىنداعى الەۋمەتتىك تۇرمىسىن تەرەڭ اشىپ كورسەتەدى. «بۇركىت» پوەماسى اقىن پوەزياسىنىڭ ەڭ شوقتىعى بيىك تۋىندىسى بولىپ تابىلادى. ا. بابي ۇلى موڭعوليا قازاقتارىنىڭ العاشقى دراماتۋرگ جازۋشىسى.
قازاق مالشىلارى وتارعا كوشتى - «حالىق» گازەتى
قاراشا ايى كەلىپ، كۇن سۋىتا ءتۇستى. شىڭجاڭنىڭ ىلە قازاق اۆتونوميالى وبلىسى تەكەس اۋدانىنداعى مالشىلار وتارعا كوشۋگە قامدانا باستادى. مالشىلار قورالى قويلارىن ايداپ كۇزدەۋدەن بوزادىر قىستاۋلىعىنا قونىس اۋداردى.
بۇل تۋرالى وسى اپتادا قىتايدىڭ «حالىق» گازەتى اقپاراتتىق پورتالى حابارلاعان بولاتىن.
قىتايلىق باسىلىمنىڭ كەلتىرگەن مالىمەتىنە سۇيەنسەك، تەكەس اۋدانىنداعى بوزادىر قىستاۋلىعى تيانشان تاۋىنىڭ باۋرايىندا ورنالاسقان. بوزادىردىڭ ءتورت جاعىن تاۋ قورشاپ، باۋىرىندا ارقىراپ كوكسۋ وزەنى اعىپ جاتادى.
جىل سايىن قىس جاقىنداعاندا مالشىلار بايىرعى كوش جولىمەن 100 شاقىرىمعا جۋىق جول ءجۇرىپ، تاۋ اسىپ، تاس باسىپ مالدارىن بوزادىرعا جەتكىزەدى.
سونداي-اق وسى اپتادا «حالىق» گازەتى اقپاراتتىق پورتالىندا، «شىڭجاڭنىڭ ىلە وبلىسىنداعى قاراجون جايلاۋىنىڭ قاردان كەيىنگى كوركەم كورىنىسى» دەگەن تاقىرىپتاعى اقپاراتتىق فوتورەپورتاج جارىق كوردى.
اتالعان ب ا ق-تىڭ مالىمەتىنشە، شىڭجاڭنىڭ ىلە وبلىسىنداعى قاراجون جايلاۋىندا العاشقى قاردان كەيىن تاۋلار، اڭعارلار مەن شابىندىقتار كۇمىس كورپە جامىلدى. جايىلعان قورالى قوي، ءۇيىرلى جىلقى مەن سيىر تابىندارى، اۋەدە قالىقتاعان كەزقۇيرىق مۇلگىگەن قىسقى جايىلىمنىڭ سۇلۋ كەلبەتىن ءتىپتى دە كورىكتەندىرىپ جىبەرگەن.
«قاراجون جايلاۋى تەكەس اۋدانىندا ورنالاسقان. بۇل ولكە بۇكىل الەمدىك تابيعي مۇرا بولىپ تابىلادى»، دەپ جازادى «حالىق» گازەتى.
سونىمەن قاتار، اتالعان ب ا ق-تا «گانسۋدىڭ اقسايىنداعى ءۇيىرلى تۇيەلەر» دەگەن تاقىرىپتاعى تاعى ءبىر فوتورەپورتاج جاريالاندى.
باسىلىمنىڭ دەرەگىنشە، بيىلعى جىلدىڭ 12-قاراشاسىندا گانسۋ ولكەسىنىڭ اقساي قازاق اۆتونوميالىق اۋدانىنىڭ مالشىلارى تۇيەلەرىنىڭ ايدان امان، جىلدان ەسەن شىعۋى ءۇشىن جەم-ءشوبى مول قىستاۋلارىنا ايداپ اپاردى. دەر كەزىندە قىستاۋعا جەتكەن تۇيەلەر ەندى قىستان كۇيلى شىعاتىن بولادى.
اۆتورى بەيسەن سۇلتان ۇلى