بۇل اۋىل مەن قالا بالاسى اراسىنداعى وقۋ ۇلگەرىمىن تەڭەستىرۋگە مۇمكىندىك بەرەتىن جوبا، دەپ حابارلايدى قازاقپارات ءتىلشىسى.
اقتوبە وبلىسىندا شاعىن جيناقتى اۋىل مەكتەپتەرىندەگى ءبىلىم ساپاسىن ارتتىرۋعا باعىتتالعان ماڭىزدى جوبا باستاۋ الدى. شاراعا وبلىس اكىمى ەرالى توعجانوۆ، پەداگوگتەر مەن شاعىن جيناقتى مەكتەپ ديرەكتورلارى، مەملەكەتتىك مەكەمە باسشىلارى قاتىستى.
«مەملەكەت باسشىسىنىڭ قولداۋىمەن قازاقستاندا بالالاردىڭ جان-جاقتى دامۋى مەن ساپالى ءبىلىم الۋىنا بارلىق جاعداي جاسالعان. دەگەنمەن جاسىراتىنى جوق، قالا مەن اۋىل مەكتەپتەرىنىڭ ءبىلىم ساپاسىنداعى الشاقتىققا اسەر ەتەتىن فاكتورلار بار. وسى ماسەلەلەردى شەشۋ ءۇشىن ءبىرقاتار شارا قابىلدانىپ جاتىر. بۇگىنگى كۇنى 114 مەكتەپكە كابينەت جابدىقتاۋ، مەكتەپ جيھازىن جاڭارتۋ، ونىڭ ىشىندە كىتاپحانالارى مەن اسحانالارىن جاڭارتۋ بويىنشا جۇمىس جۇرگىزىلىپ جاتىر. 2025 -جىلعا دەيىن 282 مەكتەپ جاڭعىرتىلادى. اۋىل بالالارىنىڭ ءبىلىم ساپاسىن ارتتىرۋدا بۇگىن ءوز باستاۋىن الىپ جاتقان «ءبىلىم ALL» وڭىرلىك جوباسىنىڭ وڭ اسەرىن تيگىزەتىنىنە سەنىمدىمىن»، - دەدى وبلىس اكىمى ەرالى توعجانوۆ.
وبلىستاعى 424 مەكتەپتىڭ f نەمەسە 281 ى اۋىلدىق جەرلەردە ورنالاسقان. ونىڭ 204 ى - شاعىن جيناقتى.
«ءبىلىم ALL» جوباسى 10575 وقۋشىسى بار 120 شاعىن جيناقتى مەكتەپتى قامتيدى. بۇرىن اتالعان مەكتەپتەردىڭ ءبىلىم كورسەتكىشى تومەن بولاتىن. باستى سەبەپ - بىلىكتى مامانداردىڭ تاپشىلىعى مەن ماتەريالدىق-تەحنيكالىق بازانىڭ السىزدىگى.
«العا اۋدانىنداعى 29 مەكتەپتىڭ 13 ى شاعىن جيناقتى. ماسەلەن ءبىزدىڭ مەكتەپتە 58 بالا وقيدى. بۇل جوبا بىلىكتى پەداگوگتەردەن جاقسى ءبىلىم الۋعا، ال اۋىل مۇعالىمدەرى ءۇشىن ۇلكەن تاجىريبە جيناقتاۋعا جانە بىلىكتىلىگىن ارتتىرۋعا تاماشا مۇمكىندىك»، - دەپ اتاپ ءوتتى العا اۋدانىنىڭ قاراقوبدا مەكتەپ-بالاباقشاسىنىڭ ديرەكتورى ەركىنبەك زيادينوۆ.
ۇزدىك ناتيجەلەرگە قول جەتكىزگەن، جوعارى ساپالى ءبىلىم كورسەتكەن 25 مۇعالىمى بالالاردى وقىتادى. ولاردىڭ قاتارىندا دارىندى جاسوسپىرىمدەرگە ارنالعان «ءبىلىم- يننوۆاتسيا» مامانداندىرىلعان ليتسەي-ينتەرناتى، م. قۇسايىنوۆ اتىنداعى دارىندى بالالارعا ارنالعان مامانداندىرىلعان ليتسەي- ينتەرناتى، مامانداندىرىلعان فيزيكا- ماتەماتيكالىق ليتسەي-ينتەرناتى جانە تاعى دا باسقا ءبىلىم وردالارى بار. ماتەماتيكا، فيزيكا، حيميا، بيولوگيا، اعىلشىن ءتىلى پاندەرىنىڭ مۇعالىمدەرى ونلاين- ساباقتار وتكىزەدى.
«قالا مەن اۋىلداعى ءبىلىم دەڭگەيىن تەڭەستىرۋ ماقساتىندا قولعا الىنىپ جاتقان جوبانىڭ قاتىسۋشىسى بولۋ - ءبىز ءۇشىن ۇلكەن مارتەبە. دارىندى بالالار اۋىلدا دا بار. ءبىراق مامان تاپشىلىعىنىڭ كەسىرىنەن ولاردىڭ بارلىعىن دەر كەزىندە تاني الماي جاتامىز. الداعى ۋاقىتتا بۇل جوبانىڭ اۋقىمى كەڭەيەتىنىنە سەنىمىم مول»، - دەدى م. قۇسايىنوۆ اتىنداعى دارىندى بالالارعا ارنالعان مامانداندىرىلعان ليتسەي- ينتەرناتىنىڭ ماتەماتيكا ءپانىنىڭ مۇعالىمى، «اقتوبە وبلىسىنىڭ ۇزدىك پەداگوگى» نۇربەك ابدۋللين.
اۆتور
التىناي ساعىندىقوۆا