بۇعان دەيىن اتالعان قور سىرتقى ىستەر مينيسترلىگىنىڭ قۇزىرەتىندە بولعان. ونى وزگە ۆەدومستۆوعا بەرۋ شەشىمى اشىق تالقىعا شىعارىلعان ۇكىمەت قاۋلىسىندا جازىلعان، دەپ حابارلايدى قازاقپارات ءتىلشىسى.
«قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن «وتانداستار قورى» كوممەرتسيالىق ەمەس اكسيونەرلىك قوعامىنىڭ 100 پايىز مولشەرىندەگى اكسيالارىنىڭ مەملەكەتتىك پاكەتىن يەلەنۋ جانە پايدالانۋ قۇقىقتارى سىرتقى ىستەر مينيسترلىگىنەن ەڭبەك جانە حالىقتى الەۋمەتتىك قورعاۋ مينيسترلىگىنە بەرىلسىن.
قاۋلى جوباسىن قابىلداۋ الەۋمەتتىك- ەكونوميكالىق نەمەسە قۇقىقتىق تەرىس سالدارعا اكەپ سوقتىرمايدى. سونداي-اق، ول بوسقىندار ماسەلەسى بويىنشا مەملەكەتتىك ساياساتتى جۇزەگە اسىرۋعا وڭ اسەر ەتەدى. اتالعان قوردىڭ ەڭبەك جانە حالىقتى الەۋمەتتىك قورعاۋ مينيسترلىگىنە بەرۋ قانداستاردىڭ قۇقىقتىق ساۋاتتىلىعىن ارتتىرۋعا، وڭىرلەردىڭ قاجەتتىلىكتەرىن ەسكەرە وتىرىپ، ولاردى ۇتىمدى قونىستاندىرۋ جونىندە اقپاراتتىق- ءتۇسىندىرۋ جۇمىستارىن جۇرگىزۋگە، سونداي- اق ولارعا باستاپقى كەزەڭدە بەيىمدەلۋگە جانە قوردىڭ الەۋەتىن تولىق كولەمدە ىسكە اسىرۋعا مۇمكىندىك بەرەدى دەپ ويلايمىز»، - دەلىنگەن قۇجاتتا.
قاۋلىداعى مىندەتتەردى ورىنداۋ ەڭبەك جانە حالىقتى الەۋمەتتىك قورعاۋ مينيسترلىگى مەن سىرتقى ىستەر مينيسترلىگى جانە مەملەكەتتىك مۇلىك جانە جەكەشەلەندىرۋ كوميتەتىنە جۇكتەلگەن. قۇجاتتى اشىق تالقىلاۋ 4-قاراشاعا دەيىن جالعاسادى.