الماتىداعى كەرقۇلان قۇلىندادى

زووباقتىڭ باسپا ءسوز قىزمەتىنىڭ مالىمەتىنشە، پرجيەۆالسكي جىلقىسىنىڭ قۇلىنىنا كارمەلا اتى بەرىلگەن.

«بۇل جىلقىلار حايۋاناتتار باعىنىڭ ارقاسىندا عانا امان قالدى دەپ ايتا الامىز. پرجيەۆالسك جىلقىسىنىڭ جاڭا ءتولىنىڭ ومىرگە كەلۋى - ۇلكەن قۋانىشتى جاعداي. كىشكەنتاي قۇلىننىڭ تابەتى جاقسى، سەرگەك بولىپ ءوسىپ كەلەدى. كىشكەنتاي كارمەلاعا مىقتى دەنساۋلىق، ۇزاق ءومىر تىلەيمىز»، - دەپ جازىلعان الماتى زووباعىنىڭ Instagram-پاراقشاسىندا.

پرجيەۆالسك جىلقىسى - جەر بەتىندە ءبىزدىڭ داۋىرىمىزدەن بۇرىن پايدا بولعان. زووباقتىڭ حابارلاۋىنشا، ولار ازيا قۇرلىعىنداعى جابايى جىلقىلاردىڭ ىشىندەگى ەڭ سيرەك كەزدەسەتىن ءتۇرى.

«اتاقتى ورىس گەوگرافى جانە زەرتتەۋشىسى، پولكوۆنيك نيكولاي پرجيەۆالسكي بۇل جابايى جىلقى ءتۇرىن 1878 -جىلى ورتالىق ازياداعى لوب-نور كولىنىڭ ماڭىندا كەزدەستىرگەن. وسى جاڭالىق اشىلعاننان كەيىن پرجيەۆالسك جىلقىلارى دەپ اتالىپ كەتكەن. ولار قازاقستاننىڭ عانا ەمەس، دۇنيەجۇزىنىڭ «قىزىل كىتابىنا» ەنگىزىلگەن»، - دەدى زووباق وكىلدەرى.

بۇعان دەيىن الماتى زووباعىندا كەرىك تولدەگەنىن جازعان بولاتىنبىز.

ايتا كەتەيىك، كەرقۇلان، ياعني «پرجيەۆالسكي جىلقىسى» دەپ اتالىپ جۇرگەن جىلقى (لات. Equus ferus przewalskii) - تاقتۇياقتى سۇتقورەكتىلەردىڭ جىلقىلار تۇقىمداسىنا جاتاتىن جابايى جىلقى ءتۇرى. كەيدە ونى جويىلىپ كەتكەن تارپاڭ جابايى جىلقىسىنىڭ ءتۇر تارماعى دەپ تە ەسەپتەيدى. دەنەسىنىڭ ۇزىندىعى 230 س م، شوقتىعىنا دەيىن بيىكت. 130 س م، سالم. 300 ك گ-داي. بيەلەرى ايعىرلارىنان كىشى. دەنەسىن بوزعىلت قىزىل سارى تۇك باسقان، جون ارقاسىندا ۇزىنا بويى سوزىلعان جىڭىشكە تۇكتى بەلدىك ءتارىزدى قاراقوشقىل جولاعى بولادى. كەرقۇلاندى 1878-جىلى ورتالىق ازياعا جاساعان ساياحاتى كەزىندە ن. م. پرجيەۆالسكي قىتايداعى جوڭعاريانىڭ ءشولدى ايماعىنان كەزدەستىرىپ، تەرىسى مەن باس سۇيەگىن رەسەيگە الىپ كەلگەن. ونى زەرتتەگەن ورىس عالىمى ي. س. پولياكوۆ (1845 - 1887) مۇنىڭ جابايى جىلقىنىڭ جەكە ءتۇرى ەكەنىن انىقتاپ، ن. م. پرجيەۆالسكيدىڭ قۇرمەتىنە «پرجيەۆالسكيي جىلقىسى» دەپ اتاعان.